DANGDAI LAWRKHAWM NGAIHNAWM

Vanlalsanga Tochhawng 

Thilmak leh dangdai tia kan sawi zingah pawh hian mak chungchuang bik leh, han ngaihtuah mai pawha thil ni thei lo hul hual tura kan ngaih tam tak hi he kan chenna khawvelah hian a thleng fo mai a, khawvel a awm chhung chuan a thleng zel dawn niin a lang.

1. Kum zabi 16-na laia Filipino Guardia Civil, Gil Perez-a chu Manila Philipines-a Governor in venga a duty laiin bang nghengin a ding a. Chutih lai tak chuan, vawi lehkhatah, a taksa chu a mur deuh chuai hian a inhria a. A han harh chhuah meuh chuan, Manila-a, Governor in a venlaia a uniform nen a ngai ngaiin, Manila ațanga km 13684 a hlaa awm, Mexico City-a an Mayor-te in tualah a lo awm daih mai a ni.

2. Knowledge Zone-in a tarlan danin, African hnam tlem tak Lesotho a hmeichhe pakhat chu a rai a, mahse serh kua a nei miah lo rhung. A bialpa nen oral sex an hmanga alem a ni mai thei tih te, a pumpui pem emaw pilh atangin a nih dan tur ang deuh tlapa kal in a reproductive organ(chhul) ah chuan a mipa chi dawlh chu lut ta a ni thei ang em, tihte chu zawhna leh mite ngaihdan a ni, a ti.

3. North Korea-ah chuan an hruaitu Kim Jong Un-a thu chhuak angin mipuite chu lumeh dan style 28 chiah phalsak an ni a, hmeichhite'n thlan tur style 18 neiin, mipa erawh chuan style 10 chiah an thlang thei a ni. North Korea rama i awm a nih ve ngai chuan lumeh dan style-ah fimkhur a ngai tihna nih ber chu!!!

4. Canada-a khaw pakhat, St. Paul, Alberta-ah chuan khawvela UFO țum hmun (landing pad) hmasa ber chu kum 1967 khan an siam mauh mai!!! Alien te rawn țum ve țhin tak ang maw???

5. Ethiopia ram Omo phairuama cheng tribal hnam chi khat chuan June emaw July thla emawa thla bial lai hian tlangval inthausiakna an nei țhin a. He intihsiaknaa tel tur tlangvalte chu a hma daih atangin bawnghnute leh sathau leh bawng thisen chawhpawlh an lo ei nghek zel a. An intihsiaknaa a thau ber leh dul kiar ber chuan pakhatna lawmman an la țhin a ni. Chutianga an intihsiak zawh hnu chuan chaw pangngai an ei a, an lo ria ve leh mai țhin a ni.

6. Octopus chi khat, Graneledone boreopacifica an tih tuifinriat thuk tak taka awm, a pui pakhat chuan a tui awpkeu nan kum 4.5 hun a hmang țhin a, rannung zingah atui awp rei ber a ni. Vau kam leh tuifinriat pawnlang tak taka awm octopus-te chuan a tui hi rei lo te an awp a, a tui an awp chhungchuan a puiin chaw a ei miah lo thung a, ar pui awp ang hian an zang huih a, a note an keu rualin an thi chhawm ve mai thin a ni.

7. Japanese Journal of Ichthyology-in a ziak dan chuan, frilled shark hian a note kum 3.5 a pai a, tui lovin a note chu a hring ta thin a ni. Alpine salamanders hian a note chu kum hnih atang kum li an pai thin a, note an hring thin bawk a ni.

8. Khawvela ramsa lian ber Africa saite hi note ngaihsak tak an ni a, a pui hian thla 22 zet no an pai thin a ni.

9. Khawmualkaikuang te hi maimawm lam chhungkaw zinga mi ni mahse, an tui ve lo va, note a hring thin a, a pui hian thla 7 atangin thla 9 thleng a chi a zirin no an pai thin a, Africa rama Opisthacanthus asper an tih khawmualkaikuang chuan thla 18 lai no an pai thin a, no an neih hnu hian a pui chuan a note te chu a hnugzangah awm khawm tirin an mahnia an khawsak theih hma zawng a kilkawi zui mai thin a ni.

