PI CHALNAWNI CHANCHIN TLANGPUI 1937 - 2018

Pi Chalnawni hi Upa Mawnglinga(L) leh Pi Nuchini(L) te fa sawm leh pahnih (12) zinga a upa ber ni turin Ni 27th July, 1937 khan Thingkah (Lawngtlai District)-ah a lo piang a. A Unaute hengte hi an ni-

1) Rev.MZ.Lawmthanga H/o Zachuangi(L), Lawngtlai

2) Zadinga(L) H/o Thlawksangi, Lawngtlai

3) Khuanghnuni W/o Lianchhawna(L), Thingkah

4) Upa S.Lalrinawma H/o Lalruali, Thingkah

5) Chhuankima Sathing H/o Lianhnuni, Thingkah

6) Siammawia Sathing H/o Dingliani, Thingkah

7) Biakchungnunga Sathing H/o Hranghlunchhungi, Thingkah

8) Lalnunmawii W/o K.Lalhnema, Lunglawn, Lunglei

9) Lalzokimi W/o T.Lalzarzova, Chanmari, Lunglei

10) Zolura Sathing H/o Lalhmunsangi, Thingkah

11) Remkimi, Thingkah

ZIRNA LAM: 

Thingtlanga awm an ni a, an khuaah school a awm ve lawk lova, naupang lian tawh tak a nih hnu-ah school an din ve chauh a, chutah chuan a naute pakhat pua in a dang a kai a, chutiang chuan school a kal ve thin. Amah hian lehkha zir nuam a tiin, a thiam pawh a thiam thei a, chutiang a nih avang chuan an hotupa pawhin duhsak leh hrethiam takin school a nau a hruai thin pawh a phalsak a ni. Amaherawhchu, lo lam hna thawk ve thei rual a nih tawh chinah a nu leh pate puih an ngaih avangin ui tak chungin school a chawlhsan a lo tul ta a; Primary pawh chhuak lovin school a chawlhsan ta a ni.

PASAL NEIA CHHUNGKAW DIN:

8th June 1954-ah Upa R.Zakhuma nen Thingkah Baptist Kohhran Biak In-ah Kohhran Dan Puitlingin an innei a, Pastor Thanzinga’n a inneihtir a ni. A pasal Upa R.Zakhuma hian ni 3rd June,1978-ah ropuina ramah a lo hawsan tawh a, chumi hnu chuan ani hian a tu leh fate a tulpui ta a ni. Fa pakua (9), Tu leh Tuchhuan sawmkua (90) a nei a, a fate chu :-

1) R.Thanziki W/o R.Tawnliana, Venglai, Lunglei

2) R.Lalkhumi(L) W/o C. Chal\huama(L), Bazar Kikawn

3) R.Lianzara H/o Lalmuanpuii, Venglai, Lunglei

4) R.Nuthangi (Te-i), Venglai, Lunglei

5) R.Ramthantluangi, Ramhlun Vengchhak, Aizawl

6) R.Thanzami W/o LP.Zorema, Venghlun, Lunglei

7) R.Lalnunziri W/o C.Lalnunpuia, Chaltlang, Aizawl

8) R.Sangthanpuii W/o Er.Lalrinngheta, Ramhlun Vengchhak, Aizawl

9) R.Thankhumi (Ma-i) W/o K.Lalbiaktluanga, Ramhlun South, Aizawl

EIZAWNNA:

Lehkha zir a chawlhsan dawnin taihmak leh tumruhna neih a ngai tih hria in rilru a inbuatsaihna fel tak a nei a, hna thawh hreh a nei lova, eng hna pawh a thawk bawrh bawrh zel a. Pasal a neih hma pawhin a naute kaihruai chungin a nu leh pa puiin a thawk bawrh bawrh a, chutiangin, pasal a neih a fate a han neih hnu ah pawh engkim hi a thawk vek tih mai turin thingpui dawr atangin Dawr a kai a. PWD hnuaiah Contract hna thawkin, lehkha thiam lo mah nise Mizo hmeichhe zinga Class-I Contractor hmasaber a ni hial em aw? tih a ni. A thawhpui ten hmeichhe awm chhun tiin an duhsakin an dah pawimawh em em thin a, Class-I Contractor Association, Lunglei District-ah hian Treasurer an nihtir thin a, tun thleng hian chu hna chu an la chelhtir a ni.

RAWNGBAWLNA LAM:

Pathian khawngaih kaihhruaina avangin Hruaitu nihna pawimawh tak tak a chelh tawh thin a. Lunglei Venghlun BKHP dintute zingah telin President hmasa ber a ni a, Venglai BKHP din a nih hian a dintute zingah tel lehin President hmasa ber a ni leh a. Pathian leh Kohhran hruaitute duhsakna dawngin Nilai zan hun changtu, hun pek theih tihah te an telh thin tawh bawk a ni.

