— Vanlalsanga Tochhawng
Khawvelin kum zabi 21-
na a chuankai meuh
chuan mihring nunphung leh
hawiher engkim mai hi a inher
danglam nasa em em a.
Khawvel hmasawnnain a
rawn her chhuahpui zinga
chak leh bawhtu ngah, Mizo thalaite min rûntu, kan sum
leh pai leh kan zahawmna tam
tak min hlohtirtu chu
incheina hi a ni. Hnualsuat
theih ni si lovin kan nunah, a
serh zinga a mei ang tlat a ni
si a. Tunlai khawvelah chuan
kan cell phone thleng hian
incheinaah a chang zo ta a nih
ber hi.
Tun hma kan nu leh pa,
kan pi leh pute hun lai atang
tawh khan, phak ang tawk leh
neih ang tawkin an lo inchei
ve thin a. Hmeichhiate pawh
khan artukkhuan rah rawt dip
leh powder diak te an hmaiah
hnawihin, an lo hawi paw
pheu tawh thin a. Kan tunlai
hun atanga thlir let chuan a
nuihzatthlakin a thing hle a ni
thei. Mahse, a hun lai kha
chuan an mawipuiin, induh
puina tham chu a ni. Silh leh
fen chu a hun thu azir zelin a
inthlak zel chu a nih hi.
Mipate pawh incheina
lama hi chuan kan bang bik
lo. Kan pa, kan puteho hun lai
kha chuan leather jacket haa
beatle shoe bun pha chin chu
an induh vah. Kekawr
tlangarh hun laiin an zawm
arh belh a, a zuih uar hunah
mahnia phelh theih loh
khawpin an tizuih leh a.
Khang hun kha a la rei lo,
dumde ruang vui liam hun
chhung ang lek a ni.
Bible-a fashion/incheina
kan hmuhna hmasa ber chu
Eden huan a ni. Bawhchhiatna
vanga an saruak khuh bo
nan theipui hnah an hmang
a. Siamtu Pathian pawh
chuan an saruak khuh chu tha
tiin, ni khat pawh daih mang
lo tur theipui hnah chu
cancel-sakin savun kawrfual a
siamsak ta zawk a ni. Savun
kawrfual fashion chu tawk ti
lovin thawmhnaw pangngaiin
min thlak sak leh ta zel chu
a nih hi. Mihringte ai chuan
Pathian hian kan incheina leh
inchei dan hi a ngai pawimawhin
a duhtui hle. |ha lo a tih chu a thlaksak hmak
hmak mai. Keini pawhin kan
inchei dan kan duhtuia, kan
inzirtir thar reng a ngai.
Tunlai khawvelah chuan
thawmhnaw siam chhuaktu
company-te hi an thang
chakin an thang duang hle
mai. Keini Mizoramah te ngei
pawh company lar tak tak –
Wrangler, Van Heusen leh adt.
kutchhuak chu kan kawtkai
ngeiah lei theihin a lo awm ta
a. Khawvel mi lar leh mi
hausate inbel chu media
lamah kan lo hmu ve zel a.
Miten an mawipui chu kan
mawipui ve dawn emaw kan
ti tlat a. An hak ang kan hak
ve theih avang chuan kan
ropui pha si lo. Fashion slave
nihna mai mai a ni.
Fashion bulthum taka
saruak khuh lo hlauhna chu
a bo zo va, tunah chuan kan
incheina te en hian saruak loh
kan hlau zawk emaw tih tur a
ni. Nalh kan tum luatah hian
kan zahawmna leh mawina
thuruk chu keimahni ngei
hian kan tibawrhbang a ni.
Kan thawmhnaw tight leh
tight lohvah te, kawr awm zau
leh zau lohvah te, sam tih
danah te Kristian nula leh
tlangval tih awm i hria ang u.
Tunlaiah social media kan
hmang nasa hle mai. A bikin
Facebook-ah te hian liker leh
comment-tu neih tam duh
avanga sexy tak taka in-post thin mite hian like-tu an ngah
zoh poh leh an mualphona a
thui tih an hre thiam lo.
“Thinlung lam hi a pawimawh
zawk,” ti mah se, kan Biblein,
”Thinlunga khat liam chu
kain a sawi chhuak,” a tih ang
chiahin, a chhungril nun chu
an incheinaah a rawn lang
chhuak a ni.
Nungchang mawina leh thatna tel lova silhfen mawi
leh man to inbel chu awmzia
a awm lo. “A thuamhnaw
man chu a mawiin a to hle
mai....mahse....” tih a lo ni thin
si a. Chu vang chuan pawn
lam mawina leh thatnate
hnualsuat si lovin, kan
nungchang, kan thiltih, kan tawngkam, kan engkim fun tel
atan Lal Isua thuam i inbel ang
u. Eden huana savun kawrfual
la tur chuan thisen
chhuah hmasak a ngai ang
khan, kan thuam ni turin
Kalvariah Lal Isua thisen chu
a lo luang tawh si a.
Post a Comment