~ Zoremi Hmar Zote
Nupa hi chu han intih thiam loh chang a awm fo a, intih thiam em em châng a tam zawk. Intih thiam châng tam tak karah hmeichhia kan tlan chhan hi chu intih thiam loh vang zawk hi a ni ziah pek a! Dam chhunga vawi khat mah inhau lo, an nupui tlan lo leh intitau miah lo hi chu an tam thoin ka ring a, intitlân fo pawh an tam ka ring tho. Kan chhungte lahin min hau nasa a, "Inti thiam lo rual in ni tawh lo, kum hei leh chen in innei ve tawh a, in fate pawh in tiat tawh mang lo a ni a, la intih thiam loh fo mai" te min ti. Intih thiam loh ṭhat loh zia min fah paha, inti thiam hram hram tura min rukru zilh nek tawk lah bo lo!
CHUNGCHANG
Hei kei pawh hun rei tak mai ka'n nuar ve sasawi a ni a, "Ka nei tawh lovang, ani lo pawh ka hmu...ka kir tawh chatuan lovang" tih tùn tún chhungin hun a liam ve zel a, karah fate an lo awm tawh a, naupang, nu mamawh rual lek an la nih miau avangin naupang chungchang sawi dun ngai thilah pa ber a rawn leng ta fo a, hun a liam zel a, naupang khan chungchâng an ngah ta tulh tulh mai a! Tichuan, naupang chungchang chu kan sawi dun ta deuh fo mai a, a pawimawh si avangin pa ber chu a rawn leng ta tlut tlut a, fate chungchang a nih miau avangin kei pawhin ka lo hnar a thiang bik lo, naupang chungchang kha a ni tlat zel a ni! Naupang chungchanga sawi hmaih hi a nei nitin deuhthaw mai a, a lo kal a ngai leh nge nge ṭhin. Tin, naupang chungchang hi text leh phone call-a sawi mai chi hi a lo awm mang lo; A lo kal kher kha a ngai deuh ziah mai a! Naupang chungchang sawi tura Bazar lama kan inphurh chhuah láwp lawp chang a awm a, naupang chungchang sawi dun tura Scooty chhia kan siam dun tak daih lah bo lo! Eng pawh ni se, kan lunglen vang emaw, kan inngaih vanga inhmu ziah kan ni lo va, naupang chungchang vang chauhin a ni, kan inhmuh ṭhin ni! A chang chuan naupang chungchangah pu zawnte carpet thlakpui te a ngai a, naupang chungchanga pu zawnte ina han inbual hluah te a ngaih chang a awm a. A subject nen a inpersan ve fo hian ka ring ṭhin. Pathlawi ka iai thu ka lo sawi ṭhin a, nuthlawi a duh bik loh thu leh a iai ve tho thuin min chhang ziah a, Mahse naupang vanga inhmuh ziah a ngai tlat bawk si a ni!
INKOH LEH A BEHBAWM
"A, tihian kan buai reng tho a, nang pawhin pasal a chhia a ṭha nei leh duh pawh ni la naupang vang hian i rilru a nuam thei tak tak dawn chuang lo vatt" tih vel aṭanga ṭanin, min koh a sawi ta zuk zuk roh a. Ka'n ngaihtuah a, naupang chungchang a la ni pha deuha ka hriat avangin aw ka vinin ka chhawn bik lo. Naupang hian chungchang an la nei chho zel fo dawn tih ka hria a, ka hrin, ka hmangaih an nih miau avangin an lakah ka nêm zel lo thei dawn lo tih lah ka hria. Engtin tin emaw min thlem chho zel a, "I tel lo chuan zinga êk ka harsat" tih vel mai mai aṭanga ṭanin, "I awm loh miau chuan 'Nu-i' tih tur an vâng lutuk, kawmchhak nu lah nu-i ka ti ve ngawt ngam si lo, tin, mi nupui 'Nu-i' lo tih ve ngawt kha a inhmeh lo em em mai a, nangmah hian 'Nu-i' ka tih hi i inhmeh ber, a remchang bik riau" te a tiattt... "Nupui neih ka rilruk deuh a, duh deuh mai ka nei a" a'n ti leh aaah, meng shala tùn chungin tunge ka lo zawt var a, "Zoremi kum 32 fit 5'3" kg 55 bawr vel" a ti leh nulh a...heti reng reng chuan naupang vang chauha ka haw a ngai ngei dawn tih ka hria. Ka tel lova muthilh har a tih zia te, a office bâng a hrilhhai zia leh, engmah nuam a tih loh thu a sawi mual mual lai chuan *naupang vang chauha haw* ngei ngei ka ngai tih ka hria!
LAWI ṬHAT NAWN ZAN CHU!
