MANIPUR ZOFATE TAN ZORAMTHAR - TIMES OF MIZORAM

Breaking

Home Top Ad

Post Top Ad

MANIPUR ZOFATE TAN ZORAMTHAR

Lalmuanpuia Punte

Naga hnam tana zalenna suala India sorkar laka hel pawl NSCN (IM) leh India sorkar te inbiak remna kal zelin a nghawng tel Manipur state-a cheng Zofate chuan mêl lung thar - Zoramthar an chuangkai dawn hnai ta.

MANIPUR ZOFATE TAN ZORAMTHARIndia sorkar hian, 'Insurgency should not pay - helnain hlawkna a tel tur a ni lo' tih hi thupui bera neih angin lang mahse, ram leh hnam chhana helna hian hlawkna chu a tel fo a ni. Tripura ram leilungfa (indigenous people) zinga helpawl, Tripura National Volunteer (TNV) te helna tihtawp anih theih nan sorkar nen inremsiamin Tripura Tribal Areas Autonomous District Council (TTADC) pek an ni a, Mizoram chuan India sorkar laka hel MNF te leh India sorkar inbiak remna avangin UT aṭangin state kan chuankai phah a. 'MNF te ralthuam tun hlawh a ni bik lo' ti niawm takin hel ve miah lo Arunachal leh Goa te pawh Mizoram rualin UT aṭangin state-ah hlankai ve an ni. A dik tak chuan MNF leh India sorkar inbiak remna avanga MNF te silai tun avangin Mizoramin chu state kan nih phah a, helna chuan hlawkna chu a nei ngei a ni. Thup mawi an tumna lamah Arunachal leh Goa te pawhin hel pawl MNF silai tun zar an zo ve zawk a ni. Chutiang bawkin Assam state-a Bodo hnam te pawhin an hnam helpawl te leh sorkar inremna avangin Bodoland Territorial Council (BTC) an neih phah bawk.

India sorkar leh NSCN(IM) inremna pawhin ken tel thil tam taka a neih dawn a, Manipur state-a cheng Naga te'n dinhmun thar engemaw tak an neih dawn avangin 'NSCN te silai tun vang' a nihzia thupmawi nan, Manipur state-a cheng Zofate pawh dinhmun thar pek ve zel a ṭul an ti tlat a ni ngei ang, Bodo helpawl te silai tun hlawh 




ang Territorial Council pek ve an tum ta hial a.

MANIPUR ZOFATE TAN ZORAMTHAR

Amaherawhchu Manipur state-a cheng Zofate zingah khian silai chelek pawl an tam êm² mai a, chu'ngho chu inzawmkhawm pawl (Alliance) pahnih, Kuki National Organisation (KNO) leh United Peoples' Front (UPF) ah an inhlawmkhawm leh a. Tichuan India sorkarin Manipur-a Zofate tana Territorial Council a pek tum pawh chu buaina lianpui la hmachhawn leh thei dinhmuna an din avangin KNO leh UPF te chu India sorkar chuan inbiakna te neih puiin anni pawl inzawmkhawm pahnih KNO leh UPF te chuan uluk takin an ngaihtuah ho ṭhin a ni.

An Territorial Council neih tur hming turah KNO leh UPF duhdan a inang hlei thei lova, KNO lam hian Kuki hming put an duh a, UPF lamin ZO hming tel ngei an duh thung a. KNO-ah hian Kuki helpawl engemawzat an inhlawmkhawm a, UPF-ah hian Kuki helpawl engemaw zat leh ZRA leh HPC-D te an tel a, UPF Chairman hi pawl tin te'n an in nih chhawk kual thin a, an election hnuhnung ber, nikumah khan HPC-D C-in-C Lalropuia(L) kha Chairman-ah an thlang a, nimahsela vanduai thlak taka 21.5.2018-ah a thih tak thut avangin ZRA hotupa Thanglianpau chu aiah Chairman atan an thlang leh ta a ni.

