Bairabi Zofate ChawlhbukZofate ram humhalh nana Zofate Chawlhbuk sak tumtu thalai rual, zan thum vel Bairabi dai Zophaia riak tawhte chu an tukthuan eikham an kalkhawm a, Pathian puihna dilin an tawngtai rual; chumi zawhah an tum ram panin an thawkchhuak.

MZP hruaitu parukin Chawlhbuk sakna tur thingzai ('do tin') an pu a, an hnungah an naute'n kelawngin, tin, kutlawngin an zui. Chawlhbuk sak phal lotu Assam Police rual, silai nena inring renga dingte lam an pan. Mizo thalaite'n hma lam an pan, Assam Police te'n hnung lam an pan. Metre 100 vel lai chutiang chuan an inzui; Mizo thalaite hi hma lam pana an kal laiin Assam Police erawh hnung lam panin an kal.




An thleng ta.

Ban an phun a, pathum an tung hman. "Fire..." tih thawm a lo ri. Silai thawm a lo ri. Thil rapthlak a thleng a, kum tam liam hnu pawha han hriatchhuah changa mihring min tiphu dawrh dawrh thei tur khawpa rapthlak a ni, chu thil chu.

Chawlbuk sak tumtute kha ram inchuhtu state pahnihin an tan lo ve ve; Mizoram lamin, 'Sak in tum lui a nih chuan keini paw'n kan tih tur kan ti ve ang,' tiin an thlah a, Assam lamin, 'In sa a nih chuan kan tih tur kan ti ang,' tiin silai nen an lo chang ve thung.

A lehlamin uniform an hak thap laiin keini lam chu an "uniform" a inang lo thap! A lehlamin hlawh an neih laiin keini lam chu mahni chhungte leh thil tul dangte kalsana thawkchhuak an ni. A lehlam kha an tih tur tia thawkchhuak an nih laiin keini lam chu an tih tur ni hauh lo ti tura thawkchhuak an ni.

Chutiang chuan ralthuam emaw hmanrua emaw engmah nei lo thalai rualin chengrang chawi sipai rual, a zira zirchhuak ngatte an hmachhawn a nih chu! Chutiang chuan thawnthu phuah ta ila, chhiartute'n an awih kher lo ang tih tur khawp a ni, chu thil chu.




Kan hnam hi mi hian dawih min ti em? Ka hre lo. Mi hnamin engtin nge min sawi? Ka hre lo. Kan zingah, kan unaute zingah ngei hian hnam dawih, engmah ti tak tak ngam lo anga insawi thin an awm tih erawh ka hria a, intithahnemngai zeta chutianga pau thin chu an awm tih pawh ka hria. Aw... "Mizo hi chu kan dawih khawp a... A dawih tawk velin kan Kristian a... Engmah hi kan ngam tak tak lo chuti khati," lo ti tawh zawng zawngte khan khami ni-a thil thleng kha lo hria se ka va'n duh em!

Ralthuam famkima infam sipai rual meuh kutlawnga hmachhawn ngam, virvawm leh lungte tak ngial pawh keng lova thawkchhuak ngam Zo hnahthlak val rualte ka chhuanzia hi aw! Lukhum za chuang khum ila, anmahni zahna lantir nana phelh vek ka nuam e! Zahawm nana car man to an neih kher a ngai ve lo, keimahah chuan.

March ni 10, 2018.

Post a Comment

Powered by Blogger.