ZPM Chief Ministerial Candidate Pu Lalduhawma chuan Mizoram Sorkarin GSDP leh Per Capita Income sang anga a sawi thin chu thil zahthlak tak leh mahni leh mahni inbumna mai a ni a ti.
Vawiin khan Pu Lalduhawma hian Aizawl Press Club-ah thutharlakhawmtute a kawmna-ah he thu hi sawiin, a nihna takah chuan Mizoram GSDP leh Per Capita Income heti taka a lan san takna chhan chu Central atanga tanpuina Mizoram-in a hmuhte chu ram thawhchhuah anga an chhiar ve rikngawt vang a ni, a ti a. Mizoram GSDP leh Per Capita Income lo sang ta chu Mizoram sorkar chuan chhuang takin a tlangaupui a. Per Capita Income phei chu National Average a khum ta hial a sawi chu, a lan danah State changkang tak ang a lo ni a. Heihi chhuanlama hmangin Finance Commission in15th Finance Commission in 2020-2025 thlenga Sum dawn tur zat a ruahhman mek-ah Mizoram sum hman tur a pek tlem phah ang tih a hlauhawm hle tih a sawi.
Mizoram Budget chu Central puihna leh Loan a lak te a ni a, Mizoram-in a thawhchhuah tak tak sawi tham a nei lo tih a sawi a ni. Central sumin buhfai lei a ni a, mipuiin buhfai an leina man sorkara lut leh te, Power lei nana Central sum a hman atanga Electric Bill lo lut leh te, Central tanpuina hmanga Water Supply siam atanga tui bill lo lut leh ang chi zawng zawng chu sorkar chuan a sum lakluh angah chhiarin, GSDP leh Per Capita Income teh nan a hmang niin a sawi a. Central sorkar atanga sum hmuh hmangin sorkar hnathawk hlawh a pe a, chung sorkar hnathawkten hlawh an lak chu sum lakluhah an chhiar tel a, chu chu Per Capita Income tisangtu ber pakhat a ni bawk tih sawiin, a tak takin production sawi tlak a nei reng reng lo tih a sawi.
Pu Lalduhawma chuan 15th Finance Commission Chairman N.K.Singh chuan a hnenah hian a ngaihdan leh rawtna thehlut tura a rawn angin Mizoram dinhmun diktak tun thla Ni 9 -a a thehluh-ah pawh kumin Budget atanga Revenue Mizoram-in a hmuh chu cheng Nuai 80719.02 a nih thu leh chu chu Budget 100-a 8.3 chauh a nih thu a thlen tih a sawi a.
Mizoram sum hmuhna Agriculture leh Industry atanga a deh chhuah chu tlemte a nih bakah, Electric bill te, mipuiin buhfai an leina man te, Vehicle Tax te, Bus chuan man te, zu chhiah tih te mai mai an ni, a ti a. Mipui nawlpuiin hma an sawn ta tihna a ni loh avangin tehfunga hmansak lovin, mipui dinhmun dik tak zawk tehfunga hmansak tura 15th Commission Chairman ah a thlen thu a sawi a ni.-AIR Aizawl
Post a Comment