~Gilbert Renthlei
Pu Buanga leh Sap Upa te lo luh hma kum 20 velah khan India ram awptu British aiawha Tlabung leh Bangladesh inkar Chittagong Tlang Ram awptu T.H Lewin (Thangliana) khan Tlabung bul Sirte Tlang an tihah sawn a chenna tur liau liauin mizote chu in a lo saktir tawh a. Hetihlai hian amah Thangliana hi tlangval kum 33 vel chauh a la ni a, tlang thengthaw nuam taka a in bathlar vel aţang chuan mizo nula te tui chawi leh thingphur vel chu a thlir vauh vauh ţhin a ni awm e.
Chu'ng nula zinga pakhat Dari, Lungchem khua chu kha'ng hunlai nula lian pawl tak kha niin a ngo ber pawl a ni bawk a. Dari chuan Thangliana mit chu a la hle mai a, a puantah lai te rimin nileng lengin a ţhutchilh ţhin a. Mizo nulate chuan tlangval a nih avangin a ina kal chu tih enah an en lo a, pa ţhenkhat leh lal leh upate erawh chu a kaiţen velah chuan vaibel zuin nileng lengin an ti ti ţhin. Thangliana chuan Dari chu a ni telin a duh telh telh mai a, thilpek eng eng emaw pein a rim ta zel a. Dari nu leh pate chuan Thangliana chu duh viau mahse mi rel leh sawi hlawh a hlauh avangin Dari zawk chuan eng emaw chen chu mitmei a hmuh duh lo a ni. Chuti chung chuan kum 1872 kum laihawl vel khan an insawi rem ta tho a, 1873 kumtir lamah chuan fapa duhawm tak an nei ta a.
Thangliana chuan fapa a han nei ta chu a lawm em em mai a, Tlabung khawlaiah te chuan kaiin a lenpui ţhin a ni. Nimahsela vanduaithlak takin a kal thei ţan tihah chuan a boral ta hlauh mai a. An nupa chuan an tuarin an khua a har hle mai a, Tlabung khawlaiah te chuan an leng dun rak rak ţhin. Hemi kum tho kum 1873 kum tawpah hian mizo lal pasarih leh an ţhuihruai mi sawmpakhat te chu Calcutta-ah a hruai thla a. Mizoram leh Mizote chawikanna tur ruahmanna tam tak a siam te chu a rilru lo ang taka hekna tawkin British sawrkar aiawh hotute chuan Mizorama a kir leh an phalsak ta lo a, kum 1874-ah chuan a hmangaih em em Mizote leh a nupui Dari chu kumkhuaa hmu leh tawh ngai lo turin sap ramah a hawsan ta a ni.
Chutia a pasal duh takin tuipui ral rama inhmu leh tawh ngai lo tura a ta hawsan chu Dari chu a khua a har thei em em mai a. An khua Lungchemah let lehin nuthlawi a lo ni ta a, sap nupui hlui a lo ni nen fehnaa lawm tur pawh a hmu zo ve ngai meuh lo. Chutianga nun khawhar leh mi sawi sep sep a hlawh tak fo bawk si avang chuan pem mai te a duh ta a, a chhungte puihnain Lungsen pasalţha nupui sun tawh nen an insawi rem a, an innei ta a ni.
Thangliana chu sap rama a inbenbel leh takah chuan nupui a nei leh a. British sawrkar hnuaia a hna aţang pawh chawl tawhin upat lam a lo hnaih ve ta. Kum 1899-ah chuan a sulhnu chhuia pu Buangate ţhian dunin mizote zinga kum 5 lai hun an han hman hnuah lehkhathawn a dawng hlawl mai a, pu Buanga'n Mizoram chanchin a rawn hrilhna a lo ni a. A thu tlema zawng-
"Zorama i awm laia i huhang kha tun thlengin a la awm reng a, zoram dung leh vangah hian Thangliana hming hre lo an awmin ka ring lo. Upa deuh ţhenkhat chu a hring a hrana Thangliana an hmuh phak avangin an intithei a, chu'ng zinga pakhat i hriat chian em em chu Lalsavunga kha a ni. Kan va tlawh lai chuan a lo upa hle tawh a, kum hnih kal ta khan ani pawh a thi ta..".
Kum 1910-ah Major Shakespeare (Tarmita) hnen aţang lehkha a dawng ve leh a, "Henglai ramri hrul vela ro i rel laia i hriat ve ngei tur Vuta nupui Neihpuithangi thlalak ka rawn thawn a che. Kum 1905-a Mizoram ka chhuahsan lai khan kan pi hi a la hrisel ţha hle a. A thla la tura ka sawm ngial pawhin amahin a ţhu duh tlat lo a, amah aia upa hmeichhe pahnih nena a ruala lak loh chu a remtih loh avangin tihian ka laksak thei ta chauh a ni. He thlalak ka rawn thawn chhan che chu henglai rama mite hian an la theihnghilh lo che a ni tih hriattir che ka duh a, i lawm zawng a nih ka rin vang a ni pakhat bawk.".
Kum 1912-ah Shakespeare-a bawk hian lehkha a thawn leh a. Chutah chuan lal Seipuia a la dam thu te, Haulawng zingah chuan Thangliana hriat dam chhun a nih tawh thu te a hrilh a, "Mary Winchester mantute i biakna hmun Thenzawl te kha tunah chuan buh leh bal chin na'n an hmang tawh." tiin a ziak nghe nghe.
