~ Zoremi Hmar Zote
(Hman deuh khan Lengzem chanchinbu kal tlangin zin turin min sawm laih laih a, ka ziah ngam, ka pêk ve ngam loh lai a ni. In ziahte ka lo chhiar zel a, ka thehlut ngam ve chuang lo; mi nuih kan tiza ang tih te kha ka hlau a. Tunah hian he group hi ka ṭiàl hnawk ve hrim hrim dawn hi a ni tawp mai a ni! In nuih ka tihzat tho chu ka ring deuh. Zin turin ka sawm ve hnuhnawh dawn che u! )
Aizawla awm i nih a, thingtlang boruak thianghlim hîp tura i pawnthuah i têl a nih rau rau chuan Ngopa lamah rawn zin teh. Kan khaw Sumo driver-te biak an nuamin an fel a, chuang ve dangte pawhin an lo be bawrh bawrh ang che. Seling khua in thlen meuh chuan khawtual mi ang hrimin an fiam tawh ang che a, Kawlkulha thingpui ina in chawlh meuh chuan Ngopa khua emaw i inti ve rum rum tawh ang.
Kawng a chhe tluang viau. Fùr laia i zin a nih chuan Sumo-in a phur zeuh zeuh chauh ang che. Khûp thlenga thleh theih kekawr hâk a finthlak ang. Saitual leh Tuivawl inkarah a changin in thâwl em em ang a, a chângin i lu chauh a che thei ang. Kawng a mâm nuam ve ṭan ta maw tih-ah Pâwlrang in thleng ang a, kawngsirah Nghah loh dâwr a lo tlar thliai ang. A man zât an ziah kha a bula Bûr an chhawpah khan khung mai tur a ni a, Dawn vak duh suh. Dawn a sawt lo!
Telpui pêm ang bùp búpa thâwm ngah chungin Tuiphal in tlàn pêl ang a. Lungding lo to lurh mai, rawn bungbu deuh kút kha hmuh ngei tum rawh. 'Bengchheng pêng' te pawh a awm tih hria la, zawt hreh hauh suh. Leisang kawng phei velah feh haw an kal zawi hnak hnak i hmu maithei. Mâu tiang hawla an 'heiha' dap dap ri te khan ngaihno zu bei ru tlat a!
I LO THLENG TA!
Kawtchhuah-ah in han ding ang a, Nuho thlai thar zuar an lo ṭhu pawr fiàp ang. An thlai zawrhte kha Zo leiṭha chàwm niin an hâng tui bik em em mai. Aizawla tel thum cheng sawmruka i lei tiat vel kha cheng sawmhnih man an nih ka ring. Khaw lam panin in tlan chho zél ang a, kawtchhuah chhakah mi ngo lo, patling ni si, ṭhang zo hman lo ang deuh a lo men ker a, rang deuh deuha a lu a lo hawi vét vet chuan Pu Ramtea (Sipai tê chi kha) tihna a ni ang. Midang a ni thei lo a, Pu Ramtea a ni tlat mai a ni. Patling hmai ung khek khawk; Sipai form hlui Iptepui atana ṭhui ak chunga lo tlângau kal ngáwk ngawk te, Naupang lu ther hîng hiang, thlawh loh Bapui ang maia lu buk lo tlan phe hlawk hlawk pawh i hmu maithei. Pitar pakhat, Satel hmawlh pêk ang maia Meizial pet kawh vú reng mai i hmuh fuh hlauh chuan Pi Khâwli a nih kha. A ṭawng pahin a Mei zûk pawh a bûk ngauh ngauh kha. Patlingin a lo siai deuh sak sak chuan Pu Lalpianga a ni leh mai. An pa a nih kha.
Belthleng leh Khuhhriang châwia naupang kal kun dê dê kha mak ti lo la, ṭhenawmte bai suah tur mai a nih kha. Maian têl pawm chunga naupang hmai fai lutuk lovin a lo en ker che pawhin a mak lo a nia. Ṭhenawmte Antêl inthartem kan la sim lo.
Thlenna chungchangah lungngaih tur a awm lo. A tu inah pawh khan Ar khual lawi chawt mah la a pawi lo. Hmelhriat i neih sa nual phei chuan an lo invultui chuh nàk nák mai ang che. Thlenna erawh thlang thiam la, kan khaw mi pangngai deuh Pu J.C Dailova te in te kha thlenna chi a ni. Pu F.Kaphnuna te inah te i thlen palh hlauh chuan i chàm chhúng Behlawi rep buhchiar leh Anthur tlak rin a ni mai. Fapa an nei tlâw riau khi erawh kan lainat hle. Chaw heh si, ràwn tlâk si loh leh vulh thau hleih theih loh fapa a nei a ni.
LENG CHHUAK VE LA....
Kan khaw Field awmna zawt chawt langin, pan thâwr phawt teh. A tlangah khan Khawthlir In kan sa a. A lêr aṭang khan han hawi vel chhin teh mah; Ni rawn chhuak hmuh ruala hmuh loh theih loh tlâng sâng zet kha Lengteng tlâng a ni a. Kan khaw Upate'n a hmingah 'Tlâng Lal' vuahin, "Chhûmin Tlang Lal a bawh chák chuan ruah a sûr dawn lo tihna a ni" an lo ti ṭhin. Hmâr lam han hawi hret la, Nauzuarzo leh Mutelèn tlâng i hmu ang a. A piah lawka Khàm inchhawng, chhawng li vel delhin Sûr tlâng a lo ding zum vúrh ang. Thlang lama i inher leh hret chuan Tuivai a lo mu paw raih ang a, Tuivai lui chungah chuan khawthlang tlângdung ṭhen phawk khawpin Hriangmual tlâng a lo awm leh ang a, Chhim lam i hawi erawh chuan thurualpuitu tlâng nei ve lo niawm fahranin Vanchungbung tlâng a lo Lawi thluk vùm din leh nawlh mai dawn a ni.
