MIZORAM ENVIRONMENTAL PHOTOGRAPHER: Vawiin chawhnu khan Political Adviser to Chief Minister Pu Lalrinmawia Ralte kaihruaiin a office-ah Association for Environmental Preservation(ASEP) chuan chawimawina hun an buatsaih a. He hunah hian Environmental Photographer of the Year 2017 hnena lawmman hlanna leh environment humhalhna kawnga thawk tha zualte chawimawina hun hman a ni.
ASEP in chawimawina hun a buatsaih a khuallian Political Adviser to Chief Minister Pu Lalrinmawia Ralte chuan, "A bik takin Mizo te hi kan chhehvel luahkhat tu ramngaw, thing leh mau, nungcha te bakah kan chung van thengreng cheimawitu romei leh chhum te zawng zawng nen thuk taka inzawm leh inthlung kan ni a. Kan chhehvel ngawdur, thingpar rimtui leh nungcha hram rimawi te hi Zofate lung ti lengtu leh min tihlimtu an ni a. Chuvangin min hualveltu, environment kan tih mai humhalh hna hi ASEP hnenah chiah papek mai lovin Mizo mipui te hian kan mawhah kan lak theuh a ngai a ni. Kum 40 chin chunglam mithiam pui pui zingah pawh environment humhalh vei lo hrim hrim kan tam ta lutuk te hi khua kan tlai hmain kan inenfiah a hun hle a ni. Kan naute, kan tu leh faten environment humhalh nachang an rawn hre chho hi thil lawmawm tak a nih lain rual u zawk te chuan a zahthlak rum rum a, inenfiah na kan hman angaiin kan thlawp hle tur pawh a ni", tih a sawi a . Thalak hmanga Mizoram leilung mawina leh nungcha mawi tak tak phochhuah te chu a humhalhna kawnga zirtirna a nih piah lamah rampawnlam khualzin mite hipna hmanraw remchang ber pakhat leh Mizoram pholanna remchang a ni tel bawk a ni a ti. MIZORAM ENVIRONMENTAL PHOTOGRAPHER
ASEP in chawimawina buatsaih hi ASEP President Pu K.Lalmuansanga'n a kaihruaia; Environmental Photographer of the Year 2017 thlan a nih dan report tawi a pe bawk a ni. Environmental Photographer of the Year 2017 thlang chhuak tur hian ASEP chuan an Facebook Group-ah thlalak tarchhuakin vote an chhiar a, huntiam a ral hnuah vote hmungsang zual thlalak 10 te chu thlang chhuak lehin chung thlalak thazual 10 thlanchhuah te chu Screening Committee in a lo endik leh hnuah top 3 chu thlan chhuah a ni. Environmental Photographer of the Year 2017 atan a thlalak thazual pathum thawhtute chu Pu Vanlalrawna Sailo, Chanmari, Pu Lalsiamliana Chinzah, Lunglei Serkawn leh Tv Lalhmachhuana Varte, Tlangnuam te an ni a. An zingah hian Vanlalrawna Sailo, Chanmari chuEnvironmental Photographer of the Year 2017 ah puan a ni a, chawimawina thuchei leh sumfai Rs.10,000/- hlan a ni. Anni bakah hian ramngaw siam leh humhalh kawnga thawhhlawk, thingthiak phun tur tam tak kumtina kui tiak thin Tv P.C.Lalrinzuala, Maite khua leh Herhse Ngaw siamtu Pu Lalthuama Sailo(Fam), Chhippui khua a mi te hnenah chawimawina hlan a ni bawk a.
ASEP chuan Environmental Photographer of the Year leh Environment humhalh kawnga chawimawitlak chawimawina chu kumtin buatsaih chhunzawm an tum a ni. -DIPR
Post a Comment