Aizawl Bazara kharchhawnghote’n mahni ram chhunga mi ngei Zikhlum mipuiin an lei theih nan phai lam atanga Zikhlum lo lutte la lo tura vawiin atanga Bazara thut an tum lo chu ZPM party chuan ropui an tih thu an sawi.
Vawiina an party office-a chhung inkhawm an neihah he thu hi ZPM-in Chief Minister ni tura an theh chhuah Pu Lalduhoma’n a sawi a. Tuipui East bial chhunga Samthang khuaah tunlai hian Zikhlum an thar nasa em em a, a hralhchhuahna lamah phai lam atanga Zikhlum a lo luh ve reng avangin harsatna an tawk a. Hei hi hriatpuiin Aizawl Bazara thla thar khar chhawngtute chuan phai lam atanga Zikhlum lo lut hi lak an tum lo a, hei hi an party chuan a chuang tak zet a ni, a ti.
Pu Lalduhoma chuan, kum 1994 khan khatih laia sorkarna changtu Congress sorkar khan state chhunga thlai tharchhuahte ram pawna hralh chhuah khapna dan - Mizoram Agriculture Produce (Prohibition) order 1994 siamin he dan hnuaiah hian kuthnathawktute thlai thar chu an thunun a, Silchara sumdawng pakhat thurualpuiin Mizo thlai thar te chu man tlawm te tein an leisak a. A hnua MNF an rawn sorkar leh pawhin kuthnathawktute thlai thar chhuah zinga 138 lai chu an rawn thununsak le leh a ni, a ti a. Heng kuthnathawktute thawh rahte hi ram pawnah zalen taka hralhchhuah anih theih nan ZPM an sorkar hunah chuan sorkarin a thununna Dan chu an thiah hmasak ber turte zinga mi a ni, a ti.
Kawphetha chungchang pawh sawiin Pu Lalduhoma chuan, 18th Power Suvey of India chuan Mizoramah Kawlphetha MW 3,663 siam chhuah theihna a awm an tih laiin kum 40 vel laia upa tawh P&E department chuan MW 10 chauh a la siam chhuak a, ZPM an sorkar a nih chuan sorkarin a hluihlaws tawh project 9-te tharthawh lehin sorkarin Boot system hmanga MoU a ziahpui 9-te chu tihtawp vek a ni ang, a ti bawk.
- AIR News Aizawl
Post a Comment