PU LALDUHOMA THUSAWI REMNA NI THUCHAH - TIMES OF MIZORAM

Breaking

Home Top Ad

Post Top Ad

PU LALDUHOMA THUSAWI REMNA NI THUCHAH

PU LALDUHOMA THUSAWI

REMNA NI VAWI 32-NA, P.U COLLEGE, 30-6-2018

Pu Chairman leh thiante u,
    REMNA NI THUCHAH


Kan ramin zalenna a sual dan te, remna kan lo neih tak dante hi history (thawnthu) a lo chang tan ta der mai. History hi a hunlaia rorelna chelhtute duhdan zulzuia ziak hi a ni duh viau a ni ang - hei, tunah pawh BJP sorkar chuan Congress sorkar laia Indian History kha tihdanglam tumin hma an la mek tih kan hre hlawm awm e.

Kan remna thuthlung (MOS) pawh kan hrilhfiah dan leh kan sawi dan a inang lo hlawm viau mai. A thenin, “Indenpendent ram chhunga Independent ang kan ni” ti hial khawpa an sawimawi laiin, a then chuan Remna ni hi “Mizote tlawmna ni” tiin lawm tlak loh hialah an chhuah bawk a.





Lehkhabu leh thusawiahte hian a ziaktu emaw, a sawitu emaw mimal duh dan a tel thin avangin, a laiin a dik tawk lo fo a. Dawt hi a sawipuitu an tam phei chuan thudik emaw tih mai pawh a awl thin. Chuvangin, kan history pawh hi kan mithiam Historian-te ngei hian dik taka an ziah hi a pawimawh hlein ka hria.

Remna kan neih theihna atan hian mi pawimawh bik pahnih an awm a, chungte chu Pu Laldenga leh Prime Minister Pi Indira Gandhi te kha an ni.

Pu Laldenga khan Indenpendent sual zui zel tum ta tlat se, remna a awm thei lo ang. Indenpendence hi tharuma sual chhuah rual a ni lo tih te, mipuite pawhin kan tlin tawh lo tihte hriain, mipuite leh Kohhranho ngenna chhangin, India Constitution chhunga inbiak remna nei turin Pu Laldenga kha a tlawm ngam ta zawk a ni. MNF ten zalenna sual tawh lova India Constitution chhunga inremna neih an duh tawh lai leh, India pawhin a duh bawk si laia inremna siam thei lova kha chen Curfew leh checkgate kara mipuiin kan la tuar reng si kha tihtawp vat a tul ngawih ngawih a. Hei vang tak hian kei pawh Remna Palai hna thawk turin ka hna ka bansan ve ta a nih kha.

Tlawm ngamna hi huaisenna sang ber a ni a. Pu Laldenga leh hnam sipaite chuan chu huaisenna chu neiin an lo haw ta a, mipuiten lawm takin kan lo hmuak a nih kha. Tlawm ngam khawpa huaisente kha, “An in Surrender” kan ti leh si tur a ni lo vang.





Chutiang bawkin, Pi Indira khan, tharuma buaina chinfel hautak zia hriain, inbiak rem a lo duh ve bawk avangin remna hi kan nei thei a ni.

Remna Palai hna thawk tura ka inpek atanga thla thumnaah Pu Laldenga be turin London-ah tirh ka ni nghal a. Pu Laldenga chuan, “Nangma mimal thahnemngaihna avang chauha lo kal tur i nih chuan lo kal buai duh suh,” min rawn ti a. Prime Minister hnen atanga Credential letter kenga kal tur ka nih thu a hriat chuan, “Lo kal mawlh rawh, Heathrow Airport-ah ka lo hmuak ang che,” a ti ta a. Ni 17-3-1984 ah ka kal ta a, ni 5 ka cham a. “Pu Denga Tape” an tih mai, inthlan thuchah kengin ka haw leh ta a. MNF te Demand tur point 17 pawh Prime Minister hnenah ka thehlut nghal a. Hun rei tak inbiakna tawp tawh hnu chu tihnun ni lehin, Pu Denga pawh Delhi-ah lakluh a ni leh ta a nih kha.

Heng Demand 17 te zingah hian hlawhtling ta lo a awm nual a. Chakma District Council thiah chu kan nawr hlawhtling zo lo va. ILP chungchangah pawh, tihdanglam emaw, paihbo emaw a nih dawn chuan, Mizoram Sorkar remtihna a ngai ang tia dahtir kan tum chu, “Remtihna” (Consent) ni lovin, “Rawn” (Consult) a ni ang tiin sirtlukpui a ni ta a. Greater Mizoram (Ramri) chungchang pawh State dangte nena sawiho ngai a nih avangin, hun a duh rei dawn a, inremna kan nghakhlel tawh si a, India Constitution Art 3-na hnuaia la chinfel atan dah a ni ta bawk.

A lehlamah State-a hlankai kan ni a, Special Provision pek kan ni a. Inremna thuthlung 6(b) naah Special Category anga Central suma tanpuina dawng zui zel tura tih kan ni bawk.





Ni 21-7-1986-ah Home Minister Buta Singh chuan Parliament-ah inremna chungchang thuah Statement a siam a. Ni 5-8-1986-ah Lok Sabha-ah Mizoram State bill a pulut ta bawk a. Hemi ni hian kei pawhin Opposition MP te pawh an zavaia min pass pui turin ka ngen a. Hetih lai hian BJP-in MP 2 an nei ve a, chungte chu Janga Reddy leh Dr. A.K Patel te an ni a. Anni pahnih chauh hian min pass pui duh ta lo a ni. He Bill vek hi Rajya Sabha-ah ni 7-8-1986 ah an pass ve a. Tichuan, State kan lo ni thei ta a ni.

