~ By Zo Sanga
Hnam fing leh ropuite tih tura kan ngaih, mi dangte fak leh chawimawi hi kan hnam a lo fing ta em a; chuvangin, a nachang kan hre thar ta tihna chu a ni lo. Kan Sakhua inzirtirna leh inkhaihhruainain a kentel tlat vang zawk a ni. Tawngkam chauhva infak leh chawimawi , mahse a taka hman kan harsat tlat hi chu infakna leh inchawimawina dik tak erawh a ni lo ti ila, ka tisual thui chuan ka ring lo.
Ka lehkhabu ngainat leh duh em em ṭhin Pu. Mafa Hauhnar lehkhabu hi neih ka chak ve ṭhina, khawvel leh lama awm tan chuan neih mai theih dan pawh a tam lo hle . A chhan pakhat chu Mizoram lehkhabu print tam tak, leisen loh an awm laiin ani lehkhabu hi chu a zo hma ṭhin em a, chuvangin ka chang ve ngai lo. Amaherawh chu, vanneih thlak takin Professor Dr .C Lawmzuala MZU Laibrarian leh Nl Lalbiaksangi (Bsi) te zarah a lehkhabu bu-3 lai chu ka hmu ve ta e. Ka va han ngaihlu tak em! Amah Pu. Mafa-a hian hetiang tak hian a lehkhabute hi kan ngaihhlutsak a ni tih hria se, a lawm ve ngei chuan ka ring a ni. A kawm leh lam aṭangin leh lam inkara mi zawng zawng hi chu abung abang awm lovin ka chhiar chhuak dap, a ṭhente phei chu ka chhiar nawn fo bawk. Lehkhabu chhung thu leh a lehkhabu chanchin erawh sawi ka tum lo .
Mi tam tak rinna leh thlarau lama pasal ṭha- changsang leh chang thuk nia inngai, fel u chuak tak tak te sawi hreh chu chu a lehkhabu chhungah hian ka hmu ṭeuh mai hi amah leh a lehkhabute tihlutu a ni ka ti lo thei lo. Kohhran rawngbawltu ṭha anga kan ngaih tam takte leh Pastor chenin harsa an tih em em mi mawina sawi leh fak (credit pe ) zawnga, an chanchin a han ziahsak thlap thei hi ka ngai hlu a, ka ngaisang a, tunlai ṭawng takin ka Salute a ni. Hei hi Chanchin ṭha azawnga a ṭha ber pawl chu a ni hial awm asin! Mi tam zawkte chuan mahni mawitelna anih dawn lem loh phei chuan man nei pawhin an tih duh miah loh tur a ni . Hetiang mi hi alawm rawngbawltu tam tak, eiruk avanga hausa thur thur, an tawng theih em avanga a zawn a an zawn ṭhinte aia Mizo mipuiten kan mamawh fe zawk chu! DL Moody-a pawh khan, “ khawvela nu zawng zawng hi ka nu ang nise, Jail hi a awm a ṭul lo vang,” a tih ni. Chutiangin, keini pawhin mi dangte ṭhatna lai va hmuhsaktu leh an ṭhatna lai ziaka dahsaktu ni ngam ta ṭheuh ila, kan khawtlangte, kan kohhrante hi a nuam ngawt ang le. Tichuan, mi sual hi an awm thei dawn em ni? ka ti ṭhin. Mi tin hian chak lohna, tlintawk lohna leh famkim lohna kan nei vek. Khawvelah mi tumah mi famkim reng kan awm lo. Chawimawina hi ka pek tur nise chuan mi dangte thatna lai leh an ropuina lai hailansaktute hi ka ngaisanga, chuvangin anni chu chawimawina ka pek hmasak ber turte a ni ngei ang.
Lehkhabu dangah pawh mi dangte thatna lai faktu erawh hmuh tur an tam, mi tumahin an harsat em em lo. Lehkhabu ziak khawi emaw laiah chuan hmuh tur pawh a tam mai. Tin, lawmthute pawh an inhrilh fo thin. Mahse, enga tinge? ani erawh hi chuan tihsaktu a neih ve loh? An chanchin a ziahsaka te hian tunge a nih pawh an hriat miah lo tur lamin an chanchin ṭhalai leh entawn tlak tak tak chu public education platform- ah a rawn chhawp chhuak zar zara, heng a ziahsaka te hnen aṭangin donation a dawn an sawi pawh ka hre ngai lo. Donation lo dawng tawh emaw, dawng dawn ta emaw pawh nise, a thikawm loh hle ang.
Lehkhabu ziah hi thil na mai lo tak a ni tih chu hrilhfiah vak kan ngaih ka ring lo. Mi dawizep leh mi phakar tan phei chuan hlauh tur a tam em avangin lehkha ziah hrim hrim hi a ngam awm loh. Chutiang karah chuan lehkhabu bu 8 ngawt a chhuah tawh a, kum 22 mi lek a nih aṭangin lehkhabu ro tling ṭha tak a chhuah tawh nghe nghe a ni. Heng lehkhabu a ziah bakah hian chanchinbu lamah nitin chhuak, thlakip chhuak leh a behbawm dang a ziah zawng zawngte han ngaihtuahin ‘ Mizo paah chuan lehkha hi a ziak hnem ber ang’ ka ti fo thin. Hetianga mi ropui,fak phu leh chawimawi phu hi a nachang hriaa, kan chawisan hian keimahni leh kan hnam, kan ram thleng hian a tiropui thei a ni tih hi ka sawi nawn ve hrim hrim duh a ni e.
A tawp lama ka han tuihnih duh chu a Mizo ṭawng hrim hrim hi a thu a hausa, ṭawngkam buangrua a nei ṭha em em a, chu bakah Mizo- ten kan ngaihsan em em Sap ṭawng pawh a chepakai tak meuhvin a thiam ṭha em em bawk. Chung thiamna zawng zawngte nei tur chuan lehkhabu hi a chhiar nasat em em a ngaia; tin, a chhiar pawh a chhiar nasa reng a ni . Ama ṭawngkam ngei mai a sawi chhinchhiah tlak em em chu, “ Lehkha chhiar lo va mut mai ai chuan pawl thum zirlai pawh hi ka chhiar,” a ti a ni. Chutiang khawpa chhiar zau leh chhiar tam lehkhabu ziah chu a man hla renga, a lehkhabu chhuah ṭhinte pawh hi phungzinga piring vawrh ang maia chakin hralh a kal reng a ni. Hnam dang zingah phei zawng nise amah chauh hi millionaire ni thei hial khawpin company lian leh ṭhaten an dawr vut vut tur hi a ni asin. Keini a Mizo puite hian ngaihhlut nachang kan hriat hi a ṭul tak zetin ka hria . Pu. Mafa dam reng ang che. I hnung kan rawn zui dawn a che.
Post a Comment