Mak danglam takin i dul chu alo thang lian zel a, awih harsa iti em em a. I han en leh thin a, mit ngeiin i hmu bawk si. Nau i pai ve ta.Chhungkaw mawhphurhna i chunga lo tla tur chu i phur tak tak dawn ta a, zinkawng nuam si, hrehawm bawk si chu a takin i zawh tan dawn ta a ni.
Rai lai hian taksaah eng emaw hi a thleng fo thin a, chi-ai emaw phili buai loh tur a ni a, thil thleng pangngai taka neih tur a ni zawk. Chutih laiin, a hma atanga lo invenlawk leh inbuatsaih lawk hi a pawimawh em em a, i tan mai ni lo- naute lo piang tur tan khan engkim a tha thei ang bera ruahmanna siam lawk hi a finthlak hle.
Mi khabe liam i lo ngaihthlak tawh leh nangmah ngei pawhina i lo chhiarte chu a takin i taksaah khan a thleng ta!! En liam ve mai mai theih a awm laiin, thenkhat erawh uluk taka enfiah ngai chi leh doctor rawn ngei ngei ngai te a awm a, hlauhawm a hnaih theih avangin rai laia thil thleng thinte hi hriat ngei ngei a tha.
Insawiselna
Thenkhatin engmah hre mumal lo leh harsatna em em nei lova rai lai hun an hman laiin, thenkhat erawh chuan harsatna an tawk a, mipa chi leh hmeichhe chi an inpawlh lai vel hian eng emaw tiriaua hrehawmna an nei thin.
I luak a chhuak ang a, i chau ngawih ngawih bawk ang. I vun mam nalh tak tak thinte kha a lo khawro tan ang a, i hawi her vel hrim hrim pawh a rit hle dawn a ni. Thla 1&2 inkarah hian a zual hle thin a, a thla hnih naah phei chuan placenta ina a tihchhuah hormones nasa lutuk avang hian a chunga tarlante khi a thleng nasa thin hle a, thla thumna vel atang chuan a pangngai ve leh mai thin.
Awmnawm lohna
Chaw pai tawih harsatna te leh phing lama harsatna vangte hian rilru a hrehawm duh hle a, zâng ruh a kul deuh thin avang pawh hian zângruh a nain, a kham ngawih ngawih thin bawk. Hetih lai hian a chhawk nana damdawi ei hi chin loh a tha hle a, a chhan chu naute tan a pawi theih vang a ni. Heti ang lo deuhin zawi deuh raiha insawizawi te, malise leh chawlh hahdamte hi tihzawk tur a ni a, tawrh zawh rual loh nia inhriatna i neih erawh chuan doctor pan vat ang che.
Thisen a chhuahin
Thlatir lama thisen chhuak a awm deuh reng chuan naupaiah thil fel lo a awm tihna a ni a. Tin, thla 2&3 naah thisen chhuak reng pawh hian naupaia harsatna lian tak a thleng tih hriattirna pawimawh tak a ni a, uluk taka enkawl a ngaih hun lai tak a ni.
Thisen asângin
Rai laia thisen sâng neih hi thil awm thei tak a ni a, a khat tawka inentir a tha hle. Hei hi Toxaemia an tih mai, nau neih dawn tepa thil thleng thin a ni a, nu leh naute tan a hlauhawm hle tih hria a, eng emaw insawiselna i neih chuan phun phun lo leh insawisel reng loin doctor thurawn la fo zawk ang che. ~ Zozam Times
Post a Comment