SCHOLARSHIP EXAM MIZORAM: Ni 14th July, 2018-a MYC leh ALS IIT-JEE & NEET Scholarship Examination buatsaih result chu ni 21.7.2018 khan tihchhuah a ni a. He exam hi Mizorama Class-XI (Science) zirlai naupang 926-in an exam a, Northern Mizoram Zone Centre, Aizawla Gov’t. Mizo HSS-ah naupang 764-in exam hi pein, Southern Mizoram Zone Centre, Lungleia Gov’t. HSS-ah naupang exam hi mi 162 an awm bawk.
Northern Mizoram Zone Centre, Aizawlah St. Paul’s HSS atangin Swagatalokhi Bhattacharya chu hmeichhiaa titha ber niin, 60.75 a score a, St. Paul’s HSS atang bawkin Lalawmpuia chu mipa zinga titha ber niin, a ni hian 53.75 score-in, anni pahnih hi NEET category ve ve an ni. Southern Mizoram Zone Centre, Lunglei atangin Baptist HSS zirlai Judy Lalpekhlui chu hmeichhiaah pakhatna niin, a ni hian 38.75 a score a, Baptist HSS zirlai vek C.Lalnunthara chu mipaah pakhatna niin, 35.5 a score a, anni pahnih hian NEET an thlang ve ve bawk a ni.
Northern Mizoram Zone Centre, Aizawla Topper pahnihte hi MYC Chairman Pu Joseph Lalhimpuia chuan ni 23.7.2018 khan a Office Chamber-ah Topper Trophy a hlan a, Lungleiah pawh he chawimawina hun hi Gov’t. J.Buana College Principal Office-ah hman a niin, Prof. J. Zorema, Youth Commission Member-in lawmman hi a hlan a ni.
IIT-JEE & NEET-a Mizoram zirlaite an tlin theih nan MYC leh ALS chuan thawh dunna siamin, Class-XI (Science) zirlaite tan he Online Coaching hi MYC chuan a buatsaihsak dawn a . Online Scholarship exam-a tlingte hian Thawhtanni - Zirtawpni tlai dar 4 p.m. - 6 p.m chhung nitin coaching an kal thin ang a; kumin 2018-19 session-a mite tho hi kum 2019-2020 session-ah MYC chuan Coaching a pe chhunzawm leh dawn bawk a ni. - DIPR
Post a Comment