Chhingchhip Sainik School

Chief Minister Pu Lal Thanhawlan vawiin khan a chenna inah Sainik Schools Society Inspecting Officer (G), Commodore G. Rambabu chu kawmin, Mizoram Sainik School chungchang thil pawimawhte an sawi dun a.

Commodore Rambabu chuan state sawrkar hmalakna avanga Chhingchhip Sainik School chu India rama Sainik Schools Society enkawl zirna in zinga zirlai hmeichhiate luh ve theihna hmasa ber a ni chu lawmawm a tih thu leh, hemi entawn hian Sainik School dangah nakum atang hian zirlai hmeichhia tan admission hawn tan tum a nih thu a sawi a. Sainik hnuaia Scholarship Scheme chu India rama scholarship scheme tha ber pawl a nih thu te, a thlawn deuh thaw a zirlaiten lehkha an zir phah theih thu te sawiin, Sainik Schools Society ten hmalakna kalpui an tum dang hrang hrangte a sawi bawk. 

Chief Minister chuan India khua leh tui nih chhung chuan Hindi thiam a pawimawh a, chumi atan chuan Sainik School hi Hindi zirna tha tak a nih thu te, exposure tour an buatsaih thin te pawh chu zirlaite khawhawi tihzautu tha tak nia a hriat thu a sawi. 

Chhingchhip Sainik School hi Ministry of Defence hnuaia Sainik Schools Society in India rama Sainik School 26 a enkawl zinga a naupang ber a ni a. 2018-2019 batch ah hian zirlai 60 zingah hmeichhia 6 an tel a ni. Uttar Pradesh Sainik School chuan kumin April thla khan zirlai hmeichhia an lo admit ve tawh bawk a, amawherawhchu state sawrkar din a nih avangin hmun danga Sainik Schools Society in an enkawl te nen a inanglo a ni. (DIPR)

Post a comment

Powered by Blogger.