Kum 1981 ah daih tawh khan remna nawrna atan MLA pali - Pute Ngurchhina, J.H. Rothuama, P. Lalupa leh Lalthanzaua te chuan an MLA nihna an bansan a. Vawiinah hian hriat reng leh chawimawi an phu hlein ka hria.

Remna ni a lo her chhuah apiang hian, remna kawng kan zawn lai kha mitthlaah a lo lang thar leh thin. A thente phei chuan mual min liamsan ta.

Remna chu ni 20 June 1985-a sign mai tawh tura kan inngaih laia kan lawmzia te, ni 29-5-1985 tlaia Zoram lama ka haw tur, Pute- Tawnluia, Aichhinga, H. Vanlalaua leh Thankima ten Airport thlenga min thlah laia kan hlimzia te, MNF-te pawhin inrem mai tawh tura an hriat avanga ni 21-6-1985-a ualau taka Office an hawn tak lai te, harsatna a lo awm leh tak avanga All Party Delegate Pute - Vanlalngaia, P. Siamliana, K. Hrangthankima, R.F. Muana leh SJAC Chairman Lalhmingliana (MP ni ta) te nena 1985 Christmas Present atana nawr chhuah tuma Pu Denga leh Home Ministry inkara ban phar tura kan inzui dam dam laite kha mitthlaah a la cham reng mai.





Christmas present chu beisei taka kan thlir laiin, harsatna dang a lo awm tak zel avangin, Christmas dawn tep, ni 23-12-1985 ah Pu Denga chu London panin a thlawk chhuak leh ta a. Inbiakna chu a tawp chu a ni ta der mai a. Pu Denga koh kir leh ngiatin, All Party-in Peace Committee a din chuan 1986 Republic Day chu a boycot ta a. Ni 12-3-1986 ah zirlaiten kawng an zawh a, MLA leh Minister zawng zawng chu bang turin an ti ta bawk a. Beisei anga inbiakna a kal tluan tak loh avangin, All Party leh SJAC hotute chuan kan Sorkar chauh pawh ni lovin, keimah thlengin min ringhlel ve lek lek ta mai a. Party President leh MP ka nih miau avangin thil awmzia ka sawi a rem bawk si lo. Mipui hriata engkim ka pho lan vek law law loh chuan remna chu a awm thei dawn bawk si lo va. Chuvangin, thil tih chakawm loh tak chu kan ram tan ka tih a lo tul ta a. Ni 16-3-1986 chuan Congress President atangin banna ka thehlut ta a ni. “Thlifimin remna a len lut zo ta si lo va, thlipuiah i tang ang u” tiin remna duh mipuite leh zirlaite nen chuan a nawra nawr chhuak turin hma kan la ta a. MP ka nihna pawh min paihsak zui ta bawk a ni.

Ni 23-6-1986 atangin, ni 5 chhung Zirlaiten Secretariat chu chhun zan zawmin an hual ta a, remna a awm hma chuan Mizoram sorkar chu hna thawk thei lova siam an tum a ni. June ni 30-ah Remna Thuthlung sign a nih dawn thu min rawn hrilh tak avangin, ni 27 niah Secretariat hual chu tihtawp a ni ta a nih kha.

Remna nawr chhuahnaah hian zirlaite hian chawimawi an phu hle a ni. Chawimawina kan dawn chhante hi sawifiah a ngaih fo chuan chawimawi kan phu tawk lo tihna a ni duh hle.

India ramah hian UT atanga State-a hlankai an awm nual tawh a. UT MLA te kha State-a chhawm a rem lo va, Chuvangin, UT MLA te Term kha a tawp thin. President Rule-ah reilote an awm a, chumi chhung chuan State-a MLA turte chu an thlang thar thin. Tumahin, “State kan nih nan kan lalthutthleng kan hlan,” an ti ve ngai lo.

Keiniah chuan - UT leh State kan nih inkar reilote chhung kha President Rule-a awm lovin, Pu Dengan Interim sorkar din a dil a. A hote an lo chhuah kim a duh vang a ni. Chumi chhung reilote pawh chu an inchuh leh ta zel kha a ni a, a zahthlak viau zawk a ni.

Term tawp tur na na nain dinhmun kan kian an ti tlat hi thil awm ngai lo a ni. Kian anga kan ngai tlat a nih pawhin Congress MLA chauhin an kian lo va, opposition MLA sawmte pawh khan an kian ve tho si a, chawimawi an phu ve tho vang.

A tawpna atana ka sawi duh chu - Memorundum of Settlement hi Mizo mipuite leh India Inremna a ni lo va, MNF Party leh India Inremna thuthlung a ni. He thuthlung hian Party dang min huap ve lo va, min phuar ve bawk hek lo. Chuvangin, he MOS hi kan hnam tawpna tur a ni lo va. United Nations Declaration on the Rights of Indigeneus People, 2007-in Zofate Rorelna pakhat hnuaia kan awm theihna tura kawng min hawnsakah hian lut turin i inbuatsaih theuh ang u.

Ka lawm e.

Post Bottom Ad