Amtea Chhakchhuak
Music video siamna atan hian sum hi seng tam lua thin lo mah se, budget tam tak neia siam te aiin a rawn tichhuak pui leh tlat bik zel hi zaithiam dangte aia a danglamna leh a chungnunzia a lang. Kum 2018-a a single music video hmasa ber tur chu Amtea Chhakchhuak chuan Nilai zan khan Local TV kaltlangin a tichhuak ta. A music video hi 'Adonai (Ropui Ber)' tih a ni. Hei hi Portuguese hla atanga lehlin a ni a. Hla cool leh dul deuh beisei tan erawh tihsual a awl khawp ang. Hla dang tam tak te ang lo takin, style inthlak kual reng ang chi niin, hla pui te-nau hi a ang ber ang. Adonai (Ropui Ber) — hla ah hian Amtea hian Choir Leader a nihna — Mizorama show choir hmasa ber — M Choir tia sawi, Mizoram Choir chuan an pui a ni. 


Amtea chuan, "Kan buaipui chhung pawh a rei khawp mai. Chutih rualin a result-ah ka lawm a, buaipui rei deuh man pawh kan tel niin ka hria." "A hla hi Roma (Rokunga Rimawi Tukrun) in a produce vek a. A demo a ngaihthlak atangin tudang mah khawih a phallo nghal a. A music recording engkim hi a duh ang thalin a khawih vek a ni," tiin a hla chungchang an buaipui dan a sawi. A music video hian Mizoram music industry tih hmasawnna'na pen khat pen hmasak duhna chuan music video siamtu leh Amtea te ngaihtuahna hmun khatah an cheng dun niin a hriat a, he an music video hi 'drama theater concept' hmangin 'dramatic' thei ang berin an buatsaih a. 


Andrew Lalbiaknunga Ralte kutchhuak hi a danglam bik zia kan hmu. 'Adonai (Ropui Ber)' music videoah hian lam thiam tak tak kan hmu. An dancer-te hi Ramhlun North Thalai te an ni. An lam choreograph turin Synod Choir music video-a an lam dan turte pawh lo zirtir tawh tu, Bawngkawn tlangval Ahriata leh zuitei te'n an lam dan tur engkim an duang a, an zirtir nghal bawk. Amtea chuan sawi chhunzawmin, "Nidanga ka video nen tuna a thar hi a inan lohna tam tak a awm a. Chu'ng zinga pakhat chu, he video ah hian midang inhnamhnawih an tam em em a. Hei hian keimah ngei pawh min tihmasawn a ni tih chu phat rual a ni lo," a ti a ni. 

He a single video thar hmaa a music video hnuhnunh ber kha — Ka Hming A Hria — tih a ni. He music video hmangin Amtea hian 'Lelte Music Video of the Year 2018' a dawn phah a, dawng awm reng pawh a ni. A official music video pahnih — Ka Nghing Lovang leh Ka Thlang Ber Che — te pawh khan music video tam tak lakah a chungnung larh bik a. Hetih lai hian, a music video production budget hrim hrim hi midang te aia sum sen tamna hi a ni leh ngai chuang hauh lo a. Music video siamtu thluak ringawt lo deuhah a innghat niin a lang a, idea nei sa thlapa inbuatsaih a, a inruahman lawk thiam tih a lang. 'Adonai (Ropui Ber)' music video pawh hi budget sang tak a ni lem lo. 


Amtea hian tuna a music video thar tihchhuah chiah bak project dang a la tih hlawhtlin ngei tur pawh a la nei cheu a. Hei erawh hi chu tunah rih chuan sawi thui vak a la duh lo. Hetih lai hian, Amtea hian YouTube lamah channel changtlung tak a nei a. A music video thar ber erawh hi chu a channel lamah a la phochhuak mai lo deuh ang a, tun atanga thla khat hnu velah chauh kan hmuh theih hmel. Chutih rualin, a channel-ah chuan a music video release tawhte hmuh tur a awm a, lyrical video pawh tihchhuah zel a la tum a ni. Lo tlawh ve rawh le. -Zozam Times

Post a Comment

Powered by Blogger.