HNAM PA PU LALDENGA THIHCHAM PUALIN A THLANAH HUN HMAN A NI - TIMES OF MIZORAM

Breaking

Home Top Ad

Post Top Ad

HNAM PA PU LALDENGA THIHCHAM PUALIN A THLANAH HUN HMAN A NI

HNAM PA PU LALDENGA THIHCHAM
Memo No.MNF/Media/2018/01/248-Dt.07.07.2018: Vawiin hi Mizo Hnam Pa Pu Laldenga thih cham ṭum 28-na a ni a, hemi pual hian a thlan Treasury Square-ah hun hman a ni. He hunah hian Pu Zoramthanga, President, Pi Lalbiakdiki, Pu Laldenga nupui bakah MNF hotu lawk tak takte'n hriatrengna pangpar a thlanah hian an dah a ni.


He hunah hian Pu Zoramthanga chuan thusawiin, Pu Laldenga ang miropui Pathianin Zofate min pe chu vanneihthlak a tih thu a sawi a. "Pathianin Mizote hi Hnam, sakhua leh ram min pe a, hemi humhalh tlat duhna leh hmangaihna thinlung Pu Laldenga'n Zofatea a tuh hi a ropui takzet a. Pu Laldenga ang hnam tana miropui, hnam thinlung mipuitea tuhtu hi hnam dang pawhin neih ve an duh a, duh avanga neih ve ngawt theih erawh a ni lo a ni," a ti.





MNF President chuan, Pu Denga chu India ram mai ni lo khawvela Mizo hnamte min pholangtu a nih thu sawiin, "Khatih hunlaia Zofate mai ni lovin thangthar zelte thinlungah thleng pawh hian Hnam thinlung (Nationalism) a tuh a. Sawisela ngaihnep tum awm ṭhin mahse, kan finna a sang tulh tulh a, Pu Denga hlutna hi kan hrechiang chho tulh tulh a ni," a ti a. Mizo hnam leh Mizoram a awm chhung chu Pu Laldenga hming a daih tawh loh tur thu a sawi bawk.

He hunah hian Pu Laldenga nupui Pi Lalbiakdiki pawhin thusawiin, "Tun thleng pawha ka pasalin chawimawi a la hlawh hi a fel vang ni lovin Zoram tana a hnathawhte hriatreng a nih vang a ni a. A thih a Central sorkar ruahmannaa State Funeral nena ropui taka helai hmuna vuiliam a ni pawh kha Zoram leh hnam tana a hnathawh vete avanga chawimawina a ni a. A mimalin engmah ni lo mahse, miin a hnathawh ve te pawm a, an chawimawi hi a ropui ka ti," a ti.

Laldenga chanchinPi Biakdiki chuan, Mizoram State-a hlankai a ni leh hmasawnna hrang hrang lo thleng ta zel chu Zoram tana Martar-te thawhrah a nih thu a sawi a. "Hnam Party-in hotu fel tak tak leh ropui tak tak kan nei hi lawmawm ka ti a. Amah ka Pasal ngei kha lo tho leh se ropui a ti ngawt ang," a ti a. Kan hma maia Inthlan awm turah Hnam Party vote ṭeuh turin mipui a ngen bawk.

He inkhawm hi Pu Tawnluia, Sr Vice President-in a kaihruai a, Major Lalsawmliana, Temple Corps CO-in hunserh a hmang.

Mizo Hnam Pa Pu Laldenga hi July 11, 1927-ah Lunglei Pukpui khuaah a lo piang a, kum 1944-ah British Indian Army a zawm. Kum 1959-ah Mizo National Famine Front chu a hova din niin, chu pawl chu October 22, 1961-ah Mizo National Front (MNF) tiin thlak a ni.





Pu Laldenga hi kum 1986 khan Mizoram sorkar lailawk (interim)-ah Chief Minister a ni a, kum 1987-a Mizoram state Assembly inthlan hmasa berah Sateek leh Aizawl North-II bial aṭanga thlan tlin a ni a, state nih hnua Chief Minister hmasa ber a ni.

Kum 1990 khan Cancer a nih hriatchhuah a ni a, Memorial Sloan Kettering Cancer Centre, USA-ah thla thum enkawl a nih hnuin Mizoram pana an haw kawng Ashford Hospital, London-ah July 7, 1990, India sanaa tlai dar 2:30-ah a thi.

Pu Denga ruang hi July 11, 1990 tlai dar 4:30-ah Tuirial Airfield-ah helicopter-in phurh thlen a ni a, July 13-ah vui niin, Mizote zinga state funeral-a vui awm chhun a la ni.

- PR


No comments:

Post a Comment

Post Bottom Ad