ISRAEL-IN GAZA STRIP A BOMB : CT LALRINAWMA - TIMES OF MIZORAM

20 Jul 2018

ISRAEL-IN GAZA STRIP A BOMB : CT LALRINAWMA

ct lalrinawmaJuly 21, 2018 (MSR): Nimin tlaiah Israeli Defense Forcs te chuan Hamas helten rockets/ mortars, etc hmanga Israeli Security officer pakhat an kah hliam thih hnu lawkah, Gaza Strip a Hamas ralthuam dahna hmun puite chu aistrike hmangin an bei zui ta nge nge; Hamas fighters 4 an thi. Heng thi zinga pakhat hi chu Gaza ramria inkahna vang a ni. Kum 2014 hnua Israel sipaite chet nat ber tum tih a ni.





PM Benjamin Netanyahu chuan Defense Minister Avigdor Liberman angin, Israeli Defense Hqrs a tlawh hnu lawkah, airstrike hi nasa zawkin an neih chhun zawm ta a ni. Defense Minister Liberman chuan, “Hamas hoten an thiltih thin, Gaza Strip inrina hmuna buaina siam leh rockets a Israel ram chhung an rawn kah fo thin an tih tawp loh chuan, an rin leh beisei aia nasa zawkin kan bei let dawn a ni” tiin a vau a ni.

Middle East a UN palai Nikolay Mladenov pawhin Israel le Hamas hote chu indona nasa zawk tichhuak thei laka fimkhur turin a ngen a, Hamas-Palestinian hote pawh ramri bul atanga tawlh hla turin a phut a: “Karleh emaw, naktukah emaw ni lovin, TUNAH tawlh kir rawh u” tiin. Israel thin thawk an tawrh zawh loh a hlauh pui em a ni!

Mahmoud Abbas, PLA President chuan, International community inrawlh thuai turin a phut a ni. US chuan, Israel chuan mahni inveng turin dikna a nei, tiin Israel a tan thu a sawi tawh a ni.





Hetih lai hian US Special Envoy Jared Kushner leh Michael Greenbolt leh US Ambasador to Israel David Friedman te chuan Hamas hote chu an thiltih thin “tharum thawhna” an bansan chuan US inbiakna neih pui a, Gaza Strip hmasawnna tura hmalak pui an tiam a ni. Mahse, Hamas hote chuan hetianga an sawmna hi lo hnawl sakin, Jared Kushner te ho chu “Kan ram luahtute aiawha thupuangtute an ni e” tiin, an thu leh hla an lo bengkhawn duh lo.

US Middle East Envoy te chuan Gaza Strip a hmasawnna (development) thuanawp ta chu Hamas vang a ni, tiin an puh zui ve bawk. Tunkar liam ta khan Hamas-Palestinian hote chuan rockets/ mortars 200 in Israel ram chhung an kap a, tam tak chu Iron Dome hmanga lo kahthlak a ni. Gaza leh Israel inrina lai khaw chheh velah chuan ral kher dar an vaw ri fo mai.

Israel chuan hetianga Palestinian hoten Israel ram chhung beihna an chawlhsan loh chuan, lei lama beihna (ground attack) neiin, Gaza Strip luh leh mai an hreh lova, tun maiah erawh chuan Gaza City luhchilh an tum lemlo niin an sawi. Thuthangah chuan Egypt hmalaknain Hamas leh Israel inkarah inkahhai (ceasefire) awm tura inbiakna neih mek a ni, an ti. Ngam loh chala chil hnawm ching Hamas-Palestinian hote hian an tawrh phah leh chiam ang tih a hlauhawm thin teh e. UN Human Rights Council lah chuan Hamas tharum thawhna dem thu an sawi duh mang si lova! ~CT Lalrinawma



No comments:

Post a Comment

Post Bottom Ad