Hemi kum vek hian Zoluti hnen aţang pawhin lehkha a dawng leh a, "...engvang kherin nge maw ka pa duh tak, ka thlakhlelh ngawih ngawih kha min laksak a, fahraha min siam le tia ka ngaihtuah fo chu a chhan ka hre ta. Mizote chuan Pathian thu hriain an lo awih ta a, Kristian ţha tak an lo ni ta... Zorama ka cham chhung khan mizo naupangte nen sipai lema changin sapho nen kan indo lem ţhin a. Chu'ng sipai rual hotu lu berah chuan vaibel zu chungin ka ţang tawh tih chu ka la hre riai ruai...." tiin.
Thangliana chu a hriselna a tlahniam zel a, doctor pan a ngai ta fo a. Kum 1915 December thla chuan October thlaa pu Buanga'n Lungleia a ziah lehkhathawn a dawng leh ta a. Lalchheu-a lungdawha sa lu an tar tlar tiar tuar kara a (Thangliana) silai an la khai reng thu te hrilhin, "Heng mite zawng zawng aia nangmah hre rengtu ka ţhiante zinga mi chu hmeichhe fel tak Dari a ni. Dari chu Lungsenah a cheng a, helai tlangdung kum kal ta maia ka fan lai chuan a pasal chu a dam lo na hle tih min hrilh a. He putar hi damdawi hmanga chhan turin ka tlai hret a, a pawi hle. A pasal ruang bawha Dari ţap chu ka theihnghilh tawh lo ang. A ţah hla chhamte chu ka bengah a la cham reng a, fa an neih loh avangin amah hnemtu tur pawh a nei lo. Khawvelah hian amah chauha awm turin a pasalin a thihsan a ni.
A tukah chuan an vui a, Dari pasal hi Sakei kap tawh a nih avangin a thih hnuah Sakei thlarau chu a thuhnuaia a awm zel theih na'n an ai nghe nghe. Dari pasal ruang chu kawr ţha ber an haktir a, bang nghengin an ţhuttuntir a. A ţhiante chu Dari thlamuan turin an lo leng a, zu te an in a. Dari chu a pasal ruang hmaah chuan a ţhu a, thoin a pasal ruang an rawn bawm a hmuh chuan ţap chungin a vai a, a hnawt kiang ţhin.
Pawnah chuan mipa naupang zawng zawng thingfak kengin an awm khawm a, Dari ţap ri an hriat veleh chuan naupang te chuan an in chu an kal hual a, in hnuaiah an lut a, ban leh bang te chu an thingfak ken chuan an khawng ţhin a, theihtawpin an au a. An vaivut pal khuk te chu nasa tak a ni. An thiltih chhan ka zawh chuan tho te chu Sakei thlarau, Dari pasal thah tak te kha an ni a. Mitthi thlarau chu an rawn tibuai a, an hneh ngei nan vau a, hnawh bo zel a ngai a ni.
Lungchem khuate hi Kristian an ni deuh vek tawh chungin Dari pasal hian a dam chhung chuan sakhaw thar chu a ngaihsak ve duh miah lo a. A pasal thih hnu chuan Kristiante awm dan chu a ngaihven ve a, thla eng emaw zat kal taah khan Kristianah a inpe ve ta.
He'ng an chanchin te hi nangmah ngei hrilh tur chein Dari chuan min ngen a. Enkawltu tur nei loa tar thi mai tur tih i hriat chuan i khawngaih hle ang tih a chiang hle a ni." tiin.
Kum 1915 Krismas laiin Thangliana chuan pu Buanga chu lehkha a thawn let ve leh ta a, a thlalak leh Dari pek tur pawisa eng emaw zat a thawn tel bawk a.
Pu Buanga lehkha a hmuh veleh Dari chu Lungleiah chuan a va zin nghal vat a. A bik taka a tah puan ţha tak a keng a, a hnenah chuan hlanin ţha taka tuama a pasal peksak turin a chah ta a. Pu Buanga chuan a ngai pawimawh hle a, sap ramah a hawn thla a, Thangliana chenna inah chuan amah ngei chuan pek tumin a va kal ta a ni.
An in a va thlen chuan an awmpui chauh a lo awm a, Thanglianate nupa chu inentirin London-ah an lo kal daih a lo ni a. Dari puan thawn chu an awmpui chu a hlan a, engmah pawh sawipui thei ta lo chuan pu Buanga chu a haw leh ta a.
Hemi ni hi February ni 2, 1916 a ni a, Thangliana inentir zo hotel-a an let leh chu tlu sual zuiin tlai dar 5:10-ah chuan a thi ta mai si a, pu Buanga leh Dari puan pawh chu damin a hmu hman ta lo a ni.
Dari pawh chu tar tak tak a lo ni chho ve ta a, a khawhar lungleng chuan a pasal Thangliana nena an chenna hmun hlui Sirte Tlang te chu a fang fo ţhin a. A lo upat zel takah chuan a laina hnai Chalngenga chuan a inah hruaiin February ni 8, 1929-a a thih thlengin chutah chuan a awm ta a ni.
"Mi za tam mah ni se la,
Ka chuan ang dawnlung chungah,
Khu khu kawrvai Thangdanga lenna.." - Dari
A ngaihnawm hle mai, min vel nasa...
ReplyDelete