-Dr. C. Lalrampana
THALBE AWMZIA:
Thalble hi Saptawngin Endocrine Gland an ti a. Chu chu mihring Taksa chhunga thisen chawm thatu tuihnang bawm a ni.
Heng tuihnang bawmahte hian tuihnang (fluid) a awm loha a lo ro chuan Taksa peng hrang hrangah natna chihrang hrang a thlen thin. Chuvangin, heng thalbe pawimawhna leh a lo rova mihring taksaa nghawng a neih dan tlem chhui fiah teh ang.
THALBE CHIHRANGTE:
Thalbe hi a tlangpuiin 8-ah then a ni a; an hming a inang loh ang bawkin mihring Taksa tana an hnathawh leh tangkaina pawh a inang lo. An zavai hian an pawimawh em em vek a, a engamah hi paih theih a ni lova ngaihthah chi a ni hek lo. Chungte chu;
1. Thymus gland
2. Pineal gland
3. Pituitary gland
4. Thyroid/parathyroid gland
5. Adrenal gland
6. Pancreas gland
7. Ovaries, testes & Sex gland
8. Lymph gland
AN HNATHAWH:
1. THYMUS GLAND: Hei hian nausen pianghlim atanga kum 15 a nih thlenga natna laka venhim hna a thawh avangin THALBE zingah chuan a pawimawh ber pawla ngaih a ni.
He thalbe hi tuihnang tlachhama a ro chuan naupang khawsik reh hlei thei lo a thlen ngei ngei thin. Naupang chu a ngui a, a zawi ngawih ngawih thin. Engmah ei in chakna a nei lova a ngui nghiai thin.
2. PINEAL GLAND: Hei hian Thalbe dang zawng hi thununin hna thawhsaktu ber a ni a. Mihring gaihtuahna leh chakna petu a ni nghal bawk. Potassium/ sodium balance siamtu ber a ni.
He thalbe hi a rova tuihnang a tlakchham chuan thisensang a thlen vat a, inpawla a hun hmaa chitlakna (premature ejaculation) a thlen ngei ngei bawk thin. A thawh tur ang a thawh that theih loh chuan kal (Kidney) tha lo a thlen a; kutke vung a thlen bawk thin.
3. PITUITARY GLAND: Hei hian taksaah air & space a thunun a; gland dang zawngte siamthatu leh thununa tichaktu a ni bawk. Ngaihtuahna tichaktu leh mit khaw hmuh tifiahtu leh ri hriatna tichaktu a ni bawk.
He gland hian tuihnang a tlakchham chuan than theihlohna te, dawt hehna te, luhluna te, haihawtnate a thlen thei.
4. THYROID/PARATHYROID GLAND: Heng gland-te hian calcium & phosphorus an siam a, Taksa mamawh thuam thar lehtu pawimawh tak an ni. Chuap leh lunga boruak tha leh thianghlim petu ber an ni.
Heng gland hian tuihnang an tlak chham chuan vitamin D tlakchhamna te, ha natna leh ruh mawih te, awrpuarnate leh chauh zawi ngawih ngawihnate leh mitvaihnate a thlen theih bakah Voice fatigue te a thlen thin.
5. ADRENAL GLAND: He gland hian thin te; mit tui (bile secretion) te siamtu leh thununtu a ni a; thisen kal vel leh blood pressure te a thuam thain a thunun thin.
He gland hian tuihnang a tlakchhama a ro/hul chuan zahzumna, inthlahrunna, nguaina leh chauhna te, BP sang, luak chhuak, Luna Siamin thauchhia a siam thin.
6. PANCREAS GLAND; Hei hian taksaa thlum tam lutuk tur vengin chaw paitawihna (Digestive juice) thatak a thlen thin.
He gland hian tuihnang a tlakchham chuan zunthlum natna; BP hniam leh glucose tlakchhamna (Hypoglycaemia) a thlen thin.
7. OVARIES/TESTES & SEX GLAND: He gland hian Taksa lumna Siamin digestion of phosphorus a thlen thin.
He gland hian tuihnang a tlakchham chuan fa neih theihlohna te, thi neih that theihlohna te, serh hrawt chinnate a thlen thin. Tin, Taksa lumna a tibo thei a, uchuak taka sex hman duhna emaw sex hman chak miah lohna a thlen thei bawk.
8. LYMPH GLAND: He gland hian Taksa pan hnai leh pun turte vengin natna hrik kai/darh turte a veng thin. Taksaa tur tam turte vengin taksaa cell thi tawhte a thianfai thin.
He gland hian tuihnang a tlakchham chuan thisen thlumte leh lymphocytosis cancer-te a thlen thin.
