Kolasib Chanchinthar: Vawiin chawhma khan Sport & Youth Services Department buatsaihin Parish Hall, Venglai Kolasib ah Kolasib District mi leh sa Infiamna chi hrang hranga mi hmingtha leh titha te chawimawina hun hman a ni a, Pu PC Zoram Sangliana MLA Kolasib A/C Bialtu chu khuallian niin, Dr.Arun T, IAS Deputy Commissioner Kolasib chu khual zahawm a ni.
Incentive Cash Award semna inkhawm hi Pu K.Lalthlengliana, District Sports & Youths Services Officer Kolasib in kaihruaiin khuallian Pu PC Zoram Sangliana chuan Sorkarin Sport tui mi thalaite tan sum tam tak a seng thin hi a vanneih thlak a, Sport Association te tan a phur awmin tan nasa takin an la a ni, a ti. Zofa ten National mai bakah International thlengin hnuhma kan nei hi ropui a tih thu sawiin Kolasib District in infiammi chhuanawm tak tak te a nei thei chu Bialtu MLA nih ti nuamtu leh thil lawmawm tak anih thu a sawi bawk. Infiammi ni tur chuan insum theihna, tumruhna bakah ruihhlo laka fihlim a pawimawh thu sawiin he huna thalai chawimawia awm te chu midangte tana entawn tlak ni tura mahni nun vawng uluk turin a fuih bawk ani. Hemi bakah hian khawtlang hruaitute pawhin Zirlai leh infiammi te chu khawtlang thil tih na zawng zawnga phut lovin mahni inzir nana hun awl pek thiam a pawimawh thu khuallian chuan a sawi a thalaite khawvel ti eng tura Sawrkar ina hma a lakna te tichak turin mahni in thunun chunga hma lam pan zel turin kalkhawm thalaite chu a chah a ni.
SPORTS INCENTIVE CASH AWARD 2016-2018 KOLASIB DISTRICT
Khualzahawm Dr.Arun T IAS,DC Kolasib pawh in thusawiin Sports hi mihring tan a pawimawh a, taksa hrisel na atan mai bakah rilru hriselna leh nun ti hlimtu a tan a tangkai hle bawk a ni tiin Mizoram chu Cancer vei tamna State a nih avangin nasa taka tan lak a ngaih thu sawiin Zuk leh hmuam , ruihtheih thil laka fihlim theuh turin kalkhawmte chu a chah a, State Sawrkar Project ruahman pakhat HIMNA-MADAT (Mizoram Against Drugs, Alcohol and Tobacco) a Kolasib District huam chhunga palai (Ambassador) a tana thawpuiah kalkhawm infiammite chu a sawm bawk a, Zirna emaw infiamna emaw eizawnna kawng dang pawh nise ,Eng thil pawh ti ila tha thlah leh beidawngte chu an hlawhtling ngai loa, mi tei rei peih leh tum ruh na nena bei tang tang te chu an hlawhchham ngailo thung a ni tiin kalkhawm thalaite chu vawi hnih khat tifuh loh avanga beidawng mai loa hmalam pan zel turin a fuih a ni.
Vawiina Incentive Cash Award hi Sports Displine hrang hrang Foot ball, Hockey, Judo, Taekwondo, badminton leh adt. (etc) a infiammi mi 24 te hnenah Rs 2,35,750 (Cheng Nuai hnih sing thum sangnga za sarih leh sawmnga) chu khuallian in a sem chhuak a ni.-DIPR
Post a Comment