Challianthanga

thuziakSual ngaihdam theih loh chu Thlarau Thianghlim sawichhiat chu a ni a (Mat 12:32). He thu pawimawh tak mai hi, Pathian thu ațangin a awmzia leh nihphung dik hrethiam thei tûrin Marka bung 3:28-30 hi han chhiar phawt ila:

" Tihtak meuhin ka hrilh a che u, mihring fate hi an sualna zawng zawngah leh an Pathian sawichhiatna kawng engah pawh, an sawichhiatnaahte chuan ngaihdam an ni ang a; tupawh Thlarau Thianghlim meuh sawi chhia erawh chuan eng tikah mah ngaihdamna a hmu lo vang a, chatuan sualna kawngah chuan thiam lohvin a awm zâwk ang," a ti a. (" Ramhuai bawlhhlawh a zâwl a ni, " an tih avâng khân chu chu a sawi a ni.)

Kan bengkawn hle tûr chu, " Ramhuai bawlhlawh a zâwl a ni, an tih avâng khân chu chu a sawi a ni," tih khi a ni.





Kan hriat châk ber tûra ka rin, "ngaihdam theih loh, Thlarau Thianghlim sawichhiatna," kan sawi hmain chang 28 thu mawi zia khi han sawi hmasa ila. Chang 28 ah chuan, ".....mihring fate sualna zawng zawng leh Pathian an sawichhiatna engah pawh ngaihdam an ni ang," tih a ni a. Khi thu khi a ri a va mawi êm! Kan sualna zawng zawngah leh Pathian kan sawichhiatna kawng engah pawh ngaihdam kan nih tûr thu han hriat tluka rimawi zawk hi a awm thei dâwn em ni? Chanchin Țha thupuan chhuah ropui a va ni teh lul êm! Sual zawng zawng han tih chuan sual lian leh sual tê te, sual hrawmhraw pui pui te, nimina ka sual leh vawiina ka sual te, naktuka ka sual leh tûr chenin a huam vek a ni. I sual zawng zawng ngaihdam theih a ni, Lalpa i sawichhiatna zawng zawng pawh ngaihdam vek a ni. Sual engmah ngaihdam theih loh a awm lo, Pathian i sawichhiatna ngei pawh ngaihdam a ni. Ka sawi a ni lo, Lalpa Isua sawi ngei a ni (Mark 3:28).

Ka Kristian țhian duh takte u, sual ngaihdam theih loh chu ti angah i inngai tawh lovang u. Sual ngaihdam theih loh awm chhun chu Thlarau Thianghlim sawichhiat chu a ni. Pathian leh Krista sawichhiat ni lovin. Tin, Thlarau Thianghlim tihmih hi Amah sawichhiatna a ni lo va, Thlarau Thianghlim dodal pawh Amah sawichhiatna a ni hek lo.





Isua chuan, "Tu pawh Thlarau Thianghlim meuh sawichhia erawh chuan eng tikah mah ngaihdamna a hmu lo vang , chatuan sualna kawngah chuan thiam lohvin a awm zawk ang" a ti a (Marka 3:29). He ngaihdam theih loh sual hi chu a dangdaiin a naran lo hle a, chuvângin he sual, Thlarau Thianghlim sawichhiatna sual hi eng nge a nih? Tih hi kan hriat atâna thil pawimawh tawp khawk a ni ti ila kan sawi sual awm lo ve.

