Pu Lalruatkima MLA chuan Minister Pu Zodintluanga leh Congress thalaite’n Inrinni khan 1st IR hmunpui Mualvumah intihhlim nan sorkar silai an kap chiam tih a sawi a. Nuamtawl nana an silaimu kahral chu rul leh vek turin Minister hi MNF chuan a phut a ni, a ti.
Nimina an party Gen. Hqrs. Office, Mizo Hnam Run-a party chhung inkhawmah he thu hi sawiin Pu Lalruatkima chuan, Bungbangla quarry chimah nunna chan pali lai an awm laia Minister leh Congress thalai hruaituten nuamtawla sorkar silai an kap chiam mai chu mak an tih thu sawiin, Laipuitlanga leimin rapthlak a thlen khan Chief Minister berin a biala inzaisiak a lo en daih tawh bawk a. Mipuite an ngaihsak loh zia a chiang hle a ni, a ti.
Pu Lalruatkima chuan, Minister leh Congress thalaite silai kah hi AK-47, INSAS Rifle, USA siam M-4 Rifle leh Glock pistol bakah 9 mm Pistol-te a nih thu a sawi a. Sorkar silai hi dan hmanga khuahkhirh a ni a, civil mi tan kah ve ngawt theih a ni lo a. Dan phal lohvin sorkar silai nuamtawl nan sum tam tak tihekin an kap a. M4 leh Glock Pistol-te phei hi chu US siam a ni a, a mu pawh manto tak a ni a. Mipui suma lei silai mute hetianga tihriral mai mai tur a ni lo, a ti bawk.
Pu Lalruatkima chuan Minister Pu Zodintluanga chu dan pela thuneihna hmangsualah puhin, nuam tawl duh vanga thuneihna hmangsuala mipui sum tam tak an kahral kha Minister hian rul leh vek turin an phut tih a sawi a. Inrinni zinga Bungbangla Quarry chima nunna chante chu MNF-in a tawrhpui takzet tih pawh sawiin, sorkar-in chhiatrupna thlenga nunna chante zangnadawmna pe tura dan a neih ang ngeiin, nunna chante Cheng Nuai 4 theuh pe vat rawh se, a ti bawk.-AIR News Aizawl
Post a Comment