Chakma Autonomous Dist. Council (CADC) sorkar kaltaa Congress MDC 12 leh official 2-te’n ei ruk thubuai neiin Tan Inah khung an ni dawn niin MNF Party chuan an sawi.
Hemi chungchang hi nimin khan an Gen. Hqrs Office, Aizawla Mizo Hnam Runah MNF Vigilance Committee Secretary Pu David R. Lalsawmtluanga’n sawiin, heng MDC leh Official 2-te hian an ukil-te kaltlangin anticipatory bail dil an tum niin a sawi.
Pu David R Lalsawmtluanga chuan, CADC-a Congress sorkar eirukna chu Governor remtihna angin District Council & Minority Affairs Dept chuan a chhui turin nikum July ni 11 khan One Man Enquiry Commission a din a, chu Commission Dr. A. Muthamma chuan a thil hmuh dan nikum vek August ni 8 khan Mizoram sorkarah a thehlut a. A report-ah chuan CADC-a Congress sorkarin dik lo takin sum a khawih chingpen tih ziak langin, a tidik lotute chungah Mizoram sorkarin dan anga hremna lek kawha criminal case siamsak an nih theih nan hma la se, tiin rawtna a siam a. Hei hi nikum August ni 25 khan Governor-in a pawmpui nghe nghe, a ni, a ti a.
He Commission report-a lang, Cheng Vbch 1 leh Nuai 7 la ringawttu, khatih laia CEM Kali Kumar Tongchangya laka thubuai siam a ni ve tlat lo chu mak a tih thu sawiin MNF Vigilance Comtt. Secy. chuan, Kali Kumar Tongchongya-a lakah pawh hian sorkarin thubuai a siam ngei an party chuan an phut thu a sawi bawk a. CADC sum hman dan dik lo tak hi One man Enquiry Commission report bakah Assembly Session hnuhnung bera Finance Minister-in CAG report a pharh tak phek 53-naah ziah lan a ni a. Phek 54-naah, ‘State Sorkarin heng dik lo taka mipui sum khawihna chungah hian FIR a thehlut tur a ni’ tih ziak a ni bawk, a ti.
MNF Vigilance Committee Secretary Pu David R Lalsawmtluanga hian CADC sorkar kaltaa MDC thubuai nei turte hi Aizawlah lo phei vekin, vawiin hian Anticipatory Bail hi an dil ngei a rin thu kan Corr. a hrilh a ni.
(AIR Aizawl)
Post a Comment