Thlarau Thianghlim sawichhiatna chu eng nge ni? A chhanna chu, "A lang a pauva Thlarau Thianghlim sawichhiatna thute kâ ngeia sawi chhuah" chu a ni. A nih leh a lang a pauva kâ ngeia Thlarau Thianghlim sawichhiatna sawi chhuah chu a ni tih engtin nge kan hriat ang? A tlângkawmna thuin a tichiang a, han chhiar ila: " Ramhuai bawlhhlawh a zâwl a ni, an tih avâng khân chu chu a sawi a ni," tih a ni. He ngaihdam theih loh Thlarau Thianghlim sawichhiatna sual hi mi tam takin an ngaih anga awlsam a ni hauh lo mai. Tu emawin taksa chetna a chang a, ka va awih lo e aw...! Sihal ang maia u vak vak hi ka ring ve nek lo ve, i tih țhinna khân ngaihdam theih loh Thlarau Thianghlim sawichhiatna a thleng pha reng reng lo. He ngaihdam theih loh sual hi ti tûr chuan miin Isua ramhuai hnawt chhuak lai te, thilmak a ti laite chu mit ngeia chiang taka a hmuh a ngai a, thil ropui leh mak he leia a ti lai hmu chung reng leh hre vek chung si-a ramhuai bawlhhlawh a zâwl avânga thilmak ti a nih hi, a la tih țalh a ngai a ni. (Kan tûn huna sawichhiat theih dân chu, Chhanchin Țha khawngaihna dawngtuin Isua a hnawlin a ni ang)





A chiang a ni lawm ni? "He, ngaihdam theih loh sual ti tûr hi chuan, Isua chu mita hmutu nih a ngai a, Isua thilmak tihte a hriatpui a ngai a, Pathian Thlarau avânga thilmak a ti lai chu chiang taka a hmuh a ngai a, chutiang taka a thilmak tih pawh hmu chung reng siin, hêng thilmak hi ramhuai bawlhhlawh a zâwl avângin ramhuai hnathawh a ni an tih luih țalh a țul a ni." Tih hi a ni a. Kan tûn hunah hian amah Isua chu kan mit ngeia hmu si lovin, a thilmak tih laite chu hmu hek lovin, hei hi Thlarau Thianghlim hnathawh ngei chu a ni tih chiang taka hre bawk si lovin, engtin nge Thlarau Thianghlim sawichhiatna sual chu kan tih theih tehlul ang?

Ka Kristian țhian duh takte u, Hmêlma Setana'n Thlarau Thianghlim sawichhiatna sual chu i tih tawh avângin ngaihdam i ni thei ngai tawh lo vang tia i rilru-a a hek che chuan, heti hian lo chhang ang che. " Setan, chutiang thil engmah a awm lo, Isua thiltih mak chu mit ngeiin ka la hmu lo va, a thiltihte chu Thlarau Thianghlim hnathawh ngei a ni tih hre chiang chung siin ramhuai hnathawh a nih saw..! tiin ka sawi lui țalh bawk si lo va, chuvângin i mi hekna hi ka pawm lo, dawt a ni, tiin hmêlma chu i chhang thei ang.

Vawi khat chu kan Camp naah pa pakhat hian heti hian ka sual hle mai a, Thlarau Thianghlim sawichhiatna sual hi ka lo ti reng tawh a ni lo maw...! tiin mangang takin a sawi a. Ti hian ka zawt a, i sualna avânga lungngaihna i nei em? tiin. A ni chuan nei tehreng mai, a ti a. I sual avânga lungngaihna i la neih chhûng chuan ngaihdam theih loh Thlarau Thianghlim sawichhiatna sual chu i la ti lo a nih chu," tiin ka chhang a.

Kan thu khel chungchang hi Mathaia pawhin a ziak ve tho va (Mat 12:32) Thlarau Thianghlim thiltihtheihna hmanga Lal Isuan ramhuai a hnawt chhuak lai chiang taka hmu reng siin Juda te khân an thinlung an ti khauh tlat a, luhlul chhuahin ramhuai lal Belzebula hmangin a lawm ramhuai chu a hnawh chhuah tiin an țang lui tlat a. Hêng luhlul chhuah tlat Juda te chungchang hi heti hian sawi a ni. " Beng zawngin an hre na ang a, A ngaihna an hre tawp lo vang; Hmuh zawng an hmu na ang a, Hriat zawng an hre tawp lo vang; He chite thinlung hi a lo chawlawl ta a, An beng a lo ngawng deuh va, An maimitchhing bawk a" (Mat 13:14-15).





Pathian thu ațanga kan hmuh chu, " miin Thlarau Thianghlim sawichhiatna sual chu a tih chuan , engti kawng mahin sual hriatna chu a nei lo va; chhandam pawh a ni hek lo. Eng vângin maw chhandam a nih loh? a chhanna chu, " an thinlung chu a chawlawl tawh avângin an beng a ngawng a, an maimitchhing bawk a" tih a ni.

