Aizawl khawpui chhunga sa zuar intelkhawmte chuan Myanmar atanga vawk lak luh awm thin ni a sawi chu khap nise an duh thu an sawi.
Myanmar atanga vawk lakluh hian vawk vulh leh sa zuarte vawi tam a lo ti buai tawh thin niin an sawi a, vawk hri leng a ziaawm tak avangin sa thianghlim zawrh tur an nei leh tawh niin an sawi. Aizawl city butcher association hruaitute chuan tun hnaia Mizorama vawk hri a len chhan chu Myanmar atanga vawk lak luh a nih thin vang niin an sawi a, vawk hri a lenin vawk vulhtute bakah sa zuarte pawhin nasa takin an tuar thin niin an sawi a. Aizawl khawpui chhunga vawk sa zuarte pawhin thla 2 dawn lai sa zawrh tur an nei loh phah niin an sawi a, Burma atanga vawk lakluh khap a nih laiin vawk hmanga eizawng hrang hrangte’n harsatna an tawk ngai lo niin an sawi.
Mizoram chhunga vawk thar chhuahin Aizawl khawpui chhung mai bakah hmun dangte pawh a chawm zo tawh niin sa zuar tute chuan an sawi a, hmun danga atanga vawk lak luh kher a tul lo niin an sawi a.
Aizawl new market-a vawksa zuarte chuan sa thianghlim ngei an zawrh theih nan theih tawp chhuaha tan an lak thu sawiin, new marketa sa zawrhna hmuna sa zuar hruaitu ten an member ten sa thianghlim an zuar ngei em tih chu an finfiah thin thu leh vawk neitute phone number te la in an vawk a hrisel leh hrisel loh te an zawtfiah leh thlap thin niin an sawi bawk a ni. - AIR News
Post a Comment