—Rev. Zonunsanga, Tuipuibari

Tin, Isua a hawi a, an rawn zui a hmu a, an hnenah, “Eng nge in zawn?” a ti a. Tin, anni chuan, “Rabbi (chu chu Zirtirtu tihna a ni), khawiah nge i awm?” an ti a. Anin an hnenah, “Lo kal ula in hmu ang,” a ti a. Chutichuan, an kal a, a awmna chu an hmu a, chumi ni chuan a hnenah an awm reng a; zanriah chhum hun lai a ni a (Johana 1:38-39). 

PATHIAN THUCHAH: ENG NGE IN ZAWN?Lal Isuan a rawngbawlna bul lamah zirtirte a lam khawm a. Jordan luiah baptisma te changin rawngbawl hna a tan a. Chanchin Tha Johana ziaka kan hmuh danin Andria nen an intawn tumin he zawhna – “Eng nge in zawn?” tih hi a lo zawt chat mai. Chanchin |ha Johana ziak hi A.D. 90-100 vel lai khan Ephesi khua atanga ziak nia sawi a ni a. Hetih hunah hian Kristiante zingah Juda Kristiante aiin Jentail Kristiante an tam zawk mah tawh a ni. Chanchin Tha Johana ziak hi Chanchin |ha hmasa pathum (Synoptic Gospels) belhchhah nana ziak ni a rinna te, zirtirna dang (Gnostic) dodal nana ziak a nih rinna te a lian hle a. Kristian la ni lo Juda-te tan a ziak a ni ang tih te, Baptistu Johana zuitute dodalna atan ziak a ni ang tih te, Sakramen ngaihsan lutuk leh ngaihthah lutuk that loh dan sawi fiah tumna a ni ang tih te, Jentail Kristiante hriat thiam tur zawnga ziak a ni ang tih te rinna a lian hle. Heng zawng zawng khai khawmna chu – Bung 20:31-ah Isua chu Krista, Pathian Fapa a nih in rinna tur leh, in rina, a hminga nun in neihna turin, tia inziak hi a ni ngei ang. 


Zawhna harsa a zawt em ni : Andria ten Isua an hmu a, Isua lamah an kal ta nghal a. Isuan a lo hmuhin an hnenah, “Eng nge in zawn?” a lo ti chat a. “Tu nge (who) in zawn?” a ti lo; “Eng nge (what) in zawn?” tih hi a zawhna zawk a ni. Zawng (seek) tih hi a tawng bul lamah ’zeteite’ tia dah a ni. A awmzia chu ‘zawng, zir, ngaihtuah, thil eng emaw tak hmuhchhuah ngei tuma zawng’ tia lehlin theih pawh a ni ang. Pathianin mihring a zawnna te (Jn 4:23), duh tak leh mamawh, beiseina nei chunga hmuh ngei tuma zawng tihna pawh a ni thei bawk ang (Mt. 6:33; 13:45; 18:12ff; 7:7f; Lk 12:31; 12:48; 13:6f; 15:3ff; 19:10; Tirh 9:11). Thuthlung Tharah hian ‘zawng’ (seek/Gr-zeteite) tih hi vawi 117 lai a lang a. Chung zinga 83 chu Chanchin |ha ziakah a ni nghe nghe. He laiah hian an chhan dan atang hian zawhna chhan harsa tak Isua hian a zawt nge ni kan hre lem lo. Amah an zawng nia a lanna chu – ”Rabbi (Chu chu Zirtirtu tihna a ni), khawiah nge i awm?” an ti hi a ni. Rabbi an tih hian zirtirtu tihna a ni a, hei hian a entir chu – an zah hle tihna a ni. 

Zawhna ve ve : Isuan zawhna hi eng vanga zawt nge a nih le? “Eng nge in zawn?” a tih hian a lo fiah ve pawh a ni thei. Rom laka helpui tur an zawng nge? Chutiang a nih chuan Zealot pawl an zawm a tha ang a! Lal Isuan an tum tak (goal) a lo zawt a. Amah zuitute chu mi rinawm a duh a, an duhthlanna ngei hmanga an puan chhuah pawh a phut a ni mahna! Andria te hian a hma pawhin Baptistu Johana an lo zui tawh a. An nun inserha Pathian rawngbawl an duh a, he khawvel thil ni lo, chatuan thutak chu an zawng niin a ngaih theih ang. Chutiang tak rilru chu an pu a ni tih Isuan a lo hmuh khan a lo hre chiang hle ang; zawhna a lo zawt chat mai a ni. Andria te tan Isua hi mi thar a ni a, khawiah nge a chena, tute nen nge an awma, engtin nge an hmuh fo theih ang tih rilru puin zawhna an zawt a ni thei a. Tlangvalten nula hmeltha tak kan hmu a, rim kan duh hial a, “Khawiah nge i awm?” kan tiha, hriat kan chak ang chuan he laiah hian Isua awmna lai hi an hre chak a, an zawt ta hial a ni thei ang. Isua hnenah, “Khawiah nge i awm?” an tih hian, ”Tunah chuan i buai takin, kan rawn tlawh hun chea kan hmuh theih nan che i awmna hmun min hrilh rawh,” an ti pawh a ni thei. 


