Zemabawk Quarry Chim: Tukin dar 7:30 vel khan Zemabawka Beraw lui-a lung quarry chim-in mi 4 a chhilh hlum. Helai hmuna hnathawk LPK Tipper khalhtu Vanlalhuma chuan helai hmunah hian tukin khan mi 10 velin Lung an load a, a chanve vel an load lai hian a rawn chim thut niin a sawi a, a load tute zinga pakhat hi lung lakna hmun puk atang hian a tlanchhuak ve hman ta lo a, an sira rawra chhu mi 3 chu a chhilh bawk niin a sawi.
Hriat theih chinah Quarry chim hian mi 4 a chhilh ni a hriat a ni a, an zinga pahnih Linda Hmingthianghlimi kum 14, Zemabawk Bethel veng leh Lalremzovi kum 10 Zemabawk-te ruang hi hmuh tawh a ni a, Lalremzovi nu, Linda Zorinpuii kum 32 leh Pu Munga kum 40 te chu lakchhuah an la ni lo a ni.
Aizawl Dist Addl DC Pu John LTSanga hnen atanga thu dawn danin, vanduaina a thlen hriat a nih velah hian Emergency Special Force, Disaster Management & Rehabilitation-te chu a hmunah an kal nghal a, helai hmun hi lung lian khawkrawk tak tak hmun a nih avangin a hai fai turin JCB pahnih hman a ni a, hetih chhung hian SDRF leh NDRF te thleng nghal in theihtawpin ruang lakchhuah hna hi an thawk a ni.-AIR News Aizawl
Post a Comment