ENDIK DAN (DIAGNOSIS):
Heng gland hrang hrangte hnathawh leh pawimawhnate leh hna an thawh that theihloha taksaa a nghawngte kimchang taka tarlan sen a ni lo.
Engpawhnise, henghovin tuihnang (fluid) an tlakchham avanga natna lo lang chhuak thinte finfiah/endik dan hi mihring kut phah leh kephah atangin awlsamtea hriat theih a ni. Stethoscope; MRI etc. ngai lovin natna hrang hrang a hriat theih a, hetianga endikna hi Acupressure tih a ni. Hei hian natna hriat/finfiahna chauh ni lovin Damdawi ngai lova awlsamtea natna tihnawm/tihdam leh chhawk zangkhai theihna a keng tel thei a ni.
ENDIK HUN LAI:
Heng gland-te tlakchham hriat hun lai leh siamthat hun lai hi naupang kum 5-15 inkar an nih hun lai hi hun tha bera ngaih a ni. Hetiang hun laia tha taka acupressure hmanga enkawl an nih chuan an Puitlin hnu thlengin natnain a bawhbuai ngai meuh tawh thin lo. Chuvangin, enkawl hun lai ngaih pawimawh hi invenna tha ber a ni. "Tihdam aiin inven a tha zawk" tih thufing hi vawn reng a pawimawh hle.
Puitlin hnuah pawh acupressure hmanga natna finfiah leh tihdam hi damdawi ei vak vak aiin taksain a tuar lo zawk a, dam a chiang zawk bawk. Mahse, a enkawl chhung hi a rei a, a rah a lan vut vut loh avangin mi rilru hmanhmawh tan chuan dawh theih leh nghal peih a har a chuvangin, mi tam takin tha ti hle thin mah se Course an la tluan peih thin lo. Natna azirin emaw a nasat tawh dan azirin Course khat rei zawng a inang lova a then chu ni 7 chhung te; ni 10 chhung te; ni 15 leh ni 40 thleng enkawl ngaite an awm thin.
A TAKA TAWN HRIAT:
Ka hnena lokal damlo pakhat chu uluk taka ka ka endik hnuah a thyroid gland-in tuihnang (fluid) a tlachham tih ka hmuhchhuahsak a; a aw a khur nasa hle a, a hawiherin vanlamah a dak thei lova; a Zai thei bawk lova, a chau ngawih ngawih a; a tawng sual nawk nawk thin. chuvangin, damdawi ei lovin ka hnenah ni 7 chhung lokal tura thurawn ka pek angin tuktin khel lovin ni 7 chhung a lokal a, acupressure hmanga uluk taka treatment ka lo Pek hnuah in lamah amaha a inenkawl zui dan tur ka hrilh zui a, thuawih taka thurawn a zawm avangin tun thlengin a dam that chhoh zel thu Telephone-in min rawn hrilh a a lawmawm duh hle. Amah ai mahin ka lawm zawkin ka hria
Hetiang bawk hian mipa naupang kum 6 mi pumna reng thin hmun hrang hranga an entir hnu pawha tha tak tak thei lo, a pain a rawn hruai a; uluk taka ka lo enfiah hnuah a solar plexus a dik lo tih ka hmuhchhuah hnuah vawi 3 ka adjust sak a, tun thlengin damdawi chawh lovin a dam tha chho zel tih a pain min hrilh a, a lawmawm duh kher mai.
DAMDAWI NGAI LOVIN:
A hun taka khing gland khi enkawl a nih chuan damdawi allopathy/herbal/ayurvedic/homeopathy etc. ngai lovin damlote enkawl dam theih a ni a, a nasat tawh hnuah chuan a harsa tawh a, loh theih lohva damdawi hman a ngai thin a ni. Tunlai thiamna hmanga damdawi siam chhuah awm hma daih Harrapan civilization etc lai pawhin damdawi hmang lovin kut phah leh kephah atangin hetianga tihdamna hi an lo hmang tangkai tawh thin a ni. Chuvangin, damdawi chak pui pui nghawng tha lo tak nei ei vak vak ngai lo turin mahni awmhmuna awm chung pawha awlsamtea inenkawl damna hi kan hmelhriat chhoh zel a pawimawh hle.
A TLANGKAWMNA
Natna a nasat hnua tihdam tuma damdawi chak pui pui hmanga inenkawl hi thingbuk a zung atanga chhat si lova a lera hlawi rem tum ang a ni a, engemawchen han dam thin mah se a hnuah a rawn thualleh a, a tawpah chuan thihna hial a thlen thin. Chuvangin, a hun laia inven hram hram hi uar chho zel ila tun ai hian kan lo hrisel zawk ngei ang.
Post a Comment