~P.L. Liandinga
Aizawl ka hriat ve
chin chu ram buai
hlim 1966 July
thla atangin a ni.
Kan Aizawl lut tur
ve kha convoy motor (a ruala
motor tam tak inzui tlar)-ah
chuangin Serchhip atangin
tukthuan eikhamah Aizawl
panin kan chhuak a. Fur lai a
ni a, kawng kha alkatra luan
a la ni bawk si lova, Serchhip
khawlai atang reng khan a
diakin motor kha a insawi
luai luai mai tawh reng a.
Din leh kal kan fawm a ni
ber a, Assam rel tenau ang
maiin kan kal dawn chauh
emaw tih hian kan ding a,
kan kal leh lawk mai dawn
emaw tih hian kan ding reng
zel a. Chu convoy-ah chuan
sipai motor One-tone kan tih
te, Shaktiman kan tih te,
Bedford (mimal ta) te, Armoured
car te a inpawlh
chuat a.
Ka hriat sual loh
chuan khatih lai khan Bedford
kha mimal motor neih
theih lian ber ni ta tlatin ka
hria. Mahse tunhnua ka’n
hriat leh hian Bedford kha
Two-tonner (ton hnih, quintal
20 phur thei) lek a lo ni ta
awm e. Keini naupang a
thuchang kha chuan eng
tiangin nge khang motor kal
dan tur kha an rem kan lo
hre ve hlei lova, kan inzui
nguah nguah mai ni khan
kan hria a. Ram buai lai a
nih avangin tunhnua ka
ngaihtuah leh hian sipai
motor leh civil (mimal motor
or Bedford) motor te kha
awmze nei takin an rem
inkarthlak ka ring ta.
Tichuan Serchhip atanga
tukthuan eikhama Aizawl
pana kan kal ta chu kawng
khuar leh diak nalah motor
tang tawk a awm reng a,
theihtawpa kan kal chung
khan Chhekhnai (tunhnua
New Serchhip an tih)-ah hian
kan riak ta mai a. Serchhip
Bazar atanga nilenga
Chhekhnai thlen hman
chauh chu ninawm ve tak a
ni. Chuta tangin kan kal leh
ngat ngat a, Chhiahtlang kan
ban leh tawk a. Chutiang hlir
chuan Serchhip atang chuan
ni sarih leh zan ruk chhungin
tlai dar thum velah Aizawl
sipai lammual bulah hian
kan chhuk ta a. Khatiang te
ka ngaihtuah chang chuan
tunhnuah motor pangngai ve
deuhva ka chuang hle hle te
hi vannei ka inti thar leh
thut a, ka thu mai mai te hi
mi hriat lohvah ka lo intithei
a, ka thuthmunah ka lawm
thar leh fo mai.
Khatihlai vel khan tui chawi
leh tui khai vel nan tin killi
nei, khawnvartui emaw, tel
tin emaw ruak ang chi bak hi
ka hmuh awm pawh ka hre
lo. Aizawl khawpuiah Bedford
motor hmang khan tui
sem a ni thin a, chhungkaw
khatin tui tin li zel a dawh
theih tlangpui tain ka hria.
Mahse a mihring tam dan a
zir leh a tui awmdan a zir te,
chuh chak dan a zir tein chu
aia tam pawh motor-in a
rawn sem kha kan dawh thin
a. Mitthlaa tui lo thleng
dawh tura kan han innawk
rup rup mai thin khan tunah
chuan lung lung a tileng ta.
Electric Power House bul
atangin Sikulpui (Boys ME
School)-ah sikul kan kal a.
Ke lawng khan sikul naupang
kha chhim lam sikula
lut leh hmar lam sikula lut
kha Bazar pheiah kan intawk
phei zut zut a. Ke a kal kha
awmdan phung pangngai a ni
a, Town Bus la chhuak hek
lo, Bus Stand pawh a awm
lova, Bus hrim hrim pawh a
awm hek lova. Taxi phei chu
tlai khaw hnua lo lang ve
chauh a ni. Eng lirtheia
chuan man beisei lovin thawl
takin kawngpuiah a kal theih
a, min tlan peltu motor a
awm zeuh zeuhva, kan lam
pana motor lo kal a awm leh
zauh bawk a. Thalah chuan
motor tlanna chu a khu rum
rum zel a, mahse mak pawh
kan ti lova, hrehawm tih
enah pawh kan en lo, thil
awmdan tur pangngai ve rengah
kan ngai mai.
Bazar Bungkawn kan lo
thleng a, sipai damdawiin
velah far kung a lo ding a,
kan han kal zel a, Mandir
kan han pelh phei chuan
Assam Rifles ramah leh tuna
AOC awmna ruam (chutihlai
chuan helai hi kawr ruam)-
ah te nawhalh thing a lo ding
zen thulh mai a. Treasury
bungpui a lo zar duai a, kan
han pel leh hret a, Governor
bangla tualah far thing a lo
ding leh thuau thuau a,
thlanglamah Pawnpuite In
a’n awm vang mai a. Chung
kan kal pelh chuan Bible
House (BSNL) pheiah tlaizawng
a lo ding tlar thiai a,
chumi piah lawkah lungrem
sei leh Sabinga lung a lo awm
a. Sabinga lung hnung lamah
chuan far thing te a ding liah
luah hlawm a, chumi piah leh
kawng chhakah thung chuan
sasaw thing leh khawkherh
leh thing dang a lo ngaw
khup a. Kawng thlangah inngaihtlawm
hmel takin vai
sikul a ding ve va va a.
Sikulpui step chho kha a va
zau nuam tak em aw! Khatiang
step zau leh ropui kha
a tam lo. Hmar lama Govt.
High School Step kha a ropui
leh chu a ni deuh mai.
Khatih lai kha chuan thil
zuar reng reng kha chuan
chana leh badam an zuar
tlangpuiin ka hria! Newstreet
chhukthla veilamah hian
rangva sethlam in zim te teah
thingpui dawr a awm
thliah a.
Khatih laia ei theih
tui ber chu bawngsa kan kha
niin ka hria a. Paratha hi a
la awm chiah pawh ka hre lo.
Newstreet chhuka thingpui
dawr pakhat hi ka mitthlain
ka hmu reng mai, a nghaktu
pitar khan a thutna sawn
miah lo khan thingpui a siam
a, a thil zawrh engkim a suak
a, min la chhawp thei zui!
Post a Comment