REMNA NI THUCHAH - MZP PRESIDENT RAMDINLIANA RENTHLEI

REMNA NI THUCHAH - MZP PRESIDENT RAMDINLIANA RENTHLEI 

The 30th June, 2018 #PUC Multicomplex Auditorium

1. Mizote kum 20 chhung hun khirh leh harsa tak hnuaiah khawsain, tuboh leh dolung inkara kan awm hnuin, mipui ten kan thlakhlelh em em; Pathian hnena tawngtai a kan dil INREMNA chu ni 30 June 1986 khan neih a lo ni ta a. He remna ni hi thangthar ten a pawimawh zia leh hlut zia kan lo hriat zuall theih nan MZP in kumin REMNA NI a huho a hman rawt a buatsaih kan ni.

2 Vawiin REMNA NI ah hian remna leh muanna kan neih theih na atan a inremna thuthlung a hming ziaktu (Signatories) pahnih; Pu Laldenga (L) leh Pu Lalkhama IAS (Rtd.) bakah remna leh muanna kan neih theih nana C.M nihna bansan tu Pu Lal Thanhawla te chawimawina thuziak hlan nise kan ti a ni. Remna ni hi kum dangah pawh a remchan dan ang zela buatsaih kan tum avangin kuminah a thawhkhatna atan heng mi pathumte hi chawimawi phawt nise kan ti a, remna atan thawhhlawk tak tak; kohhran bakah pawl leh mimal an awm teuh tih kan hria a. Heng te hi kum dangah a tahtawlin chawimawi phu leh tlak te chu kan la chawimawi zel dawn a ni.

3. Chawimawi tur chungchangah hian sawi neuh neuh a tam hle a, heng atang hian chawimawi phu leh tlak kan hriat belh zel bawk a, lehlam zawng tak chuan a lawmawm hle a ni.

4. Kan ram Zoram hi kan pi leh pu te hun lai chuan ram zalen kan ni a, tu ram leh awpna hnuaiah mah kan awm ngailo. Kan ram chin chu kan pi leh pu ten an lo humhalh nasa em em a, kan ram min nektu ni a an hriat avangin Cacar leh kan ram in rina hmun a British ho thingpui huan enkawltu Winchester chu thatin a fanu Mary Winchester (zoluti) pawh an man a nih kha.

5. Kan hnen loh avangin British chuan kan ram chu min awp a, eng ram awp mah kan nih loh avangin Excluded Area tia kan ram chu dah a ni. A hnuah Zofate chu Burma, India leh E. Pakistan (Bangladesh ni ta) ah te thendarh kan lo ni ta. Mizoram pawh Lal awpna hnuai ata chhuakin, kan thlan ngei te hmangin Autonomous District Council hnuaiah ro kan in rel ve ta a.

6. Kum 1959 Mautam lo thlengin Mizo Faminine Front a hring a, 1961 kumah MNF a ti danglamin Political Party a lo ni ta a. Zofate tan zalenna neih an tum ber a nih angin 1966 March ni 1 khan Independence an puang ta a. Heta tang hian Mizoram buai a lo in tan ta a, March ni 5, 1966 phei kha chuan Aizawl leh Mizoram khaw hrang hrang Jet Fighter nen bomb a beih a ni ta hial.

7. Vai sipai ten dimdawina tel hauh loin kum 20 chhung min nghaisa a: Kan in leh lo buh leh bal min hal sak a, khaw tam tak khaw khatah min khawm a, carfew an puang reng bawk a, Pi tar pu tar an dim lova, nunau pawisawilo thlengin an nghaisa duh zel a, Nula, nu leh pitar thlengin an pawngsual zel bawk a. Rapthlak tak a ni. Eitur a vang a, kawl bahra hnah-bal leh vaimim ei phak chu awhawm tak an ni. Remna hlut zia i chhut nawn ang u.

8. Ram buai chhung khan keini MZP phei chuan tuar tak kan ni a, 1981 phei kha chuan din zui phal loh-BANNED hial kan ni a. A hnu lawkah PUC Library, Republic H.S, Mamawii H.S, K.M H.S te hal a ni a, MZP mawhpuh kan lo ni a, tun thlengin he thil hi MZP tih a la ngai kan la awm teuh mai hi a pawi ka ti. MZP hal a nilo tih ka sawi duh.

9. MZP hian remna a awm theih nan nasa takin a lo bei a, MZP din zui a rem loh hnuah pawh SJAC angin remna atan a bei zui a. India Parliament kawtah te nawrh an zu huaihawt hial a, vawi duailo India ram hruaitu te pawh lehkha an thawn a ni.

10. Kan ram tana zalenna sualtute khan mahni a ro inrelna (zalenna) neih an duh avang a an beihna chu MZP chuan kan ngaisang a, kan chhuang hle a ni. Heng zalenna sualtu te hi kawhmawh bawlna leh suahsualna vang a nilo a, min awptute hnen atanga zalenna famkim neih an duh vang a ni a, an tawrhna leh an tha senna te chu sawi nep chi a nilo.

11. Zofate hi Pathianin min vengin min kaihruai zel ang a, ni khat niah rorelna pakhat hnuaiah kan la awm ngei MZP chuan a beisei tlat a ni.

12. He remna ni kan hman hian ram leh hnam hmangaihna rilru thar min put tirin, Zofate thinlungah zalenna leh remna leh muanna hlutzia a tharin min hriatchhuah tir fo rawhse tih hi Mizo Zirlai Pawl duh dan a ni.

13. Kan ramri buai na chungchangah hian hmalakna a kal ve bek bek a, kan beisei ang a nih loh chuan kan dawh theihna hian chin tawk a nei dawn tih sawrkar hotu te hian lo hria se ka duh. NGO ang te, Party ang ten vei hle mah ila, sawrkar angin hmalakna a lo la awm lo reng reng hian rilru a ti na hle. Kumin MLA Election lo awm turah hian Party tin ten hemi chungchang hi Manifesto in ziah that siak turin kan duh a, a ziak tha hi chu kan hre reng ang…

14. Mizo pi leh pu te sulhnu humhalh hna leh zawnchhuah hna hi theihtawpin INTAC in an thawk hi a lawmawm ka ti hle a. Mahse tunhnai a Archeological Survey of India te hmalakna a khawvel hriat a phochhuah an tumna kawngah kan pi-pu te sulhnu hi Hindu leh Vai pathian te sulhnu anga an sawi hi kan helh hle a. A tul angin na takin kan dodal zel dawn a ni.