A chhanna chu an hmu a : Isuan, “Lo kal ula, in hmu ang,” a tih chu an hmu a. An thil zawn chu Isua kiangah a awm a ni tih an hre nghal. Nuam an ti a ni ang, kal sawn reng reng an tum tawh lo. Chumi ni chuan Isua kiangah an awm ta reng a (Jn. 1:39). Isua kianga awm hi a nuam a ni ang, hmel danglamna tlangah pawh bawkte khawh an rawt chul a nih kha (Mt. 17:4ff; Mk. 9:5ff; Lk. 9:33ff). Andria te hi Isuan a sermon khum chiam thu kan hmu lo. Nimahsela, a hnena awm rih tura a sawm hun rei lo te chhungin an nun a hneh em em a, Isua an hmu chiang bawk a ni ang, “Messia kan hmu ta,” (Jn. 1:41) an ti ta thuai reng a! Messia tih hi Hebrai tawng chuan ‘mashiah/ mashuah’ a ni a, Grik tawng chuan ’Kristos’ a ni a, ‘Hriak thih’ tihna a ni a, Israel-ten Thuthlung Hlui hun ata tawh an beisei leh an nghah, an ram leh hnam chhanhim tura mi ruat bik lo kal tura chu sawi nana an hman a ni. Andria te zawhna Isuan a nunin a chhang a, Isua sawmna Andria ten an chhang a, an zui ve nghal ta bawk. 


He thil thleng atanga lo langte: 
1. Mi dang tanpui a duh : Isua`n an zawhna a lo chhan danah (approach), ”|anpui theihna che ka nei em? (May I help you?) tihna ang hi ni lo mah se, chu lam chu a pawl thui khawp ang. Mi dangte tana awm (available) te, hun pek te, an harsatna ngaihthlaksak leh kawng dik an zawh theihna tura tanpuina pek te a huam thei ang chu. 
2. Sawmna leh kohna min pe reng thin : Isuan, ’Lo kal rawh u,’ tia sawmin phurrit phurte tana chawlhna a nihzia a tilang (Mt. 11:28f). Chu kohna chu a khawngaihna vang chauh a ni a, ’kohna thianghlim’ a ni bawk (2 Tim. 1:9). 
3. Tu mah a hnar ngai lo : Isuan amah pantute a hnar fithla ngai lo va. An nihna ang angin a lo pawm a, mal a sawm duh thin a. Sual nih inhriaa pantu hnenah an sual tleng fai turin amah chu a rinawmin a fel a ni (1 Jn. 1:9). 

Keini hian eng nge kan zawn thin : Keini hian khawvel thil leh ropuina lam chauh kan zawng thin em? Keimahni inhaivurna tur chauh em ni kan zawn thin? Ropui inchuh thin te, lansarh khel thin te, chak leh thiltithei nih chaka tuihal thinte hnenah thi khawp hiala thu zawmin inngaihtlawmna thiltithei a zirtir a. Chu chu krawsa thihna ngei kha a ni si (Phil. 2:8f)! 


Mihring nuna bet thin beidawnna te hi kan zawng hran lo. Nimahsela, Isua nen a nih loh chuan beidawnna hian min hneh leh mai thin. Lal Isuan a hnenah kal turin min sawm reng thin. “Nakinah lo kal rawh u,” a ti lo; tunah a ni “Lo kal rawh u” a tih zel ni. Amah beiseia pantute chu a ngaidam zel, a tanpui zel. Kei pawh ka sualna nen ka pan a, “Aw, i sualte ngaihdam a ni min ti,” tih hla angin amah zel zawngin i pan thin ang u.

Source: Kristian Thalai

Post a Comment

Powered by Blogger.