~Tlanmawia Mapuia Pachuau

THLAHRANG CHANCHINKhawchhak chhuak tuilumna, jug ang deuh, a hunna tur thil biala huna, karen fit-a tui lum theihna ang chi hi kan lei thar ve a, thil man to ni lem si lovah chuan a tha ve khawp a, ka inbualna tur tui ka lumna ber a ni. Hman zan deuh lawk khan kan mut vek tawh hnu, zan dar 12 bawr velah kan tuilumna chu amahin a rawn in on ringawt mai a nih chu mawle.

Kan in hi assam type, hlui tawh lam a ni a, lian lo tak a ni, a pindanna vel pawh plywood mai mai a ni. Hemi zan hian ka mu hnuhnung ber a, ka mut hnu hian ka chhungte tumah an tho leh lo tih ka hrechiang tlat. A chhan pawh, tho ni se chuan an pindan kawngkhar hawng thawm te, an pen ri te ka hre ngei ngei tur a ni. Kan chhungah hian ka mu hnuhnung ber ziah a, computer-ah hna tul ang ang thawkin emaw, facebook in emaw ka thu char char a, ka mut a chhuak tan deuh tihah mu chungin phone atangin ka mut a chhuah tak tak hma chu ka online leh ngar ngar a; 
chutiang chu kan zantin dan a ni. hemi zan pawh hian chutiang tho chu a ni a, mahse kan mut vek tawh hnuin kan tuilumna chu a rawn in on miau si; a in on hian hai rual a ni lo va, mut reh hnu phei chuan a so tur han intham vel hi bengchheng tham ve tak a ni tlat. Ka tho a, ka han off ta ringawt a.

Hei mai hi a la ni lo, tunhnai deuh atang khan kan inchung hi lungtum-a den dawt ang hian a rawn ri dawt fo mai a, a rik zawh chiaha kan tlan chhuah vat pawh hian a rawn vawmna lung niawm hmuh tur a awm ngai hlek si lo. A tirah chuan zan rei lamah a rawn vawm thin a, mahse a rei a, a huangtau tulh tulh a, chhun en lai te hian a rawn vawm ta thin.

Han sawi kir deuh ila, kan in hi hlui ve tawh tak mai a ni a, chhungte pali panga zetin an lo luah tawh awm e. Kan lei lai hiankan leina pa nau mipa-in a luah lai mek a ni. Kan lei dawn hian a luahtu pa hian a u-in hralhh a tum mai chu a hnial deuh a, "He in te hi chu nakinah keiman ka la khul ang ka tia sin mawle," a ti a, mahse anni hian veng dangah in an neih tho avangin a neitupa hian min lei tir ta a, anni chu anmahni in, veng danga mi-ah chuan an insawn ta a ni. Kum ruk kalta vel khan kan lei laia a luahtupa hi cancer-in a boral tawh nghe nghe. Kan in-ah hian bathroom leh toilet inkawp hi inchhungah a awm thin a, nikum November thla vel khan inchhunga bathroom chu thiatin kawt lamah kan dah ta nghe nghe a, heta tang chiah hian a ni kan inchung chu vawm ang dawt dawta a rik tak thin ni; a luahtu hmasa, hmana boral ta khan bathroom kan sawn hi huain lungtumin min awn tawng ta thin em ni ang le?

THLAHRANG HRIM HRIM

'Thahrang hi ka hlau lo em niang aw' tiin ka inngaihtuah thin a, ka la inngaihtuah chhuak thei lo. Ka la tawng ve miau lo mai a, hlauh leh hlauh loh ngaihna ka hre lo a ni berin ka hre ta, hmu palh ila chuan ka hlau ngawt chuan ka ring. Khawi vengah pawh hian 'a hrang nasa' tih tur ni kher lo, 'chutichuan an ti' han tih tur hi chu kan hre deuh vek chuan ka ring. Kan vengah ngei pawh hian khawhar in riak hovin an sawi ve sep sep chu a awm fo mai. Hmanah police pakhat hi a thi a, chumi tum chuan ka riak ve lo va. Mahse a thih tukah an in bula mi pakhat hi a thi ve leh ta hlauh mai a,kan veng kan tlem nen, khawhar pahnih han neih chuan riah loh chi a ni ta lo va, kan riak ve ta. A thi hmasa zawk ina riak tlangval lianpui mai khan a zankhatna-ah khan 'min bawh' a ti mai a, a tukah kan riahna zawkah khan a rawn insawn a ni awm a, kei phei chuan a rawn insawn tih pawh chu ka lo hre ve hlei law. Chumi 'min bawh' a tihna a riak ve tho pakhat, kan thianpa pawhin hetiang hi a lo tawng ve a, mahse ani erawh chuan, "Lal Jame-a alawm mawle," a ti mai mai thung. A sawi dan chuan- zana a mu tawh kha mi pakhat hian a rawn bawh bet tlat mai a ni awm a, mahse ani chuan kan thianpa ve tho Lal Jame-a mu turin uangin a bawh betah a lo ngai mai a, hlauh enah pawh a lo en lem lo. Mahse a hnu-a an sawi lehna-ah Lal Jame-a ber chuan chutih lai vel chuan a la haw loh thu leh tumah a bawh loh thu a sawi ve tlat thung.

