~Vanlalthlana
Tony Blair pawh kum 43 a nihin
Prime Minister atan lakluh a ni.
India ramah pawh state hmasawn
duh thenkhat chuan hruaitu atan
thangthar viak tha an thlang ta.
Arunachal Pradesh Chief Minister
Pema Khandu pawh 2016-a an lakluh
khan kum 38 a ni. Assam Chief
Minister Sarbananda Sonowal chu
2001-a MLA-a thlantlin a nih khan
kum 40 mi a ni a. 2004-a MP atan
thlantlin a nih khan kum 43 mi a ni.
Kum 53 mi a nih chuan Union Minister
of State - Independent Charge
a ni tawh a, kum 55 mi a nihin
Assam Chief Minister a ni leh a ni. Pakhat chiah sawi leh ila. Meghalaya
Chief Minister thar Conrad
Sangma chu March 2018 khan
Chief Minister atana lakluh a ni a,
kum 40 mi a ni.
Khawvel ram changkang tak takte
leh India ram state thenkhatten hruaitu
atana thalai viak tha an duh
chhan hi sawi tur tam tak a awm a. A
khaikhawmna pakhat chu, heng thalai
viak tha hruaitute hian hna an
thawk chak a, an ram/state tan hmasawnna
an thlen nasa a ni.
Tunlai khawvela ram hruaitu
atana thalaite thatna leh mipuiten
an duh chhante kan ngaihtuah
thiam nan engemaw chen kan
sawi dawn a ni.
1. Change an pawm a, change siam
an duh Thalaite chuan khawvel
danglam chak tak hi an pawm a;
kalphung hlui changkang lo zawkte
siamthat a, change thlen tir an duh
a, chumi atan chuan ke an pen thin.
Thalaite chuan change harsa tak
pawh nise, thiltha a thlen dawn
chuan huaisen takin thlak danglam
tumin hma an la ngam a, a eng zawngin
thil an thlir tlat thei a ni.
"Hruaituah rau rau, kum upa, mi
senior-te aiin thalaiten 'change'
siam an chak zawk thin."
2. Inpekna a thuk Thalaite hi hruaitu
an nih chuan an inpekna a thuk
tlangpui thin a. Kum upa tawh, titha
vak peih tawh lo, kalphung ngaia kal
bek bek duhte aiin engkimah an inpekna
a thukin, hmasawnna atan an
tha leh zung an seng phal thin. "Hruaitu
senior chuan midang nawr kal
an tum a, thangthar zawkte chuan
anmahni ngeiin hma hruaiin, midang
hnuh kal an tum zawk thin."
3. Thangtharte chu hruaitu an nihin
mite ngaihdan an ngaithla duh thin.
An hnathawh danah midangte ngaihdan
hriat an duh a, midangte thusawi
atanga insiamthat an hreh lo fo.
"Hruaitu senior-te erawhin midang
ngaihdan an ngaithla tha duh tawh
lova, an thiante thusawi pawh an
awih duh tawh meuh lo. Tawn hriat
nei tam tawh, experience nei tha an
inti a, an intifing a, an ngaihdan an
thlak thei meuh tawh lo thin a ni."
4. Hmasawn zel an duh Thalaite
chuan hruaitu an nihin anmahni
nunah leh an hnathawh danah
hmasawn zel an duh thin a. Hna
an thawh pawhin tha zawk leh
changkang zawka thawh dan tur
an ngaihtuah reng thin a. Quality
tha zawk leh felfai zawka
hnathawh an duh thin.
5. Hlawhtlinna sang tak an duh
Thalaite chuan hlawhtlinna
(achievement) sang tak hmuh an
duh a, an thiltumte tihlawhtling
turin an theihna zawng zawng
pawh an pe hreh lo. Ram hruai
hnaah emaw, political party-ah
pawh nise, tuemaw rei tak hruaitu
a nih reng a, a kum a upat
hnu thlenga a mawhphurhna ngai
a chelh reng chuan a thiltih ropui
vak lote pawh a lawm tawk viau a,
thil awmdan pangngai chu tha
tawkah a ngai tlat tawh mai a ni.
