Mizo National Youth Front (MNYF) Headquarters chuan vawiin June ni 27, 2018 khan Tuikhuahtlanga Mizoram State Lottery office tlawhin, Director Pi Jennifer HL Duhawmi leh Joint Director Pu Zoramchhana te hmuin Mizoram State Lottery kalpuitu firm pali term tawp tawhte chu chawlhtir nghal turin an ngen.
He hunah hian Pu H. Ramdinliana, MNF Ṭhalai Vice President chuan, "Congress sawrkar chuan Mizoram tana hlawk lo thei ang berin kum 2012 aṭang khan Lottery a kalpui a. Chief Minister duhsakna dawngtu firm palite chu an agreement hun tawp hnuah vawi hnih lai tender thar ko lovin an term a lo pawhseisak tawh a. An term pawhsei vawi hnihna hi ni 29.5.2018 khan a tawp tawh chungin tun thleng hian an la hmang reng a ni," a ti.
MNYF Vice President chuan, "CAG report 2016 aṭanga a lan danin, kum 2012-15 chhungin Lottery aṭanga sum hmuh chhuah chu cheng vbc 11834.22 a ni a. Heta ṭanga Mizoram sawrkara Lottery distributor-te'n sum an chhun luh chu cheng vbc 25.45 chauh a ni," a ti a, "Kum 2015-16 aṭanga 2017-18 inkar chhung hi CAG chhui tel loh a ni a, hemi chhung pawh hian cheng vbc sing chuang fe a lut leh ang tih a chiang a, chutih laiin tuna firm palite inremna a siampui dan chuan cheng vbc 30 vel bak Mizoram sum bawmah a lut dawn lo tih a chiang a. Chuta ṭanga a tlem thei anga chhutin lum 2012 hnu lama Lottery aṭanga sum hmuh hi cheng vbc 20000 chuang a ni tawh a, heta ṭanga Mizoram sum bawma lut tur chu cheng vbc 50 vel chauh a ni a, hei hi a ṭha lo takzet a ni," a ti bawk.
Pu H. Ramdinliana chuan, "Hetianga a hlawk lo thei ang bera Lottery kalpuitu firm palite an term tawp hnuah pawh vawiin ni thlenga lottery an la kalpuitir zel hi thil dik lo leh sawrkar tana hlohna nasa tak a ni a. Chuvangin MNF Ṭhalaite chuan tuna an term tawp tawh firm palite an term tawp hnua Lottery a la kalpuitir reng hi a rang thei ang bera titawp nghal turin sawrkar kan phut a, Lottery-a eirukna lian tham tak hi CBI chhuitir thuai turin sawrkar kan phut bawk a ni," a ti bawk.
Mizoram State Lottery office kawtah hian MNF Ṭhalaite chu, Mizoram state lottery scandal CBI chhuitir tur te, Lottery distributor term tawp tawhte titawp nghal tur tein an au rual a. Vawiin MNF Ṭhalaite hi Pu H. Ramdinliana bakah Vice President Pu Lalremruata Chhangte leh Pu Lalzahawma Khiangte, Treasurer-te'n an ho a ni.
Source: PR
Source: PR
Post a Comment