FORMALIN HMANGA SAWNGBAWL SANGHA

FORMALIN-A SAWNGBAWL SANGHA LAKAH I FIMKHUR ANG U

FORMALIN tih chu- 'Thil tui chi khat, tui leh boruak(gas) rawng nei lo formaldehyde an tih chawhpawlh, science zir nan tea mitthi ruang vawnhim nana an hman thin chu a ni'(English-Mizo Dictionary, by, Remkunga).

Formalin-a awm formaldehyde an tih tak hi cancer awmtir theitu an tih chu a ni a. Hei hi mihringte tana tur/ poison hlauhawm tak mai a ni a. A hnathawh dan tlangpui:

• Thin tan a hlauhawm hle(Hepatic necrosis)
• Kal a tichhia(Kidney damage).
• Pumpui bang chhunglam vung natna nasa tak a thlen(Severe gastritis).
• Luakchhuak leh khuh a awmtir thei.
• Chaw paitawihna khawl a tichhia( damage pancreas).
• Mit, hnar, hrawkahte natna thlenin cancer a awm tir thei.

Mitthi ruang vawnhim nana an hman chu sangha leh thlai chhe mai lova vawnhim nante a rukin an lo hmang leh ta zel a, chu chu mihring tana tur hlauhawm tak, cancer thlen theitu a lo ni ta a ni.

Formalin hmanga sangha sawngbawl hi tun hma pawhin phai lamah chuan an lo buaipui zauh zauh tawh thin a, tun hnaiah a lo lar tharleh ta a ni. Tun hnai lawk khan Shillongah chuan Commissioner of Food and Safety-in Sangha chi 19 a test a, formalin hmuh a nih avangin ni 15 chhung chu sangha zawrh chhuah a khap bur mai a ni. Dan bawhchhia man an nih chuan cheng nuaih 10 lai chawitir an ni dawn a ni. A namai lo hle mai.

Mizoramah chuan sorkar thuneitu lamin an test tawhah formalin hi an la hmu lo niin an sawi a, a testna khawl tha zawkte chah a, la test leh zel tur a ni a, phai lam sangha lo ei rih loh phawt hi a him ber ang.

Hun rei tak atang tawh khan phai lam atanga lo kal formalin-a sawngbawl sangha hi kan lo ei tawh thin ang a, heti em em a Zorama cancer lo tamta te hi a chhan pakhat a ni ve thei ang em? tih hi zawhna pawimawh tak a ni ta a ni. ~ Rca Renthlei‎