6. Tum lian tak an nei thin
Thalaite chu hruaitu an lo nihin
tum (goal) lian tak an nei fo thin a.
Kum upa, mi senior tawhte erawh
chuan tum (goal) sang tak neih an
peih tawh lo va; hah lutuk leh beih
nasat an zuam lo va, hlawhchham
palh an hlau a, thil lian tham tih
dawnin a hlawhchham theihna
lamah rilru an pe lui tlat thin. Awle,
tunlai khawvelah ram hruaitu
atana thangtharte chakna leh theihna
hriatthiam leh hmuh thiam hi
a tangkai takzet a. Heng thalaite
chakna hmang thiam ram leh
hnam chu an thang zawt zawt mai
dawn a lo ni a. Hruaitu atana 'mi
senior' te duh tlat hnam chuan
chak taka hmasawn an beisei thei
lo ang a, 'change' lian tham thleng
tur an beisei thei lo bawk ang.
He zoramah pawh hian thalaite hi
hmanruaah chauh i hmang lo ang u.
Hruaitu tak takah i siam ang u. MLAa
tlin tamna atan ringawt em ni thalaite
thehchhuah kan tum? Mipui
nawlpuiin hruaitu atan thalaite an
duh tawh tih vangin MLA-ah kan
theh chhuak ang a.Sorkar siam
hunah hian Chief Minister leh Minister
nihnate chu change thlen tum
lem lo, ram tana beih nasat pawh
tum tawh chuang lo, a pang- ngaia
kal duh 'mi senior' te kutah kan dah
leh vek mai ang em?!
Kan ram mipui rilru sukthlek thlirin
State inthlan lo awm turah pawh
hian candidate atana thalai hnawltu,
mi senior-te theh chhuak ho tan
chuan campaign a har talh ang le.
Thangthar lakhawm lo chuan vote
a lakhawm lo ang tih hi thlasik
anga khêl lo a ni. MLA neih ngah
nan chauh thalaite kan thehchhuak
ang tih a hlauhawm. Sorkar
siam hunah senior ten hruaitu
nihna an chuh leh vek chuan kan
ram a kal zawi leh hnuk ang a.
Hmasawnna a kal chak leh thei lo
ang a. Mipuiten ram dang leh
state dangte rualawt takin kan
thlir leh ngawih ngawih ang tih hi
a hlauhawm a ni.
Change tum tawh lo mi senior-te
hlirin thuneihna sang an chelh leh
chuan sawrkar a tuan fum leh ang
a. Kalphung pangngaiah an lungawi
leh ang a. Miten hma an
sawn duai duai laiin kan ekna
ngaiah kan e reng mai ang tih a va
hlauhawm em.
Hruaitu atana thalaite kan chhawr
loh chuan ramin hmasawn loin, hruaitute
zawkin hma an sawn ang a.
Kawngpui tha si loin ram hruaitute
In leh Motor a tha ang a. Ramin leiba
a ngah ang a, ram hruaituten sum leh
pai an ngah thung ang. Hnathawh
leh mawhphurhna aia nihna ropui
leh lalna ringawt atchilh hruaitu kan
nei ang tih hi hlauh tur a ni. A tawpna
atan chuan, ram hruaitu atan
ram changkangte leh India ram state
thenkhatte angin ram (state) hruaitu
lu ber ber atan thangthar viaktha leh
thahnemngaite i chhawr ve tawh ang
u.
Inthlanpui a lo zawh hunah pawh,
hruaitu atan thangtharte an tha
tawh zawk tih pawmin, Chief Minister
mawhphurhna te, Minister
mawhphurhna leh sorkara mawhphurhna
pawimawhte thangtharte
kutah i dah ve tawh ang u
hmiang. Thlen chin atanga hmá-
sawn zel i tum teh ang u.
Post a Comment