— Ngurthuama Lungchhuan

Chutiang bawkin keini tam tak ni mah ila, Kristaah chuan taksa pumkhat kan ni a, a mal malin in peng tawn theuh kan ni (Rom 12:5).

KOHHRAN – KRISTA TAKSA

Kohhran tih hi thuthlung hlui hunah kan hmu lo va; mahse, a hlimthla erawh Israel hnam atangin kan hmu thung. Thuthlung hlui kohhran sawi nan hian (Gahal) leh (Edah) tih hi hman thin a ni a, Gahal tih chu ‘Koh’ tihna mipui awm khawm emaw, kal khawm emaw sawina a ni a. Edah tih chu ‘Ruat’ tihna te, hmun ruat bika inhmu khawm emaw sawina a ni. Israel-te sawina atan awm khawm emaw, pung khawm emaw, an aiawh te sawi nan an hmang. Bible-ah kohhran tih kan hmuh hmasakna ber chu Mt. 16:18-ah a ni a. Greek tawngin Eklesia tih a ni a. Ringtu inhlawm khawmte (Tirh. 5:11) khawvel puma ringtu, Pathian be tura inhlawm khawm te (1 Kor 12:28), lei leh vana ringtu zawng zawng te (Eph. 1:22, 3:10,21) sawi nan an hmang thin tih kan hmu. Kohhran chu Pathianin a Fapa Lal Isua thisen hmang sual ata a tlan chhuah, Pathian ringtu awm khawmho tihna a ni. 

1. Kohhran – Krista taksa chu Bible-in fiah taka kohhran a hrilhfiah dan chu Krista tih a ni. Krista taksa tia kan sawi hian, Lal Isua chu a taksain khawvelah a awm tawh lo va, a hnathawh tinreng thawk chhunzawm turin kohhran a din a ni. Mihringten kan taksa hna kan thawk angin. Lal Isuan mi a tihdam dawnin a hna thawhsaktu a mamawh a, chanchin tha hrilh a tulin hriltu tur a mamawh a, naupangten Isua chanchin an zir theih nan zirtirtu tur an mamawh a, chutianga a hna hrang hrang thawk chhun zawm turin kohhran – a taksa chu kan lo awm a. Ringtu tin kan awm khawm a, chu chu kohhran (a taksa) chu kan lo ni ta a. Chutichuan, nangniho hi Krista taksa chu in ni a, a pengte in ni theuh bawk a” (1 Kor. 12:27). 


2. KOHHRAN LU CHU KRISTA A NI Bible-in Kohhran – Krista taksa tia min hrilh hian, kohhran lu chu Krista a ni tih min hrilh tel bawk (Eph. 1:22; Kol. 1:18). Lu leh taksa chu a inzawm tlat a, then hran theih a ni lo. |hen hran a nih chuan awmzia a nei lo. ‘Thi’ a ni. Chutichuan, lu leh taksa a then hran theih loh ang chuan Krista leh kohhran chu a inzawm tlat a, kohhran chu a lu Krista atanga awm hrang thei a ni lo. Kohhranah chuan a Lu Krista chuan thu a nei a, a thu awih chu a ‘Taksa’ kohhran tih tur a ni. A chungah thuneitu dang an awm a thiang lo. Luin taksa pengte thatna tur a ngaihtuah angin, a taksa pengah duhsak bik a nei ngai lo. Kohhran mi tinte hi a pengte kan nih avangin Krista chuan min duhsakin min hmangaih a, min ngaihsak em em vek a, kan thatna turin kawng engkimin min thawhsak thin. Chutichuan, kohhran chu a Lu Krista tel lo chuan eng mah a ni lo va. Kohhran chu a taksa a ni a, engkima tikhattu famkimna chu a ni (Eph. 1:23). 

Aw le, Kohhran – Krista taksate chu engtianga khawsa ho tur nge kan nih he kan taksa atang hian zir chhuah han tum ila (1 Kor. 12:12-31). 