10. Vanduaina lian tham lo hmachhawn tawh tute zingah Violet Jessop-i hi mi vannei tak a ni awm e. Amah hi Lawngliana Nurse hna thawk thin ani a, a hunlaia Lawng lian hmingthang filawr lak pathum 'Three Sisters' an tih mai țhin, Titanic, Britannic leh Olympic ah te a thawk kual kim vek tawh a. Olympic leh Britannic phei chu indo-lawng hmingthang an ni nghe nghe a. Lawngpui pathum zingah Titanic hi tê ber a ni. Olympic lawnga a thawh lai hian an Lawng leh indo lawng (warship) an in sut avangin Olympic hi a pil lek lek a, Violet-i hi a damchhuakte zing ah a tel ta a ni. Tin, Titanic-a thawh laiin Titanic chuan vurtlang a sut vangin Atlantic tuipuiah a pil a, hetah pawh hian Violet-i hi a damchhuak zingah a tel leh a. Tichuan, Britannic-a a thawh lai hian Britannic chuan tuihnuai bomb (torpedo/mine) su puakin a pil leh bawk a, mak tak maiin Violet-i hi a damkhawchhuak ah a tel leh hlauh mai a ni.

11. Alaskan wood frog hi rannung zinga dangdai pawl tak a ni awm e. Thlasik a lo thlen chuan vurin a bawh khat luk țhin a, an thaw lova, an lungphu meuh pawh a chawl țhin. Mahse, Țhal nipui a lo thawt chuan a pangngaiin nun an rawn hmang leh mai thin a, thaw lo leh lungphu phu miah lovin ni tam tak an awm thei tlat mai hi thilmak a tling a ni.

12. South Africa ram Eastern Cape-a Xhosa hnam mipa tleirawl chi thlah țan thei chin rawltharte chu ‘abakhwetha’ an ti a, na chhawkna leh anesthetic hmang lovin Ulwaluko an tih an serh vun hmawr țansakna an nei țhin a. Chumi hnu ramhnuaia anmahnia an ei leh in tur ngaihtuahchawpa an khawsakna tur buk khawtlangin an saksak an pan lai chuan puan var an sintir a, an hmai an hnawih rang bawk a. He buk atanga an rawn chhuah hnu hian puan dang an sintir a, khawtlangah puitliang anga ngaih an lo ni ta thin a ni. Tin, an fanu te an rawn tleirawl dawn chuan an serh an țhui phuisak thin a, chu chu an pasal neih huna sex an hmana tawn kak tur ani deuh ber a, an hnam dana nula thianghlim tihna a ni. Ati thiam bik hmeichhia an nei thin a, chu chuan ram hling leh ram hruiin ațhui saka khaw pawn ah a hliam dam hma chu an dah thin. Mahse, hetiang an thil chin hian hmanraw thianghlim lo leh anesthetic hmang lo, hliam enkawl zui lo an tih țhin avangin an hmeichhe tleirawl te suattu ber pakhat a ni tlat thung.

13. Africa rama sangha chi khat, Peters' elephant-nose fish an tih chuan sai-nawn ang deuh hian nawn a nei ve a. Chu a nawn chu a kâ nen a inzawm a. Tin, a nawn ațang chuan electric zungzam a pe chhuak thei a, chumi hmang chuan lum leh vawt te, ei tur awmna leh pianhmang te a chhut a, a kawppui zawnna'n te, invenna'n te, inbiakpawhna'n te, kawng zawnna'n te leh tei hawina'n te a hmang țhin a ni.

14. Khawvel hmeichhe danglam bik ngau ngau zingah pawh, Kim Anami tluka World record siam dangdai thei hi an tam lo khawp mai. Khawvela hmeichhe serh chak ber (world's strongest vagina) record a siam a. Coconut, lakhuihthei, trophy te leh chandelier te, darthlalang lian leh surfboard te, rit in chawi siak na (gym weight) thlengin a serh hmangin a khai kang nalh nalh thei a ni. A thil khai turte chu hrui fei leh rinawm takin a han thlung ang pen pawn a, a hrui hnawr lehlam chu a serh chuan a lo chep bet tlat a, a serh hmang chuan a khai kang leh nge nge țhin. (Post hmasaah mipa sazu chak ber chanchin leh a thil khai theih te kan thailan tawh bawk kha...AKZ)

15. Kum 1962 khan Tanganyika (Tuna Tanzania ni ta) ah khuan tlang hri leng dangdai tak, nuihzatna hri, mi thiamte'n Mass Psychogenic Illness (MPI) an tih mai chu a leng chiam mai a. Kashasha khua leh a chheh vel khuate chu "kum khat dawn an nui e" an ti. He hri leng dangdai tak hi January 30, 1962 khan Kashasha khuaa Mission school pakhat, hmeichhiate chauh luhna school ațangin a ințan a. A tirah chuan hmeichhe pathum an han nui phawt a, chutah naupang dang kang kai zelin an nui zau zel a, an School naupang zawng zawng deuhthawah a thawk ta chiam mai a ni. An lehkha zir te hial a tihbuai tak avangin School pawh an khar phah ta hial a. He natna hri hi țai darh zelin khaw dang leh School dangah te pawh a kangkai zel a; nimahse, nunna chân an awm awm hriat a ni lo thung a ni.

