~ Gilbert Renthlei
Vawiina Mizoram fanchhuaktu chanchin chu leimin leh tuilian ni lovin wheelchair atanga beidawnna hneha hnehna ropui changtu kea kal thei lo, Joan-i chanchin hi a ni.
Joan Laldinpuii hi March 24, 1999 ah a lo piang a, Pu Lalhmangaiha leh Pi PC Lalneihthangi te fanu neih chhun niin naute hmeltha tak mai an nei chu a nu leh pa pawh an.hlim hle mai.
Mahse chu nausen hmeltha tak chu vanduainain a bitum bik emaw tihmai turin thla 8 chauha upa a nih laiin Pneumonia natnain a man ta. He natna tihbaiawm tak hian Joan-i chu theihtawpin a nghaisa a, damchhunga kea kal ngai reng reng lo turin a siam ta a ni.
A nu leh pa chan han ngaihtuah ila, a rapthlak ngawt ang le, mahse lehkhathiam nu leh pa nei tih takah a nu leh pa te chu an fanu neihchhun vanduaina avanga indawm kun ta mai lo chuan theihtawp chhuahin an fanu chu an enkawl zui ta a, a khawvela chona hrang hrang hmachhawna hnehtu ni turin an chher ta.
Pneumonia avanga a piansual avang chuan inah an awm tir mai mai lo va, naupang dang ang bawkin sikul an kal tir ta a, Nursery to Class VI hi Little Angels Home leh Southern Flower School ah te zirin Class VII hi an venga D&D School atangin tha takin a pass a. Class VIII to Class X chu Govt High School Lungleiah zirin tha takin Matric a zo ve ta. Chona sang zawk hmachhawnin Govt Higher Secondary School Lungleiah class XI leh XII a zir leh a, motor atangin a thiante, an zirtirtu ten sikulah an zawn chho thin a ni. Heta a luh lai hian khatih laia Parliamentary Secretary i/c Education Pu Joseph Lalhimpuian an sikul a tlawhin wheelchair a thuchungin pangpar a lo pe a, mi tumruh wheelchair nena sikul kal a hmuh chuan Pu Mahima rilru a khawih hle a, GHSS in an la neih ngai loh, zirlai rualbanlo tana mi dang dang tibuai lova wheelchair a innawr kai theih nan Ramp chu a siam sak ta a ni.
Class XII tha taka a zawh leh hnuin Joan-i hian zirna sang zawk bei turin Lunglei Govt College ah a inziak lut leh ta a. A nu leh pa te hi an tumruh em em a, chu chu an fanu rilruah pawh an tuh a tihloh theih loh.
Joani pa hi Maths teacher niin a nu hi Science zirtirtu a ni thung. Nu leh pate tuina zawmin Joani pawh hian Mathematics a tuina thuk tak a neih chu tihlawhtling turin LGC ah hian B.Sc Mathematics a la ta a, a zir taimain a tumruh em em a, exam dawn phei chuan thildang a ngaihtuah thei ngai lom A pa hian nitin college ah a thlah a, class neih chhung zawngin a college kalpui ten an buaipui thung a, tlaiah a pa hian a lam leh ziah thin.
An chhungkua an tangrual a, a thianten an ngaihsak a, amah a tumruh em em bawk. Hengte avang hian Mizoram University hnuaia B.Sc Exam result a lo chhuah meuh chuan Mizoram pumpuia a zir rualpui kea duh duhna hmuna kal thei zirlai sang tam tak te khumin mark 1200 ah 1025 hmuin pakhatna a ni ta hial a ni. A va ropui em!
Enge tihzawm a tum a kal zel a tum dan zawhna chhangin Joani chuan, "Zir zawm zel chak mah ila ka dinhmun hetiang hi a ni a, hmun danga awm tur chuan a remchang tawh lo deuh a. Tunah MYC Coaching Centre Lungleiah a lo awm ve ta bawk nen, MCS exam hmachhawn tura inpuahchah hi a tum deuh a, ka tling zo ve ange maw," tiin a sawi.
Joani chanchin hian vawiina zirlaite fuih mawlh teh se. Zirlai tam tak fuke kim duh duhnaa kala duh duh ti thei zawk tam tak te hian kan nawm.kan makah tumruhna leh taimakna kan tlachham a, beidawnna ruamah thalai tam tak an tlu lut mek a ni. Hetih lai hian duh duhnaah chesawnin kal thei lo mahse Joani tumruhna leh taihmakna chuan vawiinah par a chhuang ta, Wheel Chair atangin Mizoram Topper ah a inhlangkai ta. A kal zelna turah duhsakna kan hlan e.
Post a Comment