Lungleiah NEDP Progr. pakhat Entrepreneurship Conclave, Lunglei HPC leh MEDMOC ten an buatsaih chu Planning Minister Pu Lalsawtan a hawng.
Pu Lalsawta chuan, khawvel ram changkang zawkah chuan Sorkar hnathawh aiin entrepreneurship lam a kal te chu mi zahawm leh hausa an ni zawk zel tih sawiin Mizo thalai te pawh sorkar hna ringawt thawk tur a rilru pe lo turin a fuih a, mahni kutke leh ngaihtuahna hmang a eizawng duh te tan Sorkar chuan hma a la chho mek tih sawiin thalai chauh ni lo, kum lam a upa te pawh hetiang zawng a ngaihtuahna hmang a kal turin a chah a, chutiang ngaihtuahna seng tu te chu Sorkar chuan Thalaiah a pawm vek a, hmala tak tak duh tan Sorkar chu a in hawng zau em em a ni a ti.
Taima leh rinawm, chhel taka thawh chuan hlawhtlinna a awm tih sawiin mithiam chauh emaw in hlawhtlinna chang thin kan tih te kha a nihna takah chuan mi taima apiang an hlawhtling zawk a ni a ti. Harsatna tamtak erawh paltlang tur a awm tih sawiin harsatna hian min dang dawn lo tih rilru kan put tlat chuan kan hma a harsatna awm te hi an la zawpral zawk dawn a ni a ti.
Mizoram Youth Commission Chairman Joseph Lalhimpuia pawhin thusawiin, Mizoramah hnamdang hnathawk an tam lutuk chu veiawm a tih thu leh an thiam ang Mizo te pawhin an thiam ve reng tih sawiin Pathianin talent a pe tha em em a, heng te hi chhawr tangkai thiam a hun takzet a ti.
Conclave-ah hian Stall 26 buatsaih a ni a, 'Micro Start-up Competition' titha thlanchhuah ten Exhibition hmangin an thil siam an phochhuak a. 'Micro Start-up Competition' kalhmang leh he competition-a tel tura an inpuahchah dan te leh entrepreneurship lama hriat duhte heng Entrepreneurs-te hi an zawh theih reng bawk a ni. Exhibition hi vawiin leh naktuk chawhnu dar 1:00 thleng mipuite tan hawn a ni.
(LLi PTC)
Post a Comment