Ten Chaw An NgheiMizoram Underground Returnee Association (MURA) leh Mizoram Pradesh Congress Committee (MPCC) nena inremna an siam tihpuitlin nawr nan MURA member ten ni 3 chhung chaw an nghei tawh a, sn thil phût a hlawhtlin hma chu chaw nghei an tum tih MURA President Pu PC Lalthuama chuan a sawi.

Pu PC Lalthuama chuan chaw an nghei chhung hian State Sorkar lam atang emaw Medical lam atangin emaw tuma’n an la tlawh lo tih a sawi a. Chawnghei mi 15 te chu kum 60 chuang vek an nih thu leh an hriselna lam pawh a that tawk loh thu a sawi a, an zinga pahnih, MURA Senior Advisor Pu Lalhmingthanga kum 76 leh Vice President Pu H. Lalrinawma te chu nimin atang khan an khua a sik tih a sawi bawk a. MURA President hian nunna thapa chaw an nghei hi Sorkarin an thil phutte a tihhlawhtlin hma chu chhunzawm zel an tum thu a sawi a ni.

Pu PC Lalthuama sawi danin, kum 1998 leh kum 2013 Assembly inthlanpui neih dawnah Congress party-nen inremna an siam a chutah chuan MURA member in hmun neite in sak tanpuina cheng Nuai 20 theuh sorkarin a pe ang tih te, sorkar hna 4th. grade atanga LDC thleng (MRHG telin) Mizoram puma MURA member tu leh fate tan post 200 sorkarin a pe ang tih te a ni a, hei bakah hian Contract/ immediate relief MURA-te intuam hlâwm nan sorkarin-a pe anga NLUP a rang lamin ram puma MURA-te pek an ni ang tih a ni.

Hetianga an inrem hnuah hian, MPCC chuan MURA hnenah hian lehkha thawnin, an thil phût point pahnih-te chu sorkar kalphung pangngaiah tihhlawhtlin theih a nih loh thu an hrilh niin Pu Lalthuama a sawi bawk a ni.-AIR News Aizawl

Post a comment

Powered by Blogger.