Khai le! Khawthlir i duhtawk chuan chhuk la, kawngpui zâl nuam deuh hlek lo awm kha han paidal phei langin; Sikul i va pawh ang a. Kha Sikul kha he thu ziaktu panlai nun hmanna, mi tam tak an inzir chhuahna hmun a nih ve bêih bâwih kha! Inher la, Hmar veng lam panin chhuk teh. Leilung thâwm ngaithla bik deuh anga lang, ding thlêk deuh húr chunga kal nui vùr vur, a ke pen leh a bân vai intu fahran lo Tlangval Tawia i hmuh ngei ka ring tlat! Kan khaw rohlu a nih nelh nelh kha. A din chilh chut che a, "Khaw'maw hman chawp tur tlêm mi lo puichhuah teh" a tih che chuan Pawisa a dil che tihna a ni. Rs 10 lek i pêk chuan, "A laklawh" a ti tlat dawn. Chuvangin Rs 10 tlang pahnih phawrh nghal a finthlak! Tin, i lawm tur a ni. Mikhualah pawh sum neih hmel deuh lo chu a dil ngai bik tlat lo! Lr Fanai te, Vanhminga te, Pu Lalrozama, J.E Zama kan tih mai te ang chu a dil ngai lo. An hmelin a support lo!
Mualveng lam te i tla thla a, Sapthlengliana te in i kal pêl a nih a; "Nu-i a sa kha han suah belh teh" a lo ti lùng lúng ri i hriat khan mak ti suh. Dawlṭawm bak an suak ngai lo, a tih ve dan a nih kha. Ṭhenkhatin "Ka hre dah law maw?!" Tih melha an melh lai chein hmanhmawh zeta Nutling Ration la haw lamin an Ui pân pelh mai mai bawk ang che a. Kawn veng Dawrkai hlun Malawmi vin tuarh tuarh ri te kha hlauh loh tur. A tihdan a nih kha! Ho té-ah pawh a Nu ṭing bo àn chiam zel a nia! Ngopaho chu kan ṭawng a bàkin thu kan uar em em a, tumah kan thinrim chuang lo a nia. Pawngpaw mi â buhhawp hlauh ngawt tur kan ni lo. Keimahni aia ringa min fiam ngam hun hun nuam i tih hun! Patling nilum êl puak chunga an titi te kha a ngaihnawm ṭhin a nia.
Lalthawma venga i Bazar tak hlauhin, Serṭawk an lo vawm thal phung a nih chuan, "Khawimaw in Serṭawk chu?" Ti suh! Sâisèr kan ti tlat pek! Bahkhawr têl lek vú paha "I bahkhawr hi eng zât man nge?" Tih pawh a fuh falua lo vang. "Bachikhawm" kan ti daih a nia! Bawkbawn, Changkha, Samṭawk leh Berul ilo fahran kha an hming mala sawi nulh nulh lovin, "Rahno" han ti mai la, "Lêngser" ti tawp lovin "Lêngmaser" han ti deuh duah bawk la, mikhual bright i ni mai!
Khawlaiah Zâwng hnuhnung ang láwp lâwpa Tlangau Roṭhianga kal i hmuh chuan, kuhva han ṭheh chawt mai la. Beng thleng dawn dawna nui pahin "I va'n fel berrrr" a ti chiam ang che. Ngopa ṭawng bik mak tih i neih nual zingah, 'Berrrrr' tih te, 'Siiiiii' tih te hi an langsar bawkin ka ring. "Deuh veiii a na" tih ngawt te kan ching! Hmelṭha an tih che chuan, "A va hmelṭha êm!" Ti mai lovin, "A hmelṭha siiiiii" an ti ang che. Siiiii lai khi ri sâng deuha lam tur a ni.
Sawi tawh angin Pa thlêng tlâng tlawrh deuh ina thlen nachang i hriat phawt chuan, Tuila Sangha hâng fân raih mai te i tem ngeiin ka ring a. Tuivai chengkawl kawr hriam hraih mai, hâng ngap ṭhak mai leh tui danglam bik em em mai te kha Ngopa-a i zin i inchhir loh nachhan tur an tling. Kan khaw Hruizik kha khawi khaw Hruizik mahin an tluk lo! Samṭawk leh behlawi tui bik zia chu sawi ngai lovin i hriat tawh kha.
LO ZIN LEH RAWH AW....
I haw dawnah zing hmâ takah kawtchhuahah Motor i chângin ka ring a. Hnathawka Vaithlakawn lamah te, Berhtlang lamah te an liam sap sap i hmuh khan mak ti suh. Ngopa khua chu kan taima a nia. Zin leh ngei tumna rilru nena in tlan liam lai hlim taka an vai lauh lauh lai che-a i hnuk a ulh deuh a nih pawhin kan dem hauh lo ang che. Lo zin leh mai rawh!
Post a Comment