Kan thu khel lai fiah leh zual nân Luka 8:12 thu kha en tel bawk ila. " Tin kawng dunga mi chu thu hre tawhte hi an ni; tin, Diabola chu a lo kal a, an awih lohva, chhandam an nih theih loh nân an rilru ata chu a lâksak țhin." He thua kan hmuh chu Isua chauh ni lovin Setana ngei pawhin miin Isua chu Lalpa atâna an pawm veleh chhandam an ni nghal a ni tih chu a hre chiang hle a; hemi avâng hian miin an ring ang a, chhandam an ni mai ang tih chu a hlauthawng hle a ni.

Kan thu khel chungchanga Mathaia bung 13 thu kha a fiah lehzualna tûrin han tarlang nawn leh ila. Chang 11 ah chuan, "Tin, ani chuan a chhang a, an hnênah vânram thurûk chu nangni hriat zawng phal a ni a, anni hriat erawh chu phal a ni lo."......chutih avâng chuan tehkhin thuin an hnênah ka sawi a ni (chang 13). Chang 15 ah chuan........ chuti lo chuan, kan hmu ang a, kan bengin kan hria ang a, kan thinlungin kan hre bawk ang a, Kan hawi kîr leh ang a, Anin min tidam hlauh dah ang e' an ti a. He thu awmzia chu, " Thlarau Thianghlim sawichhetute chungchangah chuan, chhndam tûrin an kîr ang tih Pathianin a hlau a nih ber chu! Chuvângin Isua chuan tehkhin thuin thu a sawi a, chuti lo chuan, an hawi kîr ang a, tihdam an ni hlauh dah ang e. Isua Lalpa a ni tih rin mai a chhandam nih hi a va mak êm! Haleluiah!! "Ring la, i nung ang" tih thu ropui zia leh mak zia hi aw....!

Kan thu khel, ngaihdam theih lo sual, Thlarau Thianghlim sawichhiatna chungchang chu kan sawifiah ta hle a. Mahse, Thlarau Thianghlim sawichhetu chu, eng vângin nge tûn hunah leh hun lo la awm tûah pawh ngaihdam theih an nih loh? tia zawhna la nei țalh kan awm thei a. Chumi chhanna chu, " Thlarau Thianghlim sawichhetute chu, chatuana an sual dâwn avângin" tih a ni.





Meidilah chuan engtin nge sualna chu a la awm theih ang le? ti-a zawhna a la awm thei fo va, meidilah chuan amah tihreawm bertu chu lung leh mei a ni dâwn a, chatuan hremhmunah chuan lei hmawr tihhnawnna tûr chauh pawh tui a awm dâwn lo va, hurna mei pui chuan a kang chatuan ang a, sualna leh hurna khawpkhap lohna hmun, hreawm zawng zawng awmna hmun, hmun lungchhiat thlâk ber, thih duh mahse thih theih tawh si lohna hmun hreawm ber chu a ni ang. Mahse, Amah Lalpa Isua chu kan Lalpa atâna kan rin duh phawt chuan chatuana nunna kan neihna tûr dal thei thil engmah reng a awm lo. A chhan chu, "Tu pawh ka hnêna lo kal chu ka hnawt chhuak tawp lovang titu ngei chuan, mihring fate hi an sualna zawng zawngah leh Pathian an sawinchhiatna kawng engah pawh, an sawichhiatnaahte chuan ngaihdam an ni ang (Marka 3:28)." A ti si a.

Hei erawh hria ila. Ngaihdam theih tawh loh sual, Thlarau Thianghlim sawichhiatna sual hi Pathian fa ten kan ti thei tawh lo a ni tih hre mah ila, saw chu Thlarau Thianghlim hnathawh a ni, sawi chu a ni lo, saw chu thlarau sual hnathawh a ni, hei chu ka pawm, hei chu ka pawm lo ti-a sawi zung zung kawngah erawh chuan i fimkhur hle ang u.

Post a Comment

Powered by Blogger.