PRISM Party President Pu Vanlalruata chuan Congress Sorkarin an inthlan thutiam zinga mipui nghahhlelh ber pakhat Lokayukta din an ngam loh avangin Sorkar zel tlaka an ngaih loh thu vawiin khan PRISM Office-a Press Conference-ah a sawi.
PRISM Party President Pu Vanlalruata
Pu Vanlalruata chuan Sorkarin Lokayukta Search Committee din leh tura hma a lakna chu Dan kalh a ni a ti a, MPCC kaihhruai Mizoram sorkar chuan eirukna a veng ngam lo a, Minister leh MLA te an eiruk avangin eiru a hrem ngam lo, a ti. 


Sorkarin Lokayukta din tura hma a lak dan, din tum awm taka mipui bum kual chunga din ngam loa tlan kual an nih thu a sawi a. Kum 2008 inthlan khan Vigilance Commission din an tiam a, an term tluanin an din ngam lo a. Kum 2013 inthlan khan Lokayukta din an tiam leh a, an din ngam leh chuang lo a. Din tur awm taka thil tiin din loh dan an zawng char char a. Tunah phei chuan Dan pawngsualin an che ta a ni, a ti.

Lokayukta din turin kum 2016 November ni 3 a Search Committee a din chu kum 2 term a nih avangin a la tawp lo niin PRISM President hian a sawi a, din thuah leh a nih dawn chuan Dan bawhchhiatna lian tak a ni, a ti a. Kumin May ni 29-a Lokayukta Selection Committee thukhawmin Search Committee din tura a tih chu Dan pawngsualna a ni a. Lokayukta Act-ah Selection Committee kal dan tur fel tak ziah vek a ni a. Hetiang Dan pawh pawisa lo sorkar hi ding zel tlak-a a ngaih loh thu Pu Vanlalruata chuan a sawi a.

Sorkar thil tih dan chu Lokayukta din tak tak an ngam loh vangah PRISM Party chuan an ngai tih a sawi a ni. -AIR Aizawl News

Post a comment

Powered by Blogger.