‘SENSIARI’ hitmaker, Laikunga Hmar vuiliam ta - TIMES OF MIZORAM

Breaking

Home Top Ad

Post Top Ad

‘SENSIARI’ hitmaker, Laikunga Hmar vuiliam ta

SENSIARIZo rimawi khawvela hming dai leh ngai tawh lo tur, legendary Laikunga Hmar chu nimin zanlai khan thi. Kum 85-a upa a ni. Hun rei tak cancer natna in a bawm hnuah, Laikunga Hmar chuan chatuana a chawlhna tur lam a pan ta a ni. Laikunga Hmar hi kan hriat theih dan ber tur chuan, 'Sensiari' tih kha a ni awm e. Mizote'n mahni puala cable TV kan neih chhoh tan tir lam, TV programme hit zet mai — Luangliam — tihah te pawh khan a zai leh a hla sak te hian thlan a hlawh viau a nih kha. 

Zai leh rimawi lam ngaina tak a ni a, mi lungleng thei tak Laikunga Hmar hi Mizo mipa zaithiam zinga Radio Artiste Grade A hmasa ber a ni a, a thih ni thlengin radio-ah hian hla 100 chuang a khung tawh a. A hla lar zingah chuan sawi tak angin, 'Sensiari' tih leh 'Ka Bang Tawh Ang' tihte a lar pui hle. Kum 1952 khan All India Radio, Guwahati station, Shillongah hla aa khung tan a. 




Kum 1958 bawr vel khan St. Anthony's College, Shillong-ah lehkha zira a awm laiin, a thiante nen — Sensiari Boys — tia hming invuahin, 'Sensiari' tih hla hi an lar pui hle a ni. A lar vanglaiin Culcutta-a Billy Graham team-te'n rawngbawlna an neih atangin a piang thar a, khata tang khan lengzem lam hla a sak hi kan hmu mang mang tawh lo a. A record sa pawh tihreh a dil a, hei erawh radio in an phalsak ta lo niin thudawnna chuan a sawi. Kum 1994 ah audio album — Sensiari — a tichhuak a, kum 1996 khan a fa te nen — Laikunga leh a fate — tiin Krismas album a tichhuak leh bawk. 




Laikunga hian fapa pahnih leh fanu pathum a nei a. A fate zingah zaithiam — Lalbiakmawia leh lalduhawmi — te phei chu radio artiste an ni nghe nghe. A fapa zingah Synod Choir member lo ni tawh leh musician a awm bawk a ni. Fapa pahnih leh fanu pathum a neihna, a nupui C. Tlangthanmawii nen kum 1958 khan an innei a. Nikum February thla khan chatuan ram a lo pan tawh a, tunah chuan a nupui awmna lam min pansan ve ta. Nimin khan Laikunga Hmar hi Chaltlanga an chenna Inah vuina hun hman a ni. - Zozam Times

Post Bottom Ad