MZP chuan Mizoram Sorkar enkawl zirna in hrang hrang (Primary School atanga Higher Secondary School)-a Zirtirtu inkhairuallo lutuk chu tha lo a tiin, hei hian nasa takin zirna In thenkhat ah zirna dinhmun a chhiat phah hle niin a hria a. Zirtirtu indaihlohna school hi a bikin thingtlang khua ah a nasa bik niin MZP chuan a hriain, Mizoram a zirlai thahnem takin an tuar nasa hle a, khawpui leh thingtlang lam zirlaiten zirna dinhmun in ang tlang leh in tluktlang taka zirna tha an dawn theih hi MZP chuan a duh hle a. Sorkar enkawl school-a zirlai ten zirna in tluktlang an dawn theih nan MZP chuan zirtirtu semrual hna thawk turin Sorkar a phut tlat a ni.
Directorate of School Education Statistical Cell-in a tarlan dana School Education Department hnuaia zirna in hrang hrang leh zirtirtu awm zat chu hetiang hi a ni.
School No of school No of Student No of Teacher Pupil Teacher Ratio(PTR)
i)Primary 1968 149612 8510 1:18 (SSA 1:16)
ii) Middle 1542 88655 10206 1:9 (SSA 1:7)
iii) High School 640 36529 4513 1:8 (RMSA 1:7)
iv) Higher SS 163 22540 1661 1:14
Tin, heng a chunga kan tarlan bakah hian SSA hnuaiah bik Primary School ah zirtirtu 550 an awm a, tin UPS(SSA) ah zirtirtu 1643 avaiin SSA zirtirtu 2193 leh RMSA-ah Headmaster 92 leh Zirtirtu 509 an vaiin 598 zirtirtu an awm bawk a ni. The Right of Children to Free and Compulsary Education(RTE) Act, 2009 ah chuan Pupil Teacher Ratio(PTR) Primary leh Upper Primary(Middle School) ah zirtirtu pakhat in naupang a zirtir tur zat PTR chu hetiang hi a ni a Primary ah 30:1 a ni a, Upper Primary(Middle School)-ah 35:1 a ni. Tin, The Rashtriya Madhyamik Shiksha Abhiyan (RMSA) framework ah chuan PTR hi secondary level-ah 30:1 a ni thung a ni. Mizoram ah chuan Pupil Teacher Ratio(PTR) hi Primary school ah 18:1 a ni a, Upper Primary(Middle School)-ah 9:1 a ni a, High School-ah 8:1 leh Higher Secondary School-ah 14:1 a ni thung a ni.
Heti zozai zirtirtu an awm chunga zirna in hrang hrang (a bikin thingtlang School) ah zirtirtu indaih lohna a nasa em em reng mai hi MZP chuan mak a ti a, hei hi a chhan chu zirtirtu tlem em em vang pawh ni lo in, zirtirtu awm sa rualkhai taka thingtlang leh khawpui school-ah te semrual an nih loh vang niin MZP chuan a hria a ni. Zirtirtu awmsa semrual chungchangah hian School Education Minister sawipui a ni tawh a, Chief Minister pawh sawipui a niin, zirtirtu semrual chungchanga hma la tura ngenna ziak a thehluh a ni tawh bawk a ni. MZP chuan chak lehzuala zirtirtu semrual hi kalpui turin thuneitute a ngen nawn leh a ni. Zirtirtu awmsa semrual chungchangah hian thuneitu te leh Sorkara thil ti thei tak tak te in rawlh lo tur leh harsatna thlen lo turin kan ngen a, khawpuiah zirtirtu tam tak an awm lai a thingtlanga an indaihlo em em mai hi a mak a, hei hi thuneitu ten hma an lak loh vanga MZP chuan a ngai a ni.
MZP in a zirchianna ah chuan Aizawl-a Sorkar enkawl Primary school thenkhat ah chuan zirlai 55 awmna ah zirtirtu 8 awmna te, zirlai 63 awmna ah zirtirtu 10 awmna te, zirlai 60 awmna ah zirtirtu 8 awmna te leh zirlai 15 awmna ah zirtirtu 5 awmna te a awm a ni. Aizawl khawchhung Sorkar enkawl Middle school thenkhat ah chuan zirlai 39 awmna ah zirtirtu 10 awmna te, zirlai 96 awmna ah zirtirtu 9 awmna te, zirlai 15 awmna ah zirtirtu 8 awmna te, zirlai 43 awmna ah zirtirtu 11 awmna te leh zirlai 93 awmna ah zirtirtu 12 awmna te a awm bawk a ni. Tin, Sorkar enkawl high school thenkhat ah chuan zirlai 35 awmna ah zirtirtu 9 awmna te, zirlai 47 awmna ah zirtirtu 10 awmna te, zirlai 63 awmna ah zirtirtu 11 awmna te leh zirlai 44 awmna ah zirtirtu 8 awmna te a awm a ni. Aizawl ah zirtirtu kan indaih viau lai hian MZP a in report Thingtlang Primary school 11 te chuan zirtirtu pakhat(1) chiah an nei a heng zirtirtu pakhat nei te hian zirlai 42 te, 45 te an enkawl a ngai a, Thingtlang Primary school 45 te chuan zirtirtu 2 chiah an nei a, Thingtlang Primary school 30 te chuan zirtirtu 3 chiah an nei bawk a ni. Tin, Thingtlang Middle School leh High School ah hian zirtirtu an indaih lo hle bawk a ni.
Middle School bik-ah hian Hindi teacher nei lo hi school 237 an awm a, kan hriat theih china Middle School-ah Headmaster nei lo hi school 105 an awm bawk a ni. Primary school-ah hian Head Teacher nei lo MZP in a dawn chu school 25 a ni a, High School-ah Heahmaster nei lo MZP in a dawn chu school 12 a ni bawk a ni. Tin, Zirtirtu tura lak ni si SSA a ni emaw RMSA a ni emaw zirtirtu pangngai pawh School Education Department Office hrang hranga awm(attached) an thahnem hle bawk a, tin zirtirtu lak thar thingtlang lama post ten an thil tihtheihna hmangin transfer an dil thin a hei hi MZP chuan tha lo a ti hle a ni. Heng zirtirtu tura lak office hrang hranga attach a awm te hi an awmna tur hmunah kal turin MZP chuan a ngen nghal bawk a ni.
Zirtirtu awmsa semrual chungchangah hian MZP chuan na takin hma a la dawn a, Zirtirtu awm sa rualkhai taka thingtlang leh khawpui school-ah te semrual an nih loh chuan atul angin thingtlang lam zirlai ten zirna tha an dawn ve theih nan MZP chuan hma a la zel dawn a ni.
Issued by :
Mizo Zirlai Pawl(MZP)
General Headquarters, Aizawl
Dated 7th July, 2018
MZP PRESS STATEMENT
Post a Comment