KHAWIH NAWN KAN NGAI - TIMES OF MIZORAM

Breaking

Home Top Ad

Post Top Ad

KHAWIH NAWN KAN NGAI

Lal Ramhluna Ralte

mizo sermonMarka 8:24 Tin, a han dak chhuak a, "Mihring ka hmu a, thing kal ang maiin ka hmu si," a ti a.
Lal Isua Bethsaida khua a lo thlen khan mitdel pakhat mit a chil hmangin a tivar a. Khua i hmu thei em? tia a zawh khan mitdel khan, "Mihring ka hmu, thing kal ang maiin," tiin a chhang a! Isua chuan a han khawih nawn leha engkim a hmu fiah thei ta a ni.

Isuan a khawih ngei si, a vawikhatnaah a hmu chiang lo va, mihring pawh thing kal ang maiin a la hmu tlat hi a mak hle a ni.

Piangthar kan inti a, Lal Isua ngeiin min khawih nia kan inhriat lai pawh hian kan pianthar dan a lo la chiang lo thei fo dawn niin a lang.

Salvation camping-ahte kan lut a, piangtharin kan chhuak a, nimahsela kan pianthar dan a fuh tawk lo fo niin a lang. Mi tam tak hi chu midangte sualna hmu tawk lekin kan piangthar a. Pastor leh kohhran upate meuh pawh an tlin lohna hre tawk velin kan chhuak a! Tunhmaa Krista leh kohhran avanga hrehawm tinreng tuara harsa zawng zawng lo hmachhawn tawh, a thim a var pawh sawi lova Krista avanga ke lo pen tawhte hmuh tlin lohna leh sawisel nuam ti tawk velin bul kan tan bawk a. Mi dangte chakna aiin kan chakna kan hmu thei a. Kan fel loh leh tlin lohna aiin kan rawngbawlpuite chak lohna leh tlin lohna kan hmu lian thin. Kan pianthar dan hi puitling tak siin a sawngnawi viau zel ni berin a lang. Piangthar tak takte hi chuan mi tlin lohna hre khawpin rinnaah an la puitling lo va, ni tin puitlinna kawng zawi zawiin an zawh zawk thin a ni. Ringtu nun chu zawi zawiin, nausen piang angin a thang lian tur a ni. Chutiang ni lova puitling saa kan piang a nih chuan piangthar ve tho mah ila piang sual kan ni hrim hrim mai.





Hetianga pianthar dan chiang lote hi chuan mahni thatna an hre ran a, fel ta viauin an inhria a, an tihthat an chhuang a, midangte chu an hmu tling lo thin a ni.

Rinna kawnga thang lian a, thlarau lam nun a fiah chhoh zel nan Thlarau Thianghlimin min khawih nawn fo loh chuan kan rinna chu a lo chuai a, kan chak lo va, harsatna hmunah kan ding zo lo leh mai thin a ni.

Ringtu puitling Thlarau Thianghlimin a khawih nawn fote chuan engkim an hmu fiah a, an hre fiah tawh thin.( IKor.2:15)

Han sawi zau deuh hlek teh ang.
Kan ramah vawi duai lo harhna a lo thleng tawha a lawmawm hle mai.Kohhran huang chhungah harhna a lo thlenga kan hlim a, kan lam a, mi tin lawmin kan khat thin. Mahse chutiang dinhmuna kan din lai chuan Joba lehkhabua kan hmuh angin, "Pathian fapate LALPA hmaa an inlan ni a lo awm a, Setana pawh an zingah a lo tel ve a."(Joba 1:6) a tih angin kohhranho hlimna karah setana a rawn inrawlh ve a, ' hemi thlarau chan hi Thlarau dik a ni em tih pawh hre hrang lo vin Kohhran puipa deuh deuhte pawh a ngaihna hre lovin kan hawi kan hawi ringawt fo va, chu chuan kohhranah inhnialna hial a thlen fo niin a lang. Chutiang hunah pawh chuan a bik takin Kohhran puipate Pastor leh Kohhran Upaten Thlarau Thianghlim khawih nawn kan mamawh lehzual niin ka hre thin. Thlarau Thianghlimin min khawih nawn fo loh chuan kohhrante tan chaw tha pek tur kan nei thei dawn lo a ni.





Zirtirna dik lo laka kohhranho veng him tur te, thlarau sual nena indonaa hnehna kan chan theih nan te Lalpa Thlarau chu inkhawih nawn tir fo a tul takzet a ni.

Ringtu leh ringlo mi nun chiang taka hretute chu Thlarau Thianghlimin a khawih nawn fote hi an ni a. Chung mite chuan engkim an hmu fiah a, nimahsela an ni erawh chu tuman an hre fiah si lo!(IKor.2:15)

Chuvangin thlarauvah ka awm em, thlarau zirtirin ka awm em? Thlarau Thianghlim hruaiin ka awm em? tih mahni inzawt fo ila, kan ringtu nunah kan fiah lova Kristian Thurinah kan ding nghet lo a nih chuan Thlarau Thianghlim khawih nawn turin Lalpa hmaah i tlu lut ang u.

Pathianin malsawm rawh se.

Post Bottom Ad