~ Remruata Varte

RANNUNG SEH damdawi
Boiha (Lalchawimawia Varte), ka chhang chiah fapa chu rannung seh avangin a dam lo a, civil hospital lamah a natna hi an hmuchhuak thei lo a, an beidawngin durtlang hospital an pan a, rannung seh tih hriatchhuah a ni a, doctor ten an han enchiang a, kan tlai ṭep tawh thu leh kan in chhan hman lo mai thei a ni tih chu kan thu hriat a ni ta..ana tuar hmel an hmu ngam tawh lo a, a thluak leh a thin a lo khawih hman tawh bawk si, bei a dawng hle mai. ICU awm turin an ti a, mahse ICU a ruak si lo, a thawk kan en ani ringawt ta mai a, LRM lama ka ṭhianpa Dr.PC-a ka zuk bia a, khawngaih taka ICU min lo siam turin zah pawh dawn lovin ka zuk ngen ta rawi a, vanneihthlak takin ICU khum 1 min lo buatsaih sak thei ta hlauh mai a, a ranga rangin kan inphur thla a, Doctor ten uluk takin an en hnu chuan advance stage a ni tawh a, eng pawh thleng thei kan ni a, theihtawp kan chhuah ange tih chu kan thuhriat awm chhun a ni..bei a dawng a, Pathian chiah kan inghahna a ni. 

Durtlang aṭanga kan chhuk hma hian Boiha pa hian rul sa tui a lo in tir hman a. Hemi zan hian tumah mutmu tuah mumal thei kan awm lo, tupawh mai kan ngui nghuai a, phone a rik hlek chuan ralkhel dar ang mai ani, kan tung hru zel mai tawh a. Hmun hrang2 aṭangin chhungkhat mai bakah ṭhianṭhate leh kohhrante ṭawngṭai kan dawng nasa hle mai a, Pathian chauh lo chu innghahna kan nei tawh lo.

Thil mak a ni: ICU kha kar hmasa zirtawp zan khan kan lut a, hei vawiin a ni 3 ni chiahah kan tlangvala chu harh ṭha takin a duhzawng ei theiin a rawn awm ta e..kan lawmna chu sawifiah theih a ni lo, boral thei maia ngaih tawh Pathianin min pe let leh ta, ICU chhuahsanin ward pangngaiah kan insawn ta a. Min duhsaktute leh bang lova min ṭawngṭaipui tute chungah a nu leh pa aiawhin lawmthu ka sawi a, Pathianin a let tam takin mal a sawm ang che u.

Tlipna: Tunlai hian rannung seh-scrub typhus hi a hri a leng nasa hle a, hetianga kan inringhlel anih chuan Durtlang hospital leh LRM hospital kal nghal a fuh ber ang..Civil hospital chubkal hmasak loh a ṭha ang...Tin rulsa tui hi mizo damdawi a ni a, doctor te pawh ka rawn hnuah intir an pawi ti lo a, Boiha anga rannung seh 2 durtlang damdawiin amite pawh he rulsa tui hi in tir an ni ve ve a, tunah hian damṭha takin an awm leh tawh a ni.

Post a Comment

Powered by Blogger.