Lehkha thiamlo mah nise, khawtlang leh Ram a veina te hi Pathian rawngbawlna ah a ngai ve tlat a, chutianga a ph^k tawka a chetve na chu Pathian pawhin a hriatpuiin mal a sawm a ni chek ang chu, a thawhpuite mi lehkhathiam pui pui pawhin an dah pawimawh ve tlat zel mai a; MHIP Sub-Headquarters President-ah Term engemawzat an chelhtir a, Adviser-ah te pawh an dah thin a ni. Tin, PCI Chairman a ni tawh bawk a, heng bakah hian Sawrkar hmalakna pawimawh tak tak Committee-ah hian an rawn telh thin a, chung chu a rawngbawlna a ngaiin a ngai pawimawh thin hle a ni.

Tin, a lawmna leh a ngaih pawimawh ve tlat thin chu Independence Day leh Republic Day ahte Sawrkar function pawimawh tak takah ani hi lehkha thiamlo mah nise an rawn ngai pawimawh em em zel mai te hi a ni. A dam a nih chuan kal ngei ngei hi a tum thin a, a rawng a bawl thin Pathian avang a ni tih a hria a; an sawmna tih hlawhtlin hi a tum em em zel a ni.

Para Church rawngbawlna lamah pawh mite hriat leh duhsakna a dawng nasa hle mai a, Committee hrang hrangah hian a tel ve thin a ni. Sinner’s Friend, Lunglei-ah Treasurer a ni a, Makedonia leh Z.E.M (Zoram Evangelical Mission)-ah Committee Member a ni mek bawk.

A NAT DAN:

Kum 2014 kumtir lam atang khan Diabetis (zun thlum) natna in a tlakbuak tan a. Sugar hniam leh BP sang avangte in Hospital a lut ta deuh chhen mai a. Hemi kum hian tum li (4) lai mai Hospital a lut a, Kohhran hote tawngtaina avangin a dam ve leh mai thin a ni.

Zunthlum hnathawh avangin BP hniam leh BP sang te, Sugar hniam avangte in kum 2015-ah pawh Hospital a lut ta deuh chhen mai a, a mit pawh zai ngaiin a lo awm chho ta a, Guwahati-ah tum hnih lai mai kalin an zai nghe nghe a ni. Kum 2016-ah phei chuan a lung lam a lo effect ta hial a, Calcutta-ah kalpui niin Pace maker an vuah bakah Lung Pipe an vuahsak ta hial a ni.

Chutianga enkawl chhoh a nih reng lai chuan kumin kumtir lam atang khan a nat dan a zual ta viau zel mai a. January thla khan engmah hre mumal lo hialin Serkawn Hospital-ah a awm a. April thla chawhnu lam khan a aia na mahin dah leh a ni a. He mi tum phei hi chuan a kal hlen tawh mai dawn em ni aw? tih turin a awm a. Lunglei-a Kohhran hrang hrangte bakah Zoram hmun hrang hrang atangin tawngtaipuina nasa tak a dawng a; chumi avang chauh chuan Pathianin a nunna a pawh sei sak leh ta a ni.

Tun tumah erawh hi chuan nat lawk pawh a nei lova, nimin piah (zirtawp ni 27th July,2018) kha a Birth Day a nih angin zan lamah a tu ten “I surprise ang u” tiin amah hrilh lawk lovin Birth Day Cake an zai pui a. A tute naupang te te te nena thla an han la ho a, Birth Day Cake an han inbarh te kha Amah pawhin nuam a ti ve em em mai a.

Chutianga hlim taka an awm lai chuan dar 9:00pm rik hma mah khan a thu han tho tur kha a thu leh ta hnawk mai a; engmah hre mumal lovin unconcious in a awm ta a ni. Motor buatsaihin Serkawn damdawi in lamah phurh chhoh a ni a. Kal hma-a a BP hmuh zawh loh kha damdawi in thlenpui a nih hnu chuan zawi zawiin a rawn awm ve leh a, amah pawh a biak theih a, tha chho zel tura ngaih a nih laiin hniam lam a pan tak zel avangin chaw ei kham hnu deuh khan ICU ah dah luh a ni a. Doctor leh Nurse ten theihtawp chhuahin Ventilator te nena tangin an enkawl a; Amaherawhchu, chawhnu dar 1:50 khan duhtaka a rawng a bawl thin Lal Isua hnena chawl turin a lei taksa chu a chhuahsan ta a ni. ~Gilbert Renthlei‎