KNO leh UPF te chuan vawi tam tak meeting an neih hnuin 29.6.2018 (Friday) khan Churachanpur, Rengkai venga Vocational Education Training Institute Hall-ah KNO leh UPF te chuan meeting nei lehin Manipur state chhunga Zofate tana Territorial Council ding tur hming atan chuan hming pahnih : 1. Khul Territorial Council leh 2. Zalengam Territorial Council chu chu chhawp chhuakin Manipur hnam hrang hrang zinga pawl hrang hrang ho, (civil society organaisation - helaia NGO kan tih ang hi) te nena inrawn tlan hnuah hemi chhawp chhuah sa hming pahnih aṭanga an duh tlân ber chu July ni 10, 2018-ah meeting neih leh a, thutlukna siam turin an ṭindarh ta rih a ni. A lawmawm hle mai.

Manipur-a Zofate te khi district hrang hrang, Tamenglong, Senapati, Ukhrul leh Chandel district-ah te hian Naga te nen in chenpawlhin Churachanpur district-ah erawh chuan a hlangin an awm a, Churachanpur district hi Manipur tlangram district-ah chuan a lian ber a ni a, MLA constituency pawh paruk lai a awm a ni. Amaherawhchu, tun hnaia Manipur state-a congress sorkar tawp dawna district thar a siam belh tak ṭeuh khan Meitei Valley piah hmarlamah Kuki hlang chenna Sadar Hills district siam thar a ni a, Churachanpur district pawh phelin Pherzawl district hawn thar a ni bawk.





Tichuan sawi tawh angin NSCN (IM) leh India sorkar inbiak remna avanga Manipur Naga te’n dinhmun thar an neih dawn tak avangin India sorkar chuan ‘Helnain hlawkna a tel tur a ni lo’ tih vawng nghet viau anga a lan theih nan chu Manipur Naga dinhmun thar tur chu ‘NSCN (IM) te helna rahchhuah a ni lo, Manipur kan singsa fel a ni’ ti anga lan tir tumin Territorial Council pek an tum ta a ni. Manipur-a Zofate chuan an thil la tawn ngai loh, Territorial Council neiin hlawm khatah an han awmkhawm dawn ta chu a ni a, a hming tur pawh sawi tawh angin Khul Territorial Council emaw, Zalengam Territorial Council emaw anih dawn hmel ta a nih chu. Khawvel hmundanga Zofa zawng zawngte tan Zoramthar la tling lo mahse, Manipur chhung bikah chuan Zofate chuan Zoramthar an chuangkai dawn bik ta reng mai, an va awhawm tak êm! Chu an Zoramthar tur chu tuna an awmdan aiin a ṭha zawk dawn nge, a chhe zawk or hrehawm zawk dawn tih erawhchu an khawsak ho zui zel danin a la hril ang viau ang.





An Territorial Council hming tur propose pahnih, KHUL tih leh ZALENGAM tih hi sawifiah tum hlek ila - Keini Mizorama cheng Duhlian ṭawng hmangte hian Chhinlung chhuak kan inti a, Hmar hnam chuan Chhinlung kan tih chu Sinlung an ti a, Zomi (Paite, Simte, Vaiphei, Zou etc.) leh Kuki ho khian lung pûk aṭanga lo chhuak ve tho nia inngaiin chu chu Chhinlung or Sinlung ti lovin Khul an ti a, chu chu Duhlian ṭawng chuan PUK tihna a niawm e. Kuki leh Zomi te khi R an hmanloh avangin R aiah G an hmang a, chuvang chuan ṭawng lamah chuan G GROUP tih an ni reng a ni. Ram tih aiah Gam an ti, Run lui te khi Gun an ti. _entirnan_ Mihring hminga Gosiama te hi Rosiama tihna a ni mai a, chuvangin ZALENGAM tih pawh chu ZALENRAM tihna mai a ni.

Post Bottom Ad