16. Mi thiamte chuan Vangvat hi an han zirchiang a, zirchiannaa alan danin, Vangvat taksa pawn lam hi bung hrang 102-ah a țhen theih a, a chhung lam erawh chu bung 32-ah a țhen theih thung. Chung bung 32-ah chuan thluak a awm țheuh a, mawlmang takin, Vangvat hian thluak 32 a nei kan tithei awm e.

17. Norway rama thingtlang khaw pakhat Hessdalen Valley hmunah chuan zan lamah thil êng (light) mak tak (unexplained nocturnal light) an tih chu, khua ațanga 12 Km vela hlaah hmuh a ni țhin a. Ramdanga thil eng makte nen inang lo takin rawng chi hrang hrangin a lang thin a, UFO kaihhnawih a ngaih theih turin a en dan leh eng kal chak dan pawh a inang lo nuai mai a ni. Kum tinin he hmunah hian Khualzin leh Photographer te an kal khawm thin a, a thla an la huai huai țhin a, a chang chuan unau hmelhai hun velah te a rawn inlar nawlh țhin. He Hessdalan Light vang hian Hessdalan khua pawh a lar phah hle a ni.

18. Kum 2003 khan mihring ruh ni awm taka lang, inchi 6 leka sang chu Chile rama Atacama thlerah hmuhchhuah a ni a, "Atacama Alien" tiin a hming an vuah a. Naupang kum 6-8 vela upa mihring ruhro niin an ngai naa a san zawng te, a nakruh kim lo te leh a luruh dangdai tak avang te chuan ngaihdan hrang hrang leh inhnialna a chawkchhuak nasa hle. A DNA chu, "High Quality" a ni e an ti a, scientist ho tan pawh zir fe tham a ni an ti.

19. Nazi-ho leh Alien-te hian inzawmna thuruk an nei niin mi țhenkhat chuan an ring a. A chhan chu, Scientist ropui Vladimir Melikov leh a sangawizawnpui Explorer rualte chuan, Russia rama Mount Bolshoi Tjach hmuna puk pakhatah an hmu chhuak a. A chhungah chuan luruh pianhmang daidai tak pahnih leh hmasang mite zungbun leh German ho map, kum 1941 vela Adygea region lanna a awm bawk a. Chu luruh chuan sawi zui a hlawh hle a, Alien luruh ni ngeia ring pawh an awm a. Chuvang chuan, Nazi ho leh Alien te hian inzawmna thuruk an neih an rin phah ta hial a ni. UFO leh Alien-te hi mi tam tak chuan an awm ngei an ring a, US President John F Kenndy khan president anih chuan US sawrkarin UFO chanchin a thupte chu vantlang hmaa puanzar a intiam a, mahse, a puang ta chuang lo va, khami vang chauh pawh khan mi tam takin UFO awm tak tak hi an ringnghet zual sauh a ni.

20. Kum 1572 ațanga 1867 inkar khan, Romanian ho chuan nupa ințhen tur ven nan thil dangdai tak mai an hmuchhuak a. Chu chu, "Divorce room" ah tih hi a ni. He pindanah hian nupa ințhen tumte chu kar hnih chhung an khung hrang țhin a. Chu nupa tuak chuan khum te, chair te, thirfian te, fork te, plate te..etc.. an in hman tawm vek a. Chutianga ni 14 chhung an khunghran hnu a an la ințhen duh fo anih chuan Kohhranin ințhen a phalsak chauh țhin a ni. He thil ruahmanna hi a hlawhtling khawp a, kum 300 chhungin he Divorce room chhimtute zingah nupa tuak khat chiah ințhen an la awm niin an sawi.

21. Japan ramah chuan "Zoo Jeans" an tih brand dangdai tak a awm a. Kum khatah hak 10 bak an siam chhuah ngai loh avangin an inchuh nasa thei hle. Jeans puanthan thar chu tyre chhia velah țawn betin sakeibaknei khalh turin sahuanah an theh lut a, sakeibaknei chuan duh tawkin a lo suasam a, chu chu la chhuak lehin puan țhuitu chuan sakei sehna leh a ham thlerna hnuhmate chu lang thei ngei turin mawi takin a lo țhui pum leh a, an hralh chhuak ta thin a ni.

He thil hi Japan rama Tohoku region tuai thar lehna campaign denchhena tih a ni. Sendai City-a Tohoku Gakuin University ho bul tumin Kum 2014 ațang khan an hralhchhuak țan ta a ni.

Online lilamnaa an țanna rate pawh hak khatah yen 98,000 (US$957.55) plus tax a ni hem mai. A to viau naa thil vang tak a nih avangin an inchuh nasa țhin hle a ni.