MIZO NATIONAL YOUTH FRONT HEADQUARTERS 
MIZORAM: AIZAWL

PRESS STATEMENT
Date : 16.06.2018

SIPMIU-IN TO UCHUAK TAKA MOTOR A LEI HI MIZORAM MIPUI ZAH LOHNA A NIH AVANGIN MINISTER PU ZODINTLUANGA HI MINISTER OFFICE LUAH TLAKAH KAN NGAI LO.

H Ramdinliana
Vice President. MNYF. Gen. Hqrs.

Ni 02.06.2018-a kan sawi tawh angin Mizoram Sorkarin SIPMIU kaltlangin Aizawl khawpui bawlhhlawh paihfai nan Motor 50 Tata 407 LPK tipper ( a hring 25 leh a pawl 25 ) a man pangngai let aia toa a lei hi Mizoram mipui zah lohna leh corruption lian tak a nih avangin a changtu Minister Pu Zodintluanga hi Minister Office luah zel tlakah MNYF chuan a ngai lo a, Rang taka banna thehlut turin thurawn kan pe a ni.

SIPMIU-in Motor lei tura Tender an koh hi kum 2016 daih tawh a ni a, a man pawh kum 2017-ah pe tlak vek a, Tata 407 LPK hring pakhat lei nan Rs. 21,23,000.00 leh a pawl lei nan Rs 19,87,890.00 senral niin Motor 50 lei nan Rs. 1027,72,250.00 lai hman a ni a, hei hi Motor zuartute zawrhna pangngai nena chhutin a to uchuak em em a. Sorkar insawifiahna hi MNF Thalai chuan pawm tlakah kan ngai lo a, vawiin 16.06.2018 hian a hmunah kan endik a, hengte hi thil nihna dik tak a ni.

. Sorkar hian SIPMIU kaltlanga heng Motor 50 lei tura Tender a koh lai hian LPK 407 man hi Rs. 9,00,000.00 awrh a ni a. A hmuna kan endiknaah hian Motor tharin Tipper body chhah chi a rawn chhawm ang kha heng Motor-ah hian a awm lo a, a body hi zawm sang mah se tuna an plain-sheet hman en hian a man hi tlawm zawk tura ngaih a ni. SIPMIU-in Kahpathir 4mm Aizawlah lei tur a awm lo nia a sawi hi a dik lo a, Aizawla Kahpathir 4mm man hi tunah phek khat Rs. 8,000.00 chauh a ni.

SIPMIU in motor an lei atanga kum 2 hnu kumin 2018 hian Tata LPK 407 tho hi UD&PA Department chuan an lei a, Serchhip leh Lunglei District-ah te dah a ni a, Motor pakhat hi Rs. 14,50,000.00 chuang hretin an lei a, SIPMIU motor body zawmsan ang chena an zawm sanna man leh hmanraw man chu Rs. 2,50,000.00 chauh a ni a. Aizawla sak a ni. SIPMIU -in an sak aiin a tha zawk niin MNYF chuan kan hria. Tuna Tata Dealer-in LPK 407 a zawrhna chu Rs. 12,27,000.00 a nih laia Rs. 14,50,000.00 chuanga a lei mah hi eirukna lian tak a awm tih a chian tawh nak laia kum 2 kal taa SIPMIU-in Rs. 21,00,000.00 chuang leh Rs. 19,87,000.00 chuanga an lei hriatthiam theih loh sual lian tak a ni a. Department thuhmunin Motor inang hetiang em ema man dik lo nasaa a lei thei hi a mak kan tiin hriatthiam harsa kan ti hle a ni.



. Sorkar hian LPK 407 Original body 3.5cu.m Capacity a lei a, bawlhhlawh zang tak phur tur a nih avangin a body zawm sang mahse a Motor hi a chakin a lian tihna a ni chuang lo a, Motor siamtu Company-in 8cu.m a siam chhuah Tata LPK 1618 man anga LPK 407 a lei hi inbumna dik tak a ni a, Corruption a ni bawk. Hetiang thil dik lo tia mawhphurtu ber Minister Pu Zodintluanga hi Minister ni zel tlakah MNF Thalai chuan kan ngai lo a ni.

Mizoram Sorkarin LPK 407 sawmnga an leiah ringawt hian motor man pangngai baka an sum hman tamna hi Rs. 500,00,000.00 aia tlem lo a ni a, hei hi a to uchuak kan ti em em a. Hetiang zat mipui sum hman riral hi hriatthiama sawimam chi-ah MNYF chuan a ngai lo a, a changtu Minister hian a Office hi luah chhunzawm lo se kan duh tak zet a ni. Mizoram leh Mizo mipuite thlavang hauhin MNYF chuan hma kan la zel dawn a ni.

Post a Comment

Powered by Blogger.