Chutia a siruk la takmeuha min ko tura an rawn thawh thlâk takah chuan, mamawh dang nei lo, naupang vang chauha haw tur anga lang nasa thei ang ber tur chuan, hreh hmel deuhin ka insiam ta a. Whatsapp lama pa ber message, *in rawn chho dawn tawh em?* tih te chu, 'chhe keh' tih ringawt te khan ka'n reply vel ahh! Kan inneiha ka lawi ṭhat zanah khan kan pa hi vawi 4 ngawt ka chibai tih hi ṭhenkhat chuan in hre tawhin ka ring a, lawi nawn zan chu a ki a dang ta raih mai. Room kan han lut chiah a, khuma bawh thlawp pahin, "Ka peih lo a nia" ka'n ti ngawt a! A eng chu nge ka peih loh pawh min zawt chuang lo chuan "Aw le" a ti ve ngawt. Zahzela "Khum te hi a va ngap em em ve" tih te, "Eng nge khum hnuaiah pheikhawk i dah ziah" tih vel aṭanga àn-na tur ka zawn ngial paw'n a nuthlawi hnute dek nuih vur vur duh chauh mai a. Haw zan te a nia, han inhauh deuh ka chak tehlul nen, min puak muthilh a tum lo chauh a ni si a, thinrim rei a har khawp mai. Han meng rum ngial mah ila heh thlah duai hian a nui lip vùn reng mai si a, fate vang chauha haw ka nih zia lantir nan, a zawm ngei ngei tur dàn khauh tak sawmhnih vel zet zam pah chuan ka'n melh deuh khái khâi tak na a, kaihbu khak tlukah pawh a ngai lo tih ka hre reng mai. Thlang lam hawia saisir zawnga muhil tura ka tih hial pawhin a inlet nui vur vur tho mai a, lu pân nei se, kuk sak fawk ila ti rilru chung chuan lehlam hawi chuan ka mu ve ta. Inneih hmasak zanah hnung tawlhin khumah eng tin tin emaw ka inrawlh lut a, lawi hnuhnun zawkah pawh lehlam hawi san tho a ni. A lungawi loh phah lo!
MO THAR LIFE
Mi mo thar te chuan zing thawh hai an hlau a, an pasalte an inkaihthawhtir tak ṭâwk ṭâwk a, keia mo thar ve chu dar 7 a rik vuh tawh pawhin khumah whatsapp group ka la lut kual zut zut a. Ka tho va, "Khawiah nge in chi bur?" Tih kual vel a ngai lo; chi bur awmna aṭanga perek dahna thlengin ka hre sa vek. Istiri dahna leh Khawlla awmnain min tibuai hlek lo. Ṭhenawm khawveng lo leng lut lo ko nghal nalh nalh thei mo, pasal chhungte min hmelhriattir chawp ngai lova mi kawng kal lo ko zuap zuap thei nghal, retailer awmna zawh chawp ngai miah lo, Biak in kawng short cut thlenga hre bel vek leh gas card sl no thlenga by-heart hneh lutuk tawh mihring hian, tlan fo erawh a finthlak falua lo tih ka hre chhuak!
EM EM A!
Fel taka ka thleh thlap ṭhin, awmze neia ka rem thlap ṭhin wardrope ka'n hawng a, Taliban ho hnuhma a nih loh vek chuan valtea pa sulhnu a ni chiang lutuk tih hai rual loh hian, bomb puahna hnu niawma mawi hian kekawrte leh T-shirt te, thing nawr mamna khawl leh Polar kawrlum te chu an lo naupaw tlu mut phung mai a! A kawppui hmuh tur awm miah lovin kil tinah mawza an lo thal phung bawk a. Ka chek tlawk tlawk a, a office kal tur rawn lut leh zuaiin ka hmel a hmuh chuan lài fahranin a'n faifuk ahh! Chhuak leh ngawt hreh si, ka thinrim hlau bawk si chuan, "Heng te hi tu lo dah nge mawni le...hei hihhh...hetah a lo awm reng a nih hi, ka zawng ka zawng a" tih te, "Hei hi chu ka khawih lo, ka dah a ni lo, tunge maw hetia lo tihnawk chiam ṭhin ni?!" Te a tia! Tumahin a hranpain kan room hi an va tihnawk dawn lo tih hi Valtea nu ka nih ka chian tluk zetin ka chiang! Ṭawng pawh ka ṭawng thei lo. Ka thinrim lutuk hi ka va inkawm luak nghek dawn emawni ka ti hial a ni. Chutah pheikhawk dahna ka'n en a, a pheikhawk reng reng, a inkhing thlapa inrem pakhat mah a awm lo! A ṭhen Face towel-in a khuh a, a khing lehlam chauha mawza awm, a lehlam awm lo hrim hrim te, lu mehna khawl hrui leh pheikhawk hrui lo inkuah chual mai han hmuh te chuan ṭah vak tak hi ka nâp! Khum hnuai ka'n bih a, polythene ruak leh mawza, bottle chhin leh nawhfe chhia. Slipper khing, Alu pum hnih leh Cycle ke pump-na. Kekawr bul leh calendar chhe phel! Em em a!
Nu ho kha, tlan ve duh suh u....haw hunah tih tur a tam duh lutuk....nilenga tihfel pawhin ṭah chhuak chiah kan la hlawh! Insuk tur a tam uchuak tlangpui a, mo thar mah ni ila kan intuaihnûm hman meuh lo. Mo thinchhia, mo àn cheh, mo phunchiar nih kan duh loh chuan, tlan fo loh a finthlak! "He bai hi kar engzat nge ni tawh?! Tih paha bêl chawi chhuah vu vu te, "Ka thleng hruk hulna bik towel hi eng vanga Petrol rim nam nge a nih?" Tih vel sawiin, nilengin kan phar buai a, chauh a na bik. Tlan ve duh suh u!
Post a Comment