Chanchinthar Mizoram: Vawiin khan Mizoram University (MZU) leh Pachhunga University College (PUC) hnenah International Organization for Standardization (ISO) Certificate hlanna hun MZU Auditorium-ah hman a ni a. Higher & Technical Education Minister Pu R. Romawia chu Khuallian a ni.
Khuallian Pu R.Romawia chuan ISO Certification MZU leh PUC ten an nei thei chu lawmawm a tih thu sawiin thil chhinchhiahtlak tak a nih thu a sawi a. Zirna in pahniha zirtirtu leh hnathawkte thawhrimna leh inpekna vangin he dinhmun hi thleng thei an ni, a ti a. MZU leh PUC hi North-East zirna in zinga ISO Certification nei hmasa pawl an ni, a ti a. ISO Certification chu zirna in ten hma an sawn zel theihna tura ban pawimawh tak pakhat a nih thu a sawi a. He hmasawnna hian kawng tam takah zirlaite pawh a pui ngei dawn a ni, a ti a. ISO Certificate field dang hrang hranga an hmuh zel theih nan thahnemngai taka tan la turin a fuih a. Mizoram University Southern Campus neih theihna turin ruahmanna siam a nih thu a tarlang a. MZU leh PUC te chu an kal zelna turah duhsakna a hlan nghal a ni.
July Ni 8-10, 2018 chhung khan HYM International Certifications Pvt.Ltd Hyderabad atangin Certified ISO Auditor Pu Sivaiah Alapati chuan Mizoram University leh Pachhunga University College ten ISO Certification an nei thei nge theilo endik hna a thawk a. MZU hian ISO Certification 4 dilin ISO Certification 9001 2015 Quality Management System, ISO 14001 2015 Environment Management, ISO 50001 2011 Energy Management leh ISO 27001 Information Security Management System an nei thar a, PUC hian ISO Certification 2 dilin ISO 9001 2015 Quality Management leh ISO 14001 2015 Environmental Management an nei thar a ni. International Organization for Standardization (ISO) hi Non Governmental Organisation niin headquarter Geneva-ah an nei a. Khawvel pum huapa tehfung siamtu niin quality sang zawk neih nana hmalatu an ni. India ram chhunga zirna lama council pawimawh tak National Assessment and Accreditation Council (NAAC) ten zirna in an tehna atan ISO Certificate hi a pawimawh hle a ni.
MZU Internal Quality Assurance Cell (IQAC) Director Prof. Lalnundanga chuan kalkhawmte lawmna thu a sawi a. MZU VC Prof. KRS Sambasiva Rao chuan ISO certification zirna in tana a pawimawhna a sawi a. HYM International Certifications Pvt.Ltd Managing Director Pu Sivaiah Alapatti chuan thusawina hun a hmang a. MZU Registrar Pu C. Zothankhuma’n lawmthu sawina in hun a khar a. PUC ten quality management atana booklet an siam tlangzarh a ni bawk. He hunah hian MZU leh PUC zirtirtu leh zirlaite an tel a ni.-DIPR
Post a Comment