SYNOD Chanchinthar: Vawiin (May 8, 2018) chawhma dar 11:00 khan Nursing School, Synod Hospital, Durtlang-a Graduate thar te pualin Graduation Day hman a ni a, Synod Moderator Rev. F. Lalrinnunga chu Khuallian a ni.
Graduation Day hi Chapel Auditorium-ah hman a ni a, tun tum hi Graduation Day vawi 16 an hmanna a ni. Graduate thar te hi an vaiin mi 32 an ni.
Programme hi Dr. Lalbiaksanga Hnamte, Librarian leh Mary Lalhlimpuii, Sister Tutor ten an kaihruai a, Pi C. Lalrosangi, Sister-in hunserh hmangin Dr. L.H. Thanga Singson, Hospital Director-in inlawmna thu a sawi a. Pi C. Lalrintluangi, Nursing School Principal-in thusawina hun a hmang leh a, Khuallian Rev. F. Lalrinnunga, Synod Moderator-in zirlai chhuak turte hnenah Certificate a hlan a, thusawina hun a hmang bawk. Hemi zawh hian
Award hrang hrang sem a ni a, Award leh a dawngtute chu hengte hi an ni :
1. Pi Kapliani Award for General Proficiency Award 2014-2018 : Lalrinkimi Sailo
2. Pu Chawnga Award for Best Outgoing Student 2014-2018 : H.K. Ramnghinglovi
3. Pu Zaluta Award for Best Performance in Community Health Nursing 2014-2018 : Lalrinzuali
4. Pu Nghaka Award for Best Performance in Medical-Surgical Nursing 2014-2018 : Vanlalduhsaki
5. Pi Zautei Award for Best Clinical Performance 2017-2018 (Staff Nurse) : Pi K. Lalnuntluangi, Staff Nurse
Zirlai chhuakte aiawh thusawi ngaihthlak leh a ni a, Miss R. Lalmuanpuii, Sister Tutor-in lawmthu sawina hun hmangin Rev. R. Ramdinmawia, Hospital Chaplain-in malsawmnain programme a khar a ni.
Nursing School, Synod Hospital hi kum 1928 February thla khan din tan a ni a, a din tirh chuan zirlai 2/3 lek neiin Missionary Sap ten bul an tan a, 1950 vel atang kha chuan Mizo Nurse-te an lo tel ve tan a. Zirlai te pawh lo pung ve hret in, an ni hian a remchan dan angin Lecture leh Demonstration-te an tihpui ve thin. He Nursing School atanga zir chhuak tawh zat chu 1268 vel an ni tawh a, Missionary Nurse-ah te pawh Durtlanga zir chhuak hi 60 chuang lai an awm ve tawh a ni.
GNM Course hi kum thum leh a chanve zir a ni thin a. Mahse, Indian Nursing Council-in kum 2015 atang khan kum thum chhung zir turin thu a rawn chhuah a, Internship Year a rawn titawp ta a ni. Tuna Graduate tharte hi 2014 batch an ni a, an ni hi Internship Year nei hnuhnung ber an ni ta a ni. Kum 2015 batch atang hi chuan kum 3 course a lo nih tak avangin tun kum 2018 October-ah tho hian an chhuah a lo ngai ve dawn ta a. Chuvangin, kum danga thleng ngai lo, kumin ah hian Graduation Day hi vawi 2 lai hman a ngai dawn a ni.
Post a Comment