MIZORAM SUM EIRUKNA HI TIHTAWP NI RAWH SE - TAWNLUAIA - TIMES OF MIZORAM

Home Top Ad

Post Top Ad

MIZORAM SUM EIRUKNA HI TIHTAWP NI RAWH SE - TAWNLUAIA

- Tawnluia
Sr Vice President, MNF &
Chairman, MNF Action Committee


Kum 2008-a Congress sawrkar a lo pian atang khan Lottery hi duhsak zawngte nena sam inphiarzawm nan kan Chief Minister Pu Lal Thanhawla hian a hmang tangkai hle a. A duhsak bik vai sumdawngten duhtawkin vawiin ni thleng hian an chalai mawlh mawlh mai a ni. Mizoram sawrkar sum bawma lut a tlem tial tial a, a hlawkpuitu mi tlemte- te chan erawh rin phak bakin a tam uchuak hle thung.

Lottery-a thil dik lo inphum leh siamṭha tura sawrkar phut nan MNF Party chuan vawinga lai Press Conference kovin a lo puangchhuak tawh a. Heti chung pawhin kan CM hian Savawm khuaila ang maiin maimitchhing chungin a la hai buan buan zel tho a ni.

Kum 2011 December thlaa Lottery tender sawrkarin a chhuah chu vai sumdawng pali intiamrualte chuan a chhan theihna hniam ber, inzat vekin an vaiin an chhang vek a. Hetianga a chhangtu zawng zawngin a chhan theihna hniam bera an chhan hi tender chi hrang hrangah thil awm ngai lo a ni a.Tender chhang ve duh dang pawh lo awm ni se, chhan ve ngamawm miah lovin an intiamrual a ni tih a hriat theih nghal a ni. MNF pawhin hemi avanga sawrkar sum hloh tur tamzia thu March ni 6, 2012 khan Press Conference neiin a puang chhuak a. Lottery Committee pawhin tender ko ṭha leh turin rawtna a siam nghe nghe a, heti chung hian Chief Minister chuan Lottery Committee thu hi hnawlin notesheet-ah, “I am sorry, I do not accept the recommendation of the Lottery Committee.....” ti meuha ziakin, ni 29.5.2012 atanga 28.5.2014 chhunga Lottery kalpui turin an thlang lui ta tho a ni.




Sawrkarin sum a hloh mawlh mawlh chungin an hun a tawp hnuah pawh kum khat atan (29.5.2014 - 28.5.2015) an hun a pawtsei leh a. Chu an hun pawhsei a lo tawp hnuah pawh a zual zapui vailenhlo tih ang maiin kum thum atan (29.5.2015-28.5.2018) an hun a pawhseisak leh ta zel a.

Lottery kal dan hi a ṭawpzia hriain Sawrkar laipui chuan India rama sum hman dan chhui theitu sang ber Comptroller and Auditor General of India (CAG) a chhuitir ta hial a. CAG hian kum thum - 2012-13, 2013-14 leh 2014-15 chhung chauh an chhui a, hemi chhung hian Cheng vaibelchhe 118,08.77 Mizoram sum bawma lut tur chu lut lovin hnamdang vai company- te kutah a luh fai vek thu te, hei hi Lottery Regulation Rules 2010 kalh tlat a nih thu leh Cheng vaibelchhe 25.45 chauh Mizoram sum bawma a luh thu chiang takin CAG report hian a rawn tarlang ta a ni. CAG-in a chhui tel hman loh kum thum - 2015-16, 2016-17 leh 2017-18 chhung pawh hian hetiang zat vel bawka sawrkar sum hlohna rapthlak a awm ngei ang tih hi thil chiang a ni.

Lottery-a thil dik lo awm hi Competition Commission of India (CCI) beng pawh a thleng hial a. Anni pawhin an chhui zo tawh a, tunah Supreme Court thutlukna an nghak mek ta a ni.

Lottery-a thil dik lo rapthlak tak awm hi MNF mai bakah PRISM pawhin CBI chhuitir turin hma an lo la tawh a. May ni 12, 2017 khan Congress Bhavan-ah CM chuan Lottery hi CBI chhuitir MNF-in an duh chuan hma ka lo la vat ang tia a sawi laiin, vawiduailo MNF-in chhui tura a tih hnuah pawh Pu Hawla Sorkar hian vawiin ni thlengin hma a la la ngam lo a. Ni 29.6.2018-a Bhavan-a Lottery CBI chhuitir tura hma la ang leh CBI-in chhui tlakah an ngai lo nia a sawi hi dawt chiang tak a ni. Vawikhat mah Sorkar hian Lottery hi CBI chhuitir turin hma a la la lo zawk a ni. Hetianga hmui dawthei CM kan nei hi Zoram mipuite tan a vanduaithlak hle a ni.




MNF chuan dawhthei taka sawrkar ngaichang a, kumin 2018 May ni 28- a an hun pawhsei nawnna a lo tawp hunah tal chuan sawrkar a insiamthat kan beisei laiin tender maksak tak mai leh chu tender tihfel hma chu tuna an hnungthak hiahpuite Lottery chhunzawm char char theih turin thutlukna a la siam zawk ta deuh deuh a. Hei hian Mizoram mipuite min barakhaih takzet a ni. Tute emaw tana ṭha bik taka tender a chhuah hi titawp nghal tur leh an hun tawp hnu pawha CM duhsak bikten an la chhunzawm ta zel mai hi titawp nghal turin June ni 25 khan chanchinbumite kaltlangin mipuite hriatah kan puangchhuak a. Ni 27.6.2018-ah MNF Thalaite Lottery Director-ah kalin he thu bawk hi an va thlen leh a. Ni 28.6.2018-ah Finance Minister a office-ah kalchilhin a hnenah thlen zui leh a ni a. Heti chung pawh hian sawrkar chuan vawiin ni thleng hian beng min chhut ngawn sanin a la kal chhunzawm lui ta zel a ni.

Mizoram mipuiten kan chhawr ṭangkai theih tur, Lottery-a Cheng vaibelchhe sing tel Mizoram sum eirukna hi Mizoram mipuite hmakhaw ngaiin tihtawp ni rawh se kan ti a. Sawrkar hnena kan thilphutte hi tihhlawhtlin a nih hma chuan hma kan la chhunzawm zel dawn a ni.

No comments:

Post a Comment

Post Bottom Ad