CHIEF MINISTER IN MISSIONARY CHAWM NAN Rs. 72,000/- KUM 2018 ATAN LIKBK AH A PE LEH TA
Kum 2012 khan Lairam Gospel Centenary lawmna hun Lawngtlaiah neih a ni a, Chief Minister Pu. Lal Thanhawla chuan he hun hi hmanpuiin, thusawina a nei a, "Lairam Isua Krista Baptist Kohhran(LIKBK) ah hian Missionary kan chhungkuain kan lo chawm ve a nge" a ti a, LIKBK Assembly chuan Chief Minister thusawi hi lawm takin a pawm a, a intiam ang ngeiin kum tin Rs. 72,000/- (Singsarih leh sanghnih) Missionary chawmna atan Pu. Lalthanhawla Chief Minister chuan LIKBK ah hian a pe thin a, Kumin atan pawh Rs. 72,000/- hi June thla khan a pe leh a ni.
LIKBK ah hian tunah Tualchhung Kohhran 110 (za leh sawm) awmin, Pastor Bial 21 (sawmhnih leh pakhat) ah then niin Kohhran chhungkua 5535 (sangnga zanga sawmthum leh panga) an awm mek. Kohhran member hi an vaiin 28868 anni a, Pastor 36, Pro. Pastor 8, Kohhran Upa 658, Kohhran Rawngbawltu 914 an awm mek a ni. Mission Field hi panga an enkawl mek a, partnership Mission hnuaiah ram pahnih ah Missionary an tir bawk.
LIKBK hi Kohhran thang duang tak anni a, an Kohhran Zaipawl Assembly Choir te pawh zaia rawngbawlin khawvel ram hmun hrang hrangah kal ve tawhin, kum 2015 khan USA ah an kal a ni. Tin, LIKBK hian School 22 (Higher Secondary School - 01, High School - 01, Middle School - 03, Primary School - 17) an enkawl mek bawk.
LIKBK chuan Chief Minister hnenah hian Missionary chawmtu te hnena an pek thin Certificate an hlan nghe nghe a, hetianga ram hruaitu lu ber, Missionary ngaipawimawhtu kan nei hi a thlamuan thlak hle a ni.
Post a Comment