bru Mizorama lokir tawhte’n nawrh huaihawt an tum - TIMES OF MIZORAM

Breaking

Home Top Ad

Post Top Ad

bru Mizorama lokir tawhte’n nawrh huaihawt an tum

Tripura relief camp 6 a awm mek Bru hote an lokir huna cheng nuai tam tak chhungkaw pakhat pek tura sorkar laipui thutluknain a huam ve dawn loh chuan a lokir tawhte’n nawrh huaihawt an tum.

Bru Coordination Committee (BCC) chairman Pu Elvis Chorkhy chuan Mizorama mahni duhthu a kir tawhte leh sorkarin kir hun a siama kir tawh Bru chhungkaw tam takte aiawhin sorkar laipuiah he thu hi an thlen fo tawh niin a sawi a. Tuna relief camp-a la awmte’n cheng tam tak an dawn lai a sorkar thuawiha lokir tawhte’n tlemte chauh an dawn kha rintir an nih dawn chuan an lungawi dawn lo tih Pu Chorkhy chuan a sawi a. Joint Monitoring Group-ah leh Ministry of Home Affairs-ah pawh he thu hi thlenin an duhdan hi tihpuitlin a nih loh chuan khaw tinah lungawi lohna an lantir tur thu a sawi a ni.




Home department Additional Secretary Pu Lalbiakzama chuan Bru chhungkua lokir tawhte chungchang hi sorkar laipui-ah pawh an thlen sak thu AIR a hrilh a. Sorkar laipui pawhin a thuphungin rem a ti a, chhawmdawlna hi tuna camp-a la awm leh lokir tawhte pek vek an nih dawn chuan cheng vaibelchhe 500 chuang sen a ngai dawn niin a sawi a. An chhut dan hi sorkarah an thlen tawh niin a sawi.

Tunhnaia Union Home Minister leh Mizoram leh Tripura chief minister-te inhmuhkhawmnaah Bru lakkir hna hi September ni 30 hma a thawh zawh ni se tiin thutlukna siam a ni a. Bru lokir te hi chhungkaw tin cheng nuai 4 an bank account-ah kum thum hnu a lak chhuah theih turin dah sak an ni ang a, insakna atan cheng nuai khat leh sing nga pek theuh an nih dawn bakah kum hnih chhung chhungkaw tin thla tin cheng sangnga pe in a thlawnin ration an dawng bawk dawn a ni.

Post Bottom Ad