1. INHMANGAIH TAWN TUR KAN NI Bible-ah hian mi dangte hmangaih tura fuihna a tam khawp mai. “In inhmangaih chuan mi zawng zawngin chumiah chuan ka zirtirin nih an hria ang” (Joh. 13:34). Inhmangaih tawnna ngawt lo chu tu ma eng mah ba suh u (Rom 13:8). “Nangmah i inhmangaih angin i vengte i hmangaih tur a ni” (Mk. 12:3). Bible-in min zirtirna atangin mi dangte hmangaih a pawimawhzia kan hria a; mahse, kan hmangaih thei lo fo si hian keimahni nun a tihbuai chang a awm thin. Bible-in hmangaihna tura min zirtir angin hmangaih kan duh a, a kawng kan zawng a, kan mihringpui an nihna atanga hmangaih kan tum a; mahse, thisena inzawmna neih miah lohnaah chuan a harsa em em si. 


Tin, kan rawngbawlpuite an nihna a\angin a kawng kan zawng a, a harsa tual tual em maw tih mai tur a ni. Mihring ngaiha sang zawk anga an lan chang te, Thlarau Thianghlimin a chawisan chang ten lawmpui ai chuan kan thik zawk emaw tih tur a ni. Rawngbawl tlang theuh theuh, biak in khata lawi tlang, duh inang theuh si hi inhmangaih tawn a va harsa em! Rom 12:5-ah chuan, “Nangni hi tam tak ni mah ula Kristaah chuan pumkhat in ni a, a mal malin inpeng tawn theuh in ni,” min ti. Kristaah chuan pumkhat kan ni tih hi hriat a ngai a. Taksaah peng tam tak kan nei ang hian kohhranah chuan peng hrang hrangin kan awm a, a taksa kohhranah chuan mi dangte chu kan zawmpui pengte an lo ni reng a ni. Kan zawm theih loh thin te, kan thinlungin a ngaihdam theih miah loh te an awm thin. Chungte chu kohhran kaltlanga kan zawmpui pengte an ni a, kan taksa peng tinte kan hmangaih ang hian, Kristaah chuan taksapumkhat kan nih angin inhmangaih tawn theuh tur kan ni si a. Hmangaih harsa kan tihte hi, “Ani saw ka zawmpui peng a ni,” tiin thlir thin ila, chutiang bawkin kan bula awm apiangte hi, “Kristaah chuan ka zawmpui a ni,” ti ngam zel ila, kan thinlung tak taka chutianga kan tih theih reng chuan mi dangte hmangaihna thinlung duhawm tak kan nei thei ngei ang. 

2. INNGAIHLU TAWN TUR KAN NI Kohhranah hian mi chi hrang hrang – mi hausa leh rethei, mi lian leh mi te, mi thiltithei leh chak lo te kan awm a. Mihing thila kan nihna, kan hnathawh, kan thiamna, kan hausakna atang ni lovin Krista taksaaah chuan inpeng tawn theuh kan nih avangin kan inzahin kan inngaihlu tawn tur a ni. Kohhrana rawng kan bawlnaah ngaihhlutawm zawk leh sang zawk anga lang a awm fo; mahse, kan taksa pakhat kan nih avangin hlu zawk leh zahawm zawk tu mah kan awm chuang lo va. Rawngbawlna (nihna) chelh nei miah lo pawh hmuhsit theih an ni bik chuang hauh lo. “Pathianin peng tinte chu taksaah hian a duhna apiangah a awmtir theuh tawh a ni” (1 Kor. 12:18). 


Pathian chuan a taksa kohhranah chuan thilpek hrang hrang min pe theuh va, a duhna apiangah min rem theuh va, taksa pumkhat kan nih theih nan. Rawngbawlna langsar leh ropui zawk kan nunin a awh chang a awm thin a, Pathianin langsar taka a dahte nun kan it chang a awm thin bawk a. Kan chan te, kan dawn te hi inang ta vek se min tibuaitu a nih zawk chang a awm ang. Kan taksaa peng tam tak hnathawh a inang lo ang hian, Pathian chuan hnathawhna tur leh tih tur hrang hrang min pe theuh a ni. Thu hril vek ila tu nge ngaithla ang? Ngaithlatu ni vek ila tun nge sawi ang? Zirtirtu ni vek ila tun nge zir ang? 

Thilmak titu ni vek ila khawiah nge a lan chhuah ang? Tihdam theihna nei vek ila tu hnenah nge kan hman ang? Pathianin min dahna theuhvah hian kan hlu theuh a ni.

Post a comment

Powered by Blogger.