LUNGLEN BUREAU

Vawiin khan Mizo National Women Front (MNWF) Headquarters hruaitute chuan Thenzawl nula Zosangliani,18, D/o Lalrinmawia, kuttual leichham, wheel chair-a thu chunga HSLC 1st. Division-a pass lawmpuina leh chawimawina an nei.

Lunglen BureauNula Zosangliani chawimawina hi R.Lalmuankimi Vice President MNWF- in kaihruaiin K.Lalrengpuii, President MNWF Hqrs.in lawmpuina Citation hlanin tangka fai a hlan tel bawk a, MNF nuho hian parthi engemawzat an awrh tir nghal bawk.

Zosangliani, a nu leh pa nen Thenzawl Block MNF hruaitute leh Village Council hruaituten he hun hi an hman pui a, Aizawl atangin MNWF hruaitu engemawzat in he hun hi an hmanpui bawk a ni.


Zosangliani nu, C.Lalthanzami chuan lawmthu sawiin, “Kan fanu hi a hrisel lovin a zirna kawngah hian harsatna tinreng kan tawk a, beidawng leh tap chunga school kalpui chang kan nei tam hle a. Ruah sur ni phei chuan kan lungngaih a zual thin. Pathianin kan fanu tan kawng min hawn sak zelnaah kan lawm hle a. Kan beisei loh leh hriat loh lam atanga lawmpuina ropui tak kan dawng hi kan phu lovin ropui kan ti hle a, vawiina MNF Hqrs. nu hovin min rawn tlawh hi, Pathian leh kan ram tan titu party nih in inhmeh hle ka ti a, rethei daikil kara mite min rawn hria hi engkimah kan lawm a, in kal leh zelna turah duhsakna sang tak kan hlan a che u,” tiin lawmthu a sawi.

Zosangliani hian Govt. Thenzawl High School atangin matric hi a pass a, wheel chair nena sikul kai thin a ni. A tet laia vaccine a lak vanga kut leh ke zawi (zéng) ta nia sawi a ni a, amah pawha inthiar thei lovin a awm a, a nu, Lalthanzami (Lalseni tia koh) hian a enkawl chawt a, exam laia a ban tha kham tawh lutuk vanga a thiam sa pawh a ziak zo ve hman lo niin a sawi.

Zosangliani hian 1st division result a neih bakah Mizo subject-ah letter a hmu a ni.

Post a comment

Powered by Blogger.