'Zanah amahin bathroom kawngkhar a rawn inhawng ringawt' tih te, 'amahin karen a awn in on ringawt' tih te, 'zanlaiah pawna thingpui lumna bel a ri rum rum' tih ang chi hi chu sawi a awm ve leh phauh phauh thin a, mahse kei hi ka vannei nge ka vanduai ni, chutiang an sawi tum chu ka riah loh tum a lo ni ziah a, engmah ka la hre ve lo.

Ka dawih vak lo ni-a rinna chhan ka nei a; ka zu in nasat ve deuh lai khan kan lakna thin te'n neih loh tum hi an nei thin a, chutianga laklawh lutuk thilah chuan zan dar 10 velah kan veng thenawm te thlanmual paltlanga zu zawn zak zak chang ka nei ve thin a, engmah ka hmu ngai lo va, hlauh lam pawh ka rilru-ah a lang vak ngai lo; mi thekhat chuan an ngam lo maithei. Thian ho khawiah emaw kan chhuak a, zanah car 
khat thep thawpa khaw karkawnga kan tlan lai te, two wheeler-a kan inzui dam dam tumte hian 'thlahrang hmu ila ka va'n ti e aw' ti hian ka ngaihtuah mai mai thin a, kan hmu ngai lem hlei lo va.

Facebook-ah hian thlahrang chanchin sawina group pahnih pathum velah hi chuan ka awm ve a, zanah chuan ka chhiar duh lo. Muthilh loh lai hi chuan hlau ve deuh mah ila hrehawm khawpin ka hlau ngai lem lo va, mahse mumang lama hmuh zui atan ka duh loh vang hian ka chhiar duh lo a ni ber. Harh lai leh muthilh hnu khawvel hi chu a dang daih; muthilh hnu hi chuan harh laia kan nihna hi kan chhawm tawh lo va, khawvel dang daihah kan chen avang hian muthilh hnu-a ka mangphan theih tur ang chi hi chu mut hma-a chhiar loh mai a finthlakin ka hria. Mumangah hlauhawm deuh kan han hmu a, kan au chhuak thei si lo, kan tlanchhe thei bawk si lo hi a hrehawm thin em mai.

KAN IN HRANG KHA

Thlahrang hi a tak tak chu a awm ngeiin ka ring a, mahse tamtak hi a hmutu leh a hretute'n an fiah ngam loh vang mai mai a ni ngei ang. A hma-a ka sawi, kan tuilumna a lo in on ringawt ka tih pawh kha thil ho tak a ni. Kan tuilumna bel leh a hunna insikna laiah khan karen hmanga a inzawmna tur a awm a, khalai tak kha a lo huh palh chuan in on thei lovin a awm a, a ro hnu-ah a in on thei leh mai thin. Khami zan khan ka nuin tui lum a tum a, switch-ah a on vek tawh a, mahse a in on theih tak mai loh avangin a kalsan a, a lo theihnghilh a, off lovin kan lo mut san a, zan rei hnu-ah a rawn in on ta mai a ni; hlauhawm engmah a awm lo.

Kan inchung rawn vawmtu ve thung kha le? Kan kawmchhak kovah hian sertawk kung chawrche zet hi a ding a, kan kawt zawnah chiah hian a rawn zar a, kumtin hian eng emaw zat hi chu a rah ve ziah a, a rah hmin tuah hi amahin a rawn tla ta thin. Kum dangah kha chuan kan kawt leicharah a tla mai thin a, mahse kan in kan extent tak avang khan a rawn tlak thinna zawn kha kan bathroom chung a lo ni ta tlat a, a ri ta dawt dawt mai thin a lo ni. A rik zawh veleha kan tlanchhuah pawh khan a rawn vawmna awm lungtum kha kan hmu ngai miah lo va, mahse sertawk erawh kan chhar ziah thung; a rah a liam lem lo na a a tui phian lehnghal.

Engpawh chu lo ni se, thlahrang hi chu a awm ngei ang a, thlarau sual hnathawh te pawh a ni tel bawk ang chu. Pu Rokunga'n 'Chanchinthain kan ramah ramhuai a um bo ta' a ti a, hmanlai ngaihtuah chuan thlahrang leh ramhuai pawh kan hre tlem ta alawm.

ISUA HMING KAN LAMIN RAMHUAI HO AN TLAN!

Post a Comment

Powered by Blogger.