AZL: Kar khata Kohhran
ho inkhawm hunbi nilaini
zan, inrinni zan leh
Pathianni nileng leh zan
te hi mi thenkhat chuan
tam an ti thin a, hetihlai
hian Kelkang-ah erawh
june ni 12,2013 zana an
inkhawm kha chawlh
awm lovin tun thlengin
zan tin an la inkhawm.
June 12, 2013 zana
an inkhawm kha chawl
lovin zantin vantlang
Pathian biak inkhawm
an la nei chhunzawm zel
a, nimin kha chawl lova
an inkhawm kum 5-na a
ni a. Chawl lova an inkhawm
kum 5 na nimin
khan Pathian chawimawi
nan mipui huap
inkhawm an nei a, tlai
lamah ruai an theh
bawk a ni.
Pathian chawimawina
hi harhna chang
tawh Mizoram hmun
hrang hrang ami ten an
han chhim hlawm a,
kelkang boruak a daih
deuh hnua mikhual an
tam leh ber tum a ni.
Kelkang harhna hian
Mizoram pum a fan a,
Mizoram bak atangin
state thenawm leh ram
dang atang tein he khaw
harhna hi an han chhim
thin a. Harhna chhimtu
mikhual te hi a tir lamah
chuan lo chhinchhiah a
ni lo a, kum 2014 september
thla tawp lam
atang khan mikhual kal
zat hi chhinchhiah tan a
ni a. Kelkang presbyterian
kohhran hruaitute
chuan mikhual 241828
an awm tawh an ti.
A vanglai kum 2014
leh 2015 chhung khan
mikhual hi ni khatah mi
2000 - 3000 dawn dawn
te an awm thin a, mikhualte
hi Mizo inthlen
dan pangngaiin chhungkaw
hrang hrangin an lo
thleng thin. Kelkang
khuaa chhungkaw tam
tak hian mikhual an
ngah avang hian harsatna
an tawh awm hriat a
ni lo a, anmahni chuan
an that pui zawk niin an
sawi tlat thung.
Mi chi hrang hrang
sang telin an chim hum
hum avang hian nghawng
tha lo a awm lo
niin kohhran hruaitute
chuan an sawi a, an
khua in an thatpui zawk
niin an sawi. Pathian
malsawmna an dawn
nasat thu sawiin, harhna
a rawn thlen hma aiin
an khua hian nasa takin
hma a sawn zawk niin
an sawi.
Ramri hrula an awm
avang hian an khaw
chhunga thalai thenkhat
chu ruihhlo ah an buai
thin niin Kelkhang kohhran
hruaitute chuan
an sawi a, harhna in a
man hnuah erawh ruihhlo
a buai an awm lo
niin an sawi a. Harhna
zual pui reh tawh mah
se zu leh ruihhlo ah an
khaw mite chu an la fihlim
tlang hle niin an
sawi a, ruihhlo ti thin lo
tlu leh an awm a nih
pawhin mi pahnih khat
bak an ni lo an ti.
A maka maka tamin
an pan ruih ruih avang
hian Kelkang khuaa zirlai
naupang ten an zirna
an tih chhiat phah hi
hlau in khatih laia
Champhai DC khan zirlaite'n
an inah lehkha
zirna hun an neih
mumal loh avangin high
school zirlaite chu ni tin
chawhnu lamah darkar
hnih tal an sikulah a
bika zirtirna (special
class) neihpui thin turin
zirtirtute a lo ngen hial
tawh a ni.
Kelkang kohhran
upa te chuan an khuaa
zirlai naupang te zirna
lamah an tlakhniam
phah loh thu sawiin,
harhna a thlen hnu hian
zirlaite resut a tha zawk
niin an sawi a. Harhna
vang lai kha chuan zirna
in hawn theih loh chang
a awm thin thu an sawi
a, mi tam zawk chuan
zirna tlahniam viau
turah an ngaia mahse
Pathianin malsawmna
kan dawnga kan naute
hian an hunawl lehkha
an zir ngawrh bawka
zirna in a tuar lo a result
a tha zel zawk a ni
an ti.
~Ramdinsanga (